അഫ്ഗാനിസ്ഥാനില്‍ നാറ്റോ വാഹനവ്യൂഹത്തിനുനേരെ ചാവേര്‍ ആക്രമണം
Thursday, May 16, 2013 12:53 PM IST
കാബൂള്‍: അഫ്ഗാനിസ്ഥാനില്‍ നാറ്റോ വാഹനവ്യൂഹത്തിനുനേരെ ഉണ്ടായ ചാവേര്‍ ബോംബ് ആക്രമണത്തില്‍ രണ്ടു കുട്ടികള്‍ ഉള്‍പ്പടെ ആറുപേര്‍ മരിച്ചു. സ്ഫോടക വസ്തു നിറച്ചകാര്‍ നാറ്റോ വാഹനവ്യുഹത്തിനു സമീപം പൊട്ടിത്തെറിക്കുകയായിരുന്നു. ശക്തമായ സ്ഫോടനത്തിന്റെ പ്രകമ്പനം സമീപപ്രദേശങ്ങളിലും അനുഭവപ്പെട്ടതായി വാര്‍ത്താ ഏജന്‍സി റിപ്പോര്‍ട്ടു ചെയ്തു. നിരവധി കെട്ടിടങ്ങളും വാഹനങ്ങളും സ്ഫോടനത്തില്‍ തകര്‍ന്നു. സ്ഫോടനത്തെ തുടര്‍ന്നു കനത്തപുക ഉയര്‍ന്നത് രക്ഷാപ്രവര്‍ത്തനത്തെ ബാധിച്ചതായി കാബൂള്‍ പോലീസ് ചീഫ് ജനറല്‍ സലാഗി പറഞ്ഞു.

മരിച്ചവരില്‍ നാറ്റോ സംഘത്തില്‍ ഉള്ളവര്‍ ഉണ്ടോയെന്നകാര്യം വ്യക്തമല്ലന്ന് കാബൂള്‍ ഡെപ്യൂട്ടി പോലീസ് ചീഫ് ദൌത് അമിന്‍ പറഞ്ഞു. മരണസംഖ്യ സംബന്ധിച്ചുകൃത്യമായ വിവരം ലഭ്യമല്ലന്നും അദ്ദേഹം കൂട്ടിച്ചേര്‍ത്തു. 37 പേര്‍ക്ക് പരിക്കേറ്റതായാണ് പ്രാഥമിക വിവരം. പരിക്കേറ്റവരില്‍ ഏതാനും പേരുടെ ആരോഗ്യനില അതീവഗുരുതരമാണെന്ന് കാബൂള്‍ സിറ്റി ആശുപത്രി ചീഫ് കാബീര്‍ അമിരി അറിയിച്ചു. സ്ഫോടനത്തെ തുടര്‍ന്ന സമീപത്തെ കെട്ടിടങ്ങളിലേക്ക് തീ പടര്‍ന്നതായും റിപ്പോര്‍ട്ടുകള്‍ ഉണ്ട്.

താലിബാനുമായി ബന്ധമുള്ള ഹെസ്ബി ഇസ്ലാമി സ്ഫോടനത്തിന്റെ ഉത്തരവാദിത്വം ഏറ്റെടുത്തതായാണ് റിപ്പോര്‍ട്ട്. മുന്‍ അഫ്ഗാന്‍ പ്രധാനമന്ത്രിയായിരുന്ന ഗുബുദ്ദിന്‍ ഹെക്മാടിയറുടെ നേത്യത്വത്തിലുള്ള ഭീകരസംഘടനയാണ് ഹിസ്ബി ഇസ്ലാമി. ഒരു കാലത്ത് അമേരിക്കയുമായി അടുത്തബന്ധം പുലര്‍ത്തിയിരുന്ന ഗുബുദ്ദിന്‍ ഇപ്പോള്‍ അമേരിക്കയുടെ നോട്ടപുള്ളികളില്‍ ഒരാളാണ്. കഴിഞ്ഞ സെപ്റ്റംബറില്‍ ഹെസ്ബി ഇസ്ലാമി നടത്തിയ സ്ഫോടനത്തില്‍ 12 പേര്‍ കൊല്ലപ്പെട്ടിരുന്നു.