സംസ്ഥാനത്തു റേഷന്‍ സാധനങ്ങള്‍ മറിച്ചു വില്‍ക്കുന്ന സംഘം സജീവം
Wednesday, April 24, 2013 1:22 PM IST
തിരുവനന്തപുരം: സംസ്ഥാനത്ത് റേഷനരി ഉള്‍പ്പടെയുള്ള റേഷന്‍ സാധനങ്ങള്‍ മറിച്ചു വില്‍ക്കുന്ന സംഘം സജീവം. ഇവര്‍ക്കെതിരെ സിവില്‍ സപ്ളൈസ് വകുപ്പ് റെയ്ഡ് ശക്തമാക്കിയപ്പോഴാണ് ഇതു സംബന്ധിച്ച ഞെട്ടിക്കുന്ന വിവരങ്ങള്‍ പുറത്തുവന്നത്. റേഷന്‍ കടകള്‍ വഴി സംസ്ഥാനത്തെ ബി.പി.എല്‍ വിഭാഗത്തില്‍പ്പെട്ട കാര്‍ഡുടമകള്‍ക്ക് വിതരണം ചെയ്യേണ്ട അരിയും ഗോതമ്പും പഞ്ചസാരയുമാണ് വന്‍ തോതില്‍ മറിച്ചു വില്‍ക്കുന്നത്.

കഴിഞ്ഞ ആറുമാസത്തിനുള്ളില്‍ സിവില്‍ സപ്ളൈസ് വകുപ്പ് നടത്തിയ റെയ്ഡില്‍ പിടിച്ചെടുത്തത് 5300 ക്വിന്റല്‍ പുഴുക്കലരിയും 400 ക്വന്റല്‍ പഞ്ചസാരയും 230 കിന്റല്‍ ഗോതമ്പുമാണ്. ഓപ്പണ്‍ മാര്‍ക്കറ്റില്‍ രണ്ടു കോടിയോളം വിലയുള്ള സാധനങ്ങളാണ് പിടിച്ചെടുത്തത്. ഇതുമായി ബന്ധപ്പെട്ട് 25 ഓളം കേസുകള്‍ രജിസ്റ്റര്‍ ചെയ്യുകയും രണ്ടു പേരെ അറസ്റ് ചെയ്യുകയും ചെയ്തു. റേഷന്‍ സാധനങ്ങള്‍ കൊല്ലത്തെ സിവില്‍ സപ്ളൈസിന്റെ ഡിപ്പാര്‍ട്ട്മെന്റ് സ്റോറില്‍ നിന്ന് മറിച്ചു കടത്താന്‍ സഹായിച്ചതിന് മൂന്നു ഉദ്യോഗസ്ഥരെ സസ്പെന്റ് ചെയ്യുകയും ചെയ്തു. റേഷന്‍ ലോബി സജീവമായിരിക്കുന്നത് കോഴിക്കോട്, പാലക്കാട്, തിരുവനന്തപുരം, എറണാകുളം, കൊല്ലം ജില്ലകളിലാണ്. കോഴിക്കോട് 2052 ക്വിന്റല്‍ പുഴുക്കലരിയും പാലക്കാട് 1656 കിന്റല്‍ പുഴുക്കലരിയും പിടികൂടിയിട്ടുണ്ട്. തിരുവനന്തപുരത്ത് 624 കിന്റല്‍ പുഴുക്കലരിയും 11 കിന്റല്‍ പഞ്ചസാരയും പിടികൂടി.

ഭക്ഷ്യ വകുപ്പ് മന്ത്രി അനൂപ് ജേക്കബ്ബിന്റെ പ്രത്യേക നിര്‍ദ്ദേശ പ്രകാരം സിവില്‍ സപ്ളൈസ് കമ്മീഷണറുടെ നേതൃത്വത്തിലാണ് റെയ്ഡുകള്‍ നടക്കുന്നത്. ബി.പി.എല്‍ വിഭാഗത്തില്‍പ്പെട്ട ജനങ്ങള്‍ റേഷന്‍ സാധനങ്ങള്‍ ലഭിക്കാതെ റേഷന്‍ കടകള്‍ കയറി ഇറങ്ങുന്ന അവസരത്തിലാണ് സാധനങ്ങള്‍ വന്‍ തോതില്‍ കരിഞ്ചന്തയിലേയിലേയ്ക്ക് പോകുന്നത്. ഇപ്പോള്‍ പിടി കൂടിയ കേസുകളിലധികവും ഉദ്യോഗസ്ഥരുടെ അറിവോടു കൂടിയാണ് മറിച്ചു വില്‍പന നടന്നിട്ടുള്ളതെന്ന് വ്യക്തമാണ്.

റേഷന്‍ സാധനങ്ങള്‍ ലഭിക്കാനില്ലെന്ന് വ്യാജ പ്രചരണ നടത്തിയ ശേഷമാണ് സംഘം സാധനങ്ങള്‍ കടത്തിക്കൊണ്ടുപോകുന്നത്. സിവില്‍ സപ്ളൈസ് ഗോഡൌണുകളില്‍ വച്ച് തന്നെ ഉദ്യോഗസ്ഥരുടെ അറിവോടെ റേഷന്‍ സാധനങ്ങള്‍ മറിച്ചു വില്‍ക്കുന്നുവെന്നതിന്റെ തെളിവാണ് കൊല്ലത്തെ സംഭവം. ഇതുമായി ബന്ധപ്പെട്ട് മൂന്നു ഉദ്യോഗസ്ഥരെ അന്വേഷണ വിധേയമായി സസ്പെന്റ് ചെയ്യുകയും തുടര്‍ നടപടികള്‍ നടക്കുകയുമാണ്. റേഷന്‍ സാധനങ്ങള്‍ ബ്രാന്റഡ് കമ്പനികളുടെ പേരില്‍ ചാക്കുകളില്‍ നിറച്ച് ഓപ്പണ്‍ മാര്‍ക്കറ്റില്‍ കൂടിയ വിലയ്ക്ക് വിറ്റഴിക്കുകയാണ് ചെയ്യുന്നത്. ഇതിന്റെ വിഹിതം താഴെത്തട്ടു മുതല്‍ മുകള്‍ത്തട്ടിലുള്ള ഉദ്യോഗസ്ഥര്‍ക്ക് കൃത്യമായി ലഭിക്കുന്നുമുണ്ട്.

ഈ വിവരങ്ങളുടെ അടിസ്ഥാനത്തിലാണ് റേഷന്‍ കരിഞ്ചന്ത തടയാന്‍ കര്‍ശന നടപടിയെടുക്കാന്‍ ഭക്ഷ്യമന്ത്രി അനൂപ് ജേക്കബ്ബ് നിര്‍ദ്ദേശിച്ചത്. ജില്ലാ സപ്ളൈ ഓഫീസര്‍മാരുടെ നേതൃത്വത്തിലാണ് റെയ്ഡുകള്‍ നടക്കുന്നത്. വരും ദിവസങ്ങളിലും കര്‍ശന റെയ്ഡുള്‍ ഉണ്ടാകും. പോലീസിന്റേയും റെയില്‍വേ പോലീസിന്റേയും സഹകരണത്തോടെയായിരിക്കും റെയ്ഡുകള്‍ നടക്കുക. പിടിച്ചെടുത്ത സാധനങ്ങള്‍ സപ്ളൈക്കോ ഗോഡൌണുകളില്‍ സൂക്ഷിച്ചിരിക്കുകയാണ്. കേസുകള്‍ തീരുന്ന മുറയ്ക്ക് ഇവ സര്‍ക്കാരിലേയ്ക്ക് കണ്ടുകെട്ടും.