എസ്എസ്എല്‍സി: വിജയശതമാനം 94.17; സേ പരീക്ഷ 13ന്
Tuesday, April 23, 2013 11:24 PM IST
തിരുവനന്തപുരം: ഈ വര്‍ഷത്തെ എസ്എസ്എല്‍സി പരീക്ഷാ ഫലം വിദ്യാഭ്യാസമന്ത്രി അബ്ദുറബ് പ്രഖ്യാപിച്ചു. 94.17 ശതമാനം വിദ്യാര്‍ഥികളാണ് ഉപരിപഠനത്തിന് അര്‍ഹത നേടിയത്. കഴിഞ്ഞ വര്‍ഷത്തെ അപേക്ഷിച്ച് 0.51 ശതമാനത്തിന്റെ വര്‍ധനവാണ് വിജയ ശതമാനത്തിലുണ്ടായത്. 10,073 വിദ്യാര്‍ഥികള്‍ക്കു എ പ്ളസ് ലഭിച്ചു. മോഡറേഷന്‍ നല്‍കാതെയാണ് വിജയശതമാനം ഇത്രയുമെത്തിയത്. 44,016 പേര്‍ക്ക് ഗ്രേസ് മാര്‍ക്ക് നല്‍കി.

ഗള്‍ഫില്‍ പരീക്ഷ എഴുതിയവരില്‍ 98.8 ശതമാനം പേര്‍ വിജയിച്ചു. ലക്ഷ്വദ്വീപില്‍ പരീക്ഷയെഴുതിയ 74.81 ശതമാനം പേരും ഉപരിപഠനത്തിന് അര്‍ഹത നേടി. 97.74 ശതമാനം വിജയം നേടിയ കോട്ടയമാണ് റവന്യൂ ജില്ലകളില്‍ ഏറ്റവും കൂടുതല്‍ വിജയം നേടിയത്. 98.93 ശതമാനം വിജയം നേടിയ മൂവാറ്റുപുഴയാണ് വിദ്യാഭ്യാസ ജില്ലകളില്‍ ഒന്നാമതെത്തിയത്. പാലക്കാട് ജില്ലയിലാണ് ഏറ്റവും കുറവ് വിജയശതമാനം. 87.99 ശതമാനം പേരാണ് ഇവിടെ വിജയിച്ചത്്.

861 സ്കൂളുകള്‍ നൂറു മേനി വിജയം കൊയ്തു. 272 സര്‍ക്കാര്‍ സ്കൂളുകള്‍ക്ക് നൂറു ശതമാനം വിജയം നേടാന്‍ കഴിഞ്ഞു. എയിഡഡ് മേഖലയില്‍ 327 സ്കൂളുകള്‍ നൂറു മേനി വിജയം സ്വന്തമാക്കി. ഉന്നത പഠനത്തിന് അര്‍ഹത നേടാത്ത വിദ്യാര്‍ഥികള്‍ക്കായി മേയ് 13 മുതല്‍ 18 വരെ സേ പരീക്ഷ നടത്തും. ഇതിനായുള്ള അപേക്ഷ നിലവില്‍ പരീക്ഷ എഴുതിയ കേന്ദ്രത്തിലെ ഹെഡ്മാസ്റ്റര്‍ക്ക് നല്‍കണം. ഉപരി പഠനത്തിന് അര്‍ഹത നേടിയ വിദ്യാര്‍ഥികള്‍ക്ക് മേയ് 15 മുതല്‍ സര്‍ട്ടിഫിക്കറ്റ് വിതരണം ചെയ്യും.

മുന്‍ വര്‍ഷത്തെ അപേക്ഷിച്ച് റെക്കോഡ് വേഗത്തിലാണ് പരീക്ഷാ മൂല്യനിര്‍ണയം പൂര്‍ത്തിയാക്കിയത്. കഴിഞ്ഞ വര്‍ഷം ഏപ്രില്‍ 26നാണ് പരീക്ഷാ ഫലം പ്രഖ്യാപിച്ചത്. ഈ വര്‍ഷം രണ്ടു ദിവസം നേരത്തേ ഫലം പ്രഖ്യാപിച്ചു വിദ്യാഭ്യാസ വകുപ്പ് റെക്കോഡിട്ടു. തിരുവനന്തപുരം പട്ടം സെന്റ് മേരീസ് സ്കൂളിലാണ് ഏറ്റവും കൂടുതല്‍ പേര്‍ പരീക്ഷ എഴുതിയത്. മാര്‍ച്ച് 11 മുതല്‍ 23 വരെയായിരുന്നു എസ്എസ്എല്‍സി പരീക്ഷ നടന്നത്. 335400 സീറ്റുകളാണ് പ്ളസ് വണ്ണിനുള്ളത്.

ടടഘഇ ഞലൌഹ