കെപിസിസി പട്ടിക: എതിർപ്പുമായി രാഹുൽ ഗാന്ധി; സമവായം വേണമെന്ന് ഹൈക്കമാൻഡ്
Sunday, October 22, 2017 12:54 AM IST
ന്യൂഡൽഹി: കെപിസിസി പുനസംഘടനാ പട്ടികയിൽ വിട്ടുവീഴ്ചയ്ക്കു തയാറാകാത്ത എ,ഐ ഗ്രൂപ്പുകൾക്ക് താക്കീതുമായി ഹൈക്കമാൻഡ്. സമവായം ഉണ്ടായില്ലെങ്കിൽ കെപിസിസി പട്ടിക അംഗീകരിക്കില്ലെന്ന് തെരഞ്ഞെടുപ്പ് അതോറിറ്റി മേധാവി മുല്ലപ്പള്ളി രാമചന്ദ്രൻ പറഞ്ഞു. ഇക്കാര്യം കെപിസിസി പ്രസിഡന്‍റ് എം.എം. ഹസനെ അറിയിച്ചതായും അദ്ദേഹം പറഞ്ഞു.

യുവാക്കൾക്കും സ്ത്രീകൾക്കും പട്ടികയിൽ സംവരണം നൽകാത്തതിൽ കോണ്‍ഗ്രസ് ഉപാധ്യക്ഷൻ രാഹുൽ ഗാന്ധി തെരഞ്ഞെടുപ്പ് സമിതിയെ അതൃപ്തി അറിയിച്ചതായാണ് വിവരം. പട്ടിക തയാറാക്കുന്നതിൽ എംപിമാരുടെ നിർദേശങ്ങൾ ഉൾപ്പെടുത്തണമെന്നും നേതാക്കൾ കേരളത്തിന്‍റെ ചുമതലയുള്ള മുകുൾ വാസ്നികുമായി ചർച്ച നടത്തി തീരുമാനമെടുക്കണമെന്നും രാഹുൽ നിർദേശം നൽകി.

അതേസമയം എ, ഐ ഗ്രൂപ്പുകൾ ചേർന്ന് തയാറാക്കിയ 282 പേരുടെ പട്ടിക മാറ്റാൻ കഴിയില്ലെന്നാണ് എ, ഐ ഗ്രൂപ്പ് നേതാക്കളുടെ വാദം. ഇക്കാര്യം കെപിസിസി അധ്യക്ഷൻ എം.എം.ഹസൻ വഴി രമേശ് ചെന്നിത്തലയും ഉമ്മൻ ചാണ്ടിയും ഹൈക്കമാൻഡിനെ അറിയിച്ചിരുന്നു. 282 പേരുടെ പട്ടികയ്ക്ക് പുറമേ ഹൈക്കമാൻഡിന് ആവശ്യമെങ്കിൽ കൂടുതൽ പേരെ ചേർക്കാമെന്ന നിലപാടിലാണ് ഗ്രൂപ്പുകൾ.

ഗ്രൂപ്പുകൾ കെപിസിസി ഭാരവാഹി പട്ടികയിൽ ഇഷ്ടക്കാരെ കുത്തിക്കയറ്റിയെന്ന വ്യാപക പരാതി ഹൈക്കമാൻഡിന് നേരത്തേ ലഭിച്ചിരുന്നു. എംപിമാരായ കെ.സി.വേണുഗോപാൽ, കൊടിക്കുന്നിൽ സുരേഷ്, കെ.വി.തോമസ് തുടങ്ങിയ നേതാക്കളാണ് പരാതിയുമായി കേന്ദ്ര നേതൃത്വത്തിന് മുന്നിലെത്തിയത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.