കുരിശുനീക്കൽ; കുരുക്കിലായി സിപിഎം
Friday, April 21, 2017 10:54 AM IST
കോട്ടയം: പാപ്പോത്തിച്ചോലയിലെ കൈയേറ്റം ഒഴിപ്പിക്കുകയും സ്പിരിറ്റ് ഇൻ ജീസസ് എന്ന സംഘടനയുടെ മറവിൽ ചിലർ സ്ഥാപിച്ച കുരിശുനീക്കം ചെയ്യുകയും ചെയ്ത സംഭവത്തിൽ കുരുക്കിലായി സിപിഎം. കുരിശു പൊളിച്ചുനീക്കിയതിനെതിരേ പൊട്ടിത്തെറിച്ചു കൊണ്ടാണ് സിപിഎം പ്രാദേശിക നേതൃത്വം ആദ്യം രംഗത്തുവന്നത്. വൈകാതെ മുഖ്യമന്ത്രിയും ഒഴിപ്പിക്കലിനെതിരേ രോഷംകൊണ്ടു. ജില്ലാ ഭരണകൂടത്തെ അതൃപ്തി അറിയിച്ചതായി അദ്ദേഹം പരസ്യമായി പറയുകയും ചെയ്തു. ക്രൈസ്തവ സഭകളോ വിശ്വാസികളോ ഇക്കാര്യത്തിൽ പ്രതികരണമോ പ്രതിഷേധമോ അറിയിക്കുന്നതിനു മുന്പേയായിരുന്നു സിപിഎമ്മിന്‍റെ കടുത്ത രോഷപ്രകടനം.

കുരിശുനീക്കം ചെയ്തതു മതവികാരം വ്രണപ്പെടുത്തുന്ന നടപടിയാണെന്നു സിപിഎം പ്രാദേശിക നേതൃത്വം കുറ്റപ്പെടുത്തി. എന്നാൽ, കൈയേറ്റ ഭൂമിയിൽ സ്ഥാപിച്ച കുരിശു നീക്കം ചെയ്തതിനോടു ക്രൈസ്തവ സഭകൾ കാര്യമായ എതിർപ്പു പ്രകടിപ്പിച്ചില്ല. കുരിശുനീക്കം ചെയ്തതിനെ മതമേലധ്യക്ഷൻമാരിൽ ചിലർ പരസ്യമായി സ്വാഗതം ചെയ്യുകയും ചെയ്തു. മണ്ണുമാന്തി ഉപയോഗിച്ചു കുരിശുനീക്കം ചെയ്ത രീതിയോടു മാത്രമായിരുന്നു ചിലർക്കെങ്കിലും വിയോജിപ്പ്.

കൈയേറ്റഭൂമിയിലെ കുരിശു നീക്കം ചെയ്തതിനോടു ക്രൈസ്തവ സഭകൾക്കും വിശ്വാസികൾക്കുമില്ലാത്ത വിഷമമാണ് സിപിഎം നേതാക്കൾ പ്രകടിപ്പിച്ചതെന്ന വിമർശനം ശക്തമായതോടെയാണ് പാർട്ടി പ്രതിരോധത്തിലായത്. സിപിഐയുടെ നിയന്ത്രണത്തിലുള്ള റവന്യൂവകുപ്പ് മൂന്നാറിൽ നടത്തിവരുന്ന ഒഴിപ്പിക്കൽ നടപടികളെ കർശനമായി എതിർക്കുന്ന നിലപാടാണ് സിപിഎം പ്രാദേശിക നേതൃത്വം സ്വീകരിച്ചിരുന്നത്. സിപിഎം നേതാക്കളിൽ ചിലർ കൈയേറ്റം നടത്തിയെന്ന ആരോപണവും ശക്തമായതോടെ ഈ വിഷയത്തിൽ സിപിഎം-സിപിഐ പോരു കനത്തിരുന്നു.

ഇതിനിടെയിലാണ് റവന്യൂവകുപ്പ് രഹസ്യനീക്കത്തിലൂടെ പാപ്പോത്തിച്ചോലയിലെ കൈയേറ്റം ഒഴിപ്പിച്ചത്. ഇതോടെ കുരിശുവിഷയം ഉയർത്തി സിപിഎം രംഗത്തുവരികയായിരുന്നു. സർക്കാരുമായി ആലോചിക്കാതെയാണ് കുരിശു പൊളിച്ചുനീക്കിയതെന്നാണു മുഖ്യമന്ത്രി പ്രതികരിച്ചത്. എന്നാൽ, മുഖ്യമന്ത്രിയും ഇതരവകുപ്പുകളും അറിഞ്ഞു തന്നെയാണ് കൈയേറ്റം ഒഴിപ്പിച്ചതെന്ന നിലപാടിൽ ഉറച്ചുനിൽക്കുകയാണ് സിപിഐയും റവന്യൂവകുപ്പും.

മൂന്നാറിലെ ഒഴിപ്പിക്കൽ നടപടികളെ പ്രതിരോധിക്കാനുള്ള തന്ത്രപരമായ നീക്കമാണ് സിപിഎം നടത്തിയതെന്ന ആരോപണമാണ് ഉയർന്നിരിക്കുന്നത്. സോഷ്യൽ മീഡിയയിലും ഈ വിഷയത്തിൽ സിപിഎമ്മിനെതിരേ രൂക്ഷ വിമർശനം ഉയരുന്നുണ്ട്. ഇതിനിടെ, കുരിശുനീക്കിയതിനെതിരേ യുഡിഎഫും രംഗത്തുവന്നു. കുരിശുനീക്കിയ രീതി വിശ്വാസികൾക്കു പ്രയാസമുണ്ടാക്കിയെന്ന് യുഡിഎഫ് കണ്‍വീനർ പി.പി.തങ്കച്ചൻ പ്രതികരിച്ചു. എന്നാൽ, മുഖ്യമന്ത്രി അറിയാതെയാണ് ഇതു സംഭവിച്ചതെന്നു പറഞ്ഞാൽ വിശ്വസനീയമല്ലെന്നും അദ്ദേഹം കൂട്ടിച്ചേർത്തു.

സ്പിരിറ്റ് ഇൻ ജീസസ് എന്ന സംഘടനയുമായി മുഖ്യമന്ത്രിക്ക് എന്ത് ബന്ധമാണെന്ന് ബിജെപി സംസ്ഥാന അധ്യക്ഷൻ കുമ്മനം രാജശേഖരൻ ചോദിച്ചു. കൈയേറ്റ ഭൂമിയിൽ ഒരു സംഘടന സ്ഥാപിച്ച കുരിശ് മാറ്റിയത് മതമേലധ്യക്ഷൻമാർ സ്വാഗതം ചെയ്തപ്പോഴാണ് മുഖ്യമന്ത്രിക്ക് വേദനിച്ചത്. തിരുകേശത്തെ ബോഡി വേസ്റ്റ് എന്നു വിളിച്ചപ്പോഴും ശ്രീ നാരായണ ഗുരുവിനെ അപമാനിച്ചപ്പോഴും തോന്നാത്ത വികാരമാണ് പിണറായിക്ക് ഇപ്പോൾ ഉണ്ടായിരിക്കുന്നതെന്നും കുമ്മനം പരിഹസിച്ചു.
RELATED NEWS