സ്വാശ്രയ മെഡിക്കൽ പ്രവേശനം: സമഗ്ര നിയമം നിർമിക്കുമെന്നു സർക്കാർ
Monday, March 20, 2017 6:16 PM IST
തിരുവനന്തപുരം: സ്വാശ്രയ മെഡിക്കൽ പ്രവേശനം സംബന്ധിച്ച സുപ്രീംകോടതിയുടെ വിധിയുടെ പശ്ചാത്തലത്തിൽ സമഗ്രമായ നിയമ നിർമാണം കൊണ്ടുവരുമെന്നു സർക്കാർ. വരുംവർഷത്തെ വിദ്യാർഥി പ്രവേശനം ചർച്ച ചെയ്യാൻ ചേർന്ന രാഷ്ട്രീയപാർട്ടി പ്രതിനിധികളുടെ യോഗത്തിലാണ് ഇതുസംബന്ധിച്ചു തീരുമാനം കൈക്കൊണ്ടത്.

മുഴുവൻ സീറ്റിലും മെറിറ്റ് അടിസ്ഥാനത്തിൽ അഖിലേന്ത്യാ പ്രവേശന പരീക്ഷാ റാങ്ക് ലിസ്റ്റിൽനിന്നും (നീറ്റ്) മാത്രമേ പ്രവേശനം നടത്താൻ പാടുള്ളൂവെന്നും ഏകീകരിച്ച ഫീസ് മാത്രമേ വിദ്യാർഥികളിൽനിന്ന് ഈടാക്കാൻ പാടുള്ളൂ എന്നുമാണ് സുപ്രീം കോടതി വിധി. ഫീസ് നിശ്ചയിക്കേണ്ടത് ഫീ റഗുലേറ്ററി കമ്മിറ്റിയാണ്. സംസ്ഥാനത്ത് മുൻ വർഷങ്ങളിൽ 50 ശതമാനം മെറിറ്റ് സീറ്റും 50 ശതമാനം മാനേജ്മെന്‍റ് സീറ്റും എന്ന നിലയായിരുന്നു വിദ്യാർഥി പ്രവേശനം. മെറിറ്റ് സീറ്റിൽ കുറഞ്ഞ ഫീസും മാനേജ്മെന്‍റ് സീറ്റിൽ കൂടിയ ഫീസുമായിരുന്ന ഘടന. ഈ വ്യത്യാസം പാടില്ല എന്ന് സുപ്രീം കോടതി നിഷ്കർഷിച്ചിട്ടുണ്ട്. എൻആർഐ അടക്കമുളള എല്ലാ സീറ്റുകളിലും അഖിലേന്ത്യാ പ്രവേശന പരീക്ഷ നിർബന്ധമാക്കുകയും സംവരണതത്വം പാലിച്ചുകൊണ്ട് നീറ്റിലെ മെറിറ്റ് അടിസ്ഥാനത്തിൽ കേന്ദ്രീകൃത അലോട്ട്മെന്‍റ് നിർബന്ധിതമാക്കുകയും ചെയ്തിട്ടുണ്ട്. അതുകൊണ്ടുതന്നെ സ്വകാര്യ മാനേജ്മെന്‍റുകളുമായി സംസ്ഥാന സർക്കാർ സീറ്റ് ഷെയറിംഗിലും ഫീസിലും ധാരണയുണ്ടാക്കി പ്രവേശനം നടത്തുന്ന രീതി ഈ വർഷം അനുവദനീയമല്ല.

ചർച്ചയിൽ പങ്കെടുത്ത എല്ലാ രാഷ്ട്രീയപാർട്ടികളും പൂർണമായും മെറിറ്റ് അടിസ്ഥാനത്തിൽ ആയിരിക്കണം പ്രവേശനമെന്നും ഏകീകരിച്ച ഫീസ് സന്പ്രദായം ഏർപ്പെടുത്തുന്പോൾ സാന്പത്തികമായി പിന്നോക്കം നിൽക്കുന്ന വിദ്യാർഥികൾക്ക് പഠിക്കാനുളള അവസരം ലഭിക്കുന്ന വിധത്തിൽ അനുയോജ്യമായ ക്രമീകരണം സർക്കാർ ഉണ്ടാക്കണമെന്നും നിർദ്ദേശിച്ചു. നിയമനിർമാണം അടക്കമുളള നടപടികൾ സ്വീകരിക്കണമെന്നും നിർദേശിച്ചു. ഇക്കാര്യത്തിൽ മാനേജ്മെന്‍റുകളുമായി ചർച്ച നടത്തുകയും രാഷ്ട്രീയ പാർട്ടി പ്രതിനിധികൾ അഭിപ്രായപ്പെട്ടതുപോലെ ഉയർന്നുവന്ന നിർദ്ദേശങ്ങൾ കൂടി പരിഗണിച്ചുകൊണ്ട് സമഗ്രമായ ഒരു നിയമനിർമാണം കൊണ്ടുവരുമെന്നും സർക്കാർ വ്യക്തമാക്കി.