സുധീരൻ മാറിയത് മാറ്റുന്നതിനുമുന്പ്; പിടികൊടുക്കാതെ ഉമ്മൻചാണ്ടി,Oommen Chandy eludes KPCC president post, VM Sudheeran's resignation, MJ Sreejith, Ramesh Chennithala

എം.ജെ ശ്രീജിത്ത്

തിരുവനന്തപുരം: പുതിയ കെപിസിസി പ്രസിഡന്‍റിനെക്കുറിച്ചുള്ള ചർച്ചകൾ സജീവമാകുന്പോഴും പിടികൊടുക്കാതെ ഉമ്മൻചാണ്ടി. പ്രതിപക്ഷ നേതാവ് ഐ ഗ്രൂപ്പിൽ നിന്ന് രമേശ് ചെന്നിത്തലയായതിനാൽ കെപിസിസി പ്രസിഡന്‍റ് സ്ഥാനം തങ്ങൾക്കു വേണമെന്ന ശക്തമായ നിലപാടിലാണ് എ ഗ്രൂപ്പ്. ഇതിനോട് ഐയിൽ നിന്ന് കാര്യമായ എതിർപ്പ് ഉയരാനിടയുമില്ല. ഉമ്മൻചാണ്ടി കെപിസിസി പ്രസിഡന്‍റാകണമെന്ന വികാരമാണ് എ ഗ്രൂപ്പിൽ. ഉമ്മൻചാണ്ടി ഇതിന് തയാറായാൽ ഐയിൽ നിന്ന് എതിർപ്പുയരില്ല. ഇതിനോട് ഉമ്മൻചാണ്ടി പക്ഷെ ഇതുവരേയും അനൂകൂലമായി പ്രതികരിച്ചിട്ടില്ല. കഴിഞ്ഞ ദിവസം നടന്ന ഉമ്മൻചാണ്ടി-ചെന്നിത്തല കൂടിക്കാഴ്ചയിലും ഇതു ചർച്ചയായിരുന്നു.

കെപിസിസി പ്രസിഡന്‍റ് സ്ഥാനം ഏറ്റെടുക്കണമെന്ന ആവശ്യം ചെന്നിത്തല ഉമ്മൻചാണ്ടിയോട് മുന്നോട്ടു വച്ചിട്ടുണ്ട്. എന്നാൽ ഇതിനോട് അനുകൂലമായോ പ്രതികൂലമായോ ഉമ്മൻചാണ്ടി പ്രതികരിച്ചില്ല. സംഘടനാ തിരഞ്ഞെടുപ്പിലൂടെ കെപിസിസി പ്രസിഡന്‍റാകുന്നതിനോട് ഉമ്മൻചാണ്ടിക്ക് എതിർപ്പില്ലെന്ന് അറിയുന്നു. സംഘടനാ തെരഞ്ഞെടുപ്പെന്ന ആവശ്യം ഉമ്മൻചാണ്ടി ശക്തമായി ഉന്നയിക്കുകയും ഇതിലൂന്നി പാർട്ടി പരിപാടികളിൽ നിന്നും രാഷ്ട്രീയകാര്യ സമതിയിൽ നിന്നും വിട്ടു നിൽക്കുകയും ചെയ്തിരുന്നു.

ഹൈക്കമാൻഡുമായും ഇക്കാര്യത്തിൽ അഭിപ്രായ ഭിന്നത ഉടലെടുത്തതിനെത്തുടർന്ന് ഡൽഹി യാത്രകളിൽ നിന്ന് വിട്ടുനിന്നിരുന്നു. ഹൈക്കമാൻഡ് പ്രതിനിധികൾ ഉമ്മൻചാണ്ടിയുമായി പലവട്ടം ചർച്ച നടത്തി ഒടുവിൽ സംഘടനാ തെരഞ്ഞെടുപ്പെന്ന ആവശ്യത്തിൽ അനുകൂല തീരുമാനം അറിയിക്കുകയും ചെയ്തിരുന്നു. യുപി തെരഞ്ഞെടുപ്പു കഴിഞ്ഞിട്ട് ഇക്കാര്യത്തിൽ തീരുമാനമെടുക്കാമെന്നാണ് ഉമ്മൻചാണ്ടിക്ക് ഡൽഹിയിൽ വച്ചു നടന്ന അവസാന ചർച്ചയിൽ ഹൈക്കമാൻഡ് ഉറപ്പു നൽകിയിരുന്നത്. ഇതിന്‍റെ പശ്ചാലത്തിൽ കെപിസിസി പ്രസിഡന്‍റായിരുന്ന വി.എം സുധീരനെ മാറ്റുമെന്ന സൂചന പുറത്തുവന്നിരുന്നു. ഇതു മുൻകൂട്ടികണ്ടാണ് അദ്ദേഹം സ്ഥാനം ഒഴിഞ്ഞതെന്ന അഭ്യൂഹം ശക്തമാണ്.

സംഘടനാ തെരഞ്ഞെടുപ്പു വേഗത്തിൽ നടത്തുകയും ഇതിലൂടെ പ്രസിഡന്‍റാകാനുള്ള സാഹചര്യം ഉണ്ടാകുകയും ചെയ്താൽ ഉമ്മൻചാണ്ടി സ്ഥാനം ഏറ്റെടുക്കുമെന്ന കൃത്യമായ സൂചന തന്നെയാണ് അദ്ദേഹവുമായി അടുത്ത വൃത്തങ്ങൾ നൽകുന്നത്. ഇങ്ങനെ ഒരു സാഹചര്യം ഉണ്ടായില്ലെങ്കിൽ അദ്ദേഹം ഇതിനു തയാറാകില്ലെന്നും എ ഗ്രൂപ്പ് പറയുന്നു. താത്കാലിക ചുമതലയിൽ അദ്ദേഹത്തെ ഇരുത്തുന്നതിൽ എ ഗ്രൂപ്പിൽ ഭൂരിപക്ഷം പേർക്കും താത്പര്യമില്ല. ഉമ്മൻചാണ്ടി തയാറായില്ലെങ്കിൽ മാത്രമേ എ ഗ്രൂപ്പിൽ നിന്ന് മാറ്റാരെന്ന ചോദ്യത്തിന് പ്രസക്തിയുള്ളു. എം.എം ഹസൻ,പി.ടി തോമസ്, കെ.സി ജോസഫ്, തിരുവഞ്ചൂർ രാധാകൃഷ്ണൻ തുടങ്ങിയ പേരുകൾ പരിഗണനയിലുണ്ട്.

കെ. മുരളീധരനെ പ്രസിഡന്‍റാക്കാമെന്ന ചർച്ച വന്നാൽ എ ഇതിനെ പിന്തുണയ്ക്കും. ഐയിൽ നിന്നുള്ള ആരുടെയെങ്കിലും പേരാണ് ഹൈക്കമാൻഡിൽ നിന്ന് വന്നാൽ എതിർക്കാനും തീരുമാനിച്ചിട്ടുണ്ട്. താത്കാലിക പ്രസിഡന്‍റു സ്ഥാനത്തേക്ക് എം.എം ഹസനെ നിർദ്ദേശിക്കാനാണ് എ ഗ്രൂപ്പ് തീരുമാനിച്ചിരിക്കുന്നത്. സംഘടനാ തെരഞ്ഞെടുപ്പെന്ന ആവശ്യത്തോട് ഐ ഗ്രൂപ്പും അനുകൂലമാണ്. വിദേശത്തു ചികിത്സയ്ക്കായി പോയിരിക്കുന്ന കോണ്‍ഗ്രസ് അധ്യക്ഷ സോണിയ ഗാന്ധിയെ കാണാൻ ഉപാധ്യക്ഷൻ രാഹുൽ ഗാന്ധിയും വിദേശത്തേക്ക് പോയ സാഹചര്യത്തിൽ പുതിയ കെപിസിസി പ്രസിഡന്‍റിന്‍റെ കാര്യത്തിലും സുധീരന്‍റെ രാജി സ്വീകരിക്കുന്നതിലും അനിശ്ചിതത്വം തുടരുകയാണ്.

ഈ മാസം 22നു ശേഷമേ രാഹുൽ തിരികെ വരുകയുള്ളുവെന്ന സൂചനയാണ് അദ്ദേഹത്തിന്‍റെ ഓഫീസ് നൽകുന്നത്. മലപ്പുറം ഉപതെരഞ്ഞെടുപ്പിന്‍റെ പശ്ചാത്തലത്തിൽ തീരുമാനം നീട്ടിക്കൊണ്ടുപോകാനും ഹൈക്കമാൻഡിനു കഴിയില്ല. മലപ്പുറം ഉപതെരഞ്ഞെടുപ്പു കഴിഞ്ഞ് സംഘടനാ തെരഞ്ഞെടുപ്പെന്ന ധാരണയിലാണ് നേതൃത്വം എത്തിനിൽക്കുന്നതെന്ന് അറിയുന്നു.