സിറിയയില്‍ സൈന്യം നിരവധി ഭീകരരെ വധിച്ചു,

Click here for detailed news of all items

സിറിയയില്‍ സൈന്യം നിരവധി ഭീകരരെ വധിച്ചു

Thursday, February 16, 2017 6:12 PM IST

ഡമാസ്‌കസ്: സിറിയയിലെ വിവിധ നഗരങ്ങളില്‍ വ്യാഴാഴ്ച സൈന്യം നടത്തിയ ആക്രമണങ്ങളില്‍ നിരവധി ഭീകരർ കൊല്ലപ്പെട്ടു. ഡറാ, ഇഡ്‌ലിബ്, ഡെര്‍ എസര്‍ തുടങ്ങിയ നഗരങ്ങളിലെ ഭീകര ക്യാമ്പുകള്‍ കേന്ദ്രീകരിച്ചു സേന നടത്തിയ ആക്രമണങ്ങളിലാണു ഭീകരരെ വധിച്ചത്. നിരവധി ഭീകരര്‍ക്കു പരിക്കേറ്റു. ഭീകരരുടെ വാഹനങ്ങളും ആയുധശേഖരവും സൈന്യം തകര്‍ത്തതായും പ്രാദേശിക മാധ്യമം സനാ റിപ്പോര്‍ട്ട് ചെയ്തു.

ഡറായിലെ അല്‍-ബലാദില്‍ ജബ്ഹത് അല്‍-നുസ്‌റാ ഭീകരരെ ലക്ഷ്യമിട്ടാണു സൈന്യം ആക്രമണം നടത്തിയത്. ആക്രമണത്തില്‍ നിരവധി ഭീകരരും അല്‍-നുസ്‌റാ നേതാവ് മുഹമ്മദ് അല്‍-ഫറാജും കൊല്ലപ്പെട്ടു.

ഇഡ്‌ലിബിലുള്ള ജബ്ഹത് അല്‍-നുസ്‌റാ ഭീകരരെയും മറ്റു ഭീകര സംഘടനകളെയും ലക്ഷ്യമിട്ട് സൈന്യം പ്രദേശത്ത് ഷെല്ലാക്രമണം നടത്തുകയായിരുന്നു. ആക്രമണത്തില്‍ 14 ഭീകരര്‍ കൊല്ലപ്പെട്ടു. ഭീകരരുടെ യന്ത്രതോക്കുകളും കാറുകളും സൈന്യം നശിപ്പിച്ചതായും സൈനിക വക്താവ് അറിയിച്ചു.

ഡെര്‍ എസറില്‍ ഐഎസിനെ ലക്ഷ്യമിട്ടാണു സൈനികര്‍ ആക്രമണം നടത്തിയത്. ആക്രമണത്തില്‍ ഐഎസ് നേതാവ് അബു അല്‍-സുബീര്‍ അല്‍-ടുന്‍സിയും അദേഹത്തിന്‍റെ അനുയായി അബു മേഹിനും കൊല്ലപ്പെട്ടു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.