ഐഎഎസ് ഉദ്യോഗസ്‌ഥർക്ക് ഒരബദ്ധം പറ്റി, അവർ അത് തിരുത്തി: മുഖ്യമന്ത്രി
Wednesday, January 11, 2017 7:41 PM IST
തിരുവനന്തപുരം: ഐഎഎസുകാരും സർക്കാരുമായി പ്രശ്നങ്ങളില്ലെന്ന് മുഖ്യമന്ത്രി പിണറായി വിജയൻ. ഐഎഎസ് ഉദ്യോഗസ്‌ഥർക്ക് ഒരബദ്ധം പറ്റി. അവർ അത് തിരുത്താനും തയാറായി. ഐഎഎസുകാരുടെ വികാരം തെറ്റാണെന്ന് അവരെ ബോധ്യപ്പെടുത്തി. ഉദ്യോഗസ്‌ഥരുമായി സംസാരിച്ച് പ്രശ്നം പരിഹരിച്ചതാണെന്നും പിണറായി പറഞ്ഞു. അഴിമതിക്കേസുകളിൽ സർക്കാർ ഇടപെടില്ലെന്നും കേന്ദ്രസർക്കാർ നയങ്ങളാണ് റേഷൻ പ്രതിസന്ധിക്കു കാരണമെന്നും പിണറായി വ്യക്‌തമാക്കി.

നേരത്തെ, പരാതിപ്പെടാനെത്തിയ ഐഎഎസ് ഉദ്യോഗസ്ഥരെ മുഖ്യമന്ത്രി പിണറായി വിജയൻ താക്കീത് ചെയ്തിരുന്നു. ഐഎഎസുകാരെ അനാവശ്യമായി വിജിലൻസ് കേസുകളിൽപ്പെടുത്തുന്നതിൽ പ്രതിഷേധിച്ചു മുഖ്യമന്ത്രിയെ കാണാനെത്തിയ ചീഫ് സെക്രട്ടറിയെ മറ്റ് ഉദ്യോഗസ്ഥരുടെ മുന്നിൽവച്ചു മുഖ്യമന്ത്രി ശകാരിച്ചതിൽ പ്രതിഷേധിച്ചു ചീഫ് സെക്രട്ടറി രാജിക്കൊരുങ്ങിയെന്നും റിപ്പോർട്ടുകൾ പുറത്തുവന്നു.

മുൻ മന്ത്രി ഇ.പി.ജയരാജൻ ഉൾപ്പെട്ട ബന്ധുനിയമന കേസുമായി ബന്ധപ്പെട്ടു വ്യവസായ അഡീഷണൽ ചീഫ് സെക്രട്ടറി പോൾ ആന്റണിയെ പ്രതിയാക്കിയ വിജിലൻസ് ഡയറക്ടർ ജേക്കബ് തോമസിന്റെ നിലപാടിനെതിരേ അവധിയെടുത്തു പ്രതിഷേധിക്കാനുള്ള ഐഎഎസ് ഉദ്യോഗസ്ഥരുടെ തീരുമാനമാണു മുഖ്യമന്ത്രിയുടെ ശാസനയ്ക്ക് ഇടയാക്കിയത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.