ഓസീസ് ടീം ബസിനു നേരെ ഉണ്ടായ ആക്രമണം അപമാനകരമെന്ന് മിതാലി രാജ്
Thursday, October 12, 2017 1:43 AM IST
ന്യൂഡൽഹി: ഓസ്ട്രേലിയൻ ക്രിക്കറ്റ് ടീം അംഗങ്ങൾ സഞ്ചരിച്ച ബസിനു നേരെ ഉണ്ടായ ആക്രമണം അപമാനകരമായ സംഭവമാണെന്ന് ഇന്ത്യൻ വനിതാ ക്രിക്കറ്റ് ടീം ക്യാപ്റ്റൻ മിതാലി രാജ്. ഏത് കായിക മത്സരമായാലും അതിലെ ജയപരാജയങ്ങളെ സ്പോർട്സ്മാൻ സ്പിരിറ്റിൽ കാണണമെന്നും അതിവൈകാരികതയോടെ മത്സരങ്ങളെ സമീപിക്കരുതെന്നും പറഞ്ഞ മിതാലി ബസിനു നേരെ ഉണ്ടായ കല്ലേറ് രാജ്യത്തെ കായിക രംഗത്തിനു തന്നെ അപമാനമാണെന്നും കൂട്ടിച്ചേർത്തു.

ചൊവ്വാഴ്ച ഗോഹട്ടിയിൽ നടന്ന, ഇന്ത്യ-ഓസ്ട്രേലിയ ട്വന്‍റി-20 പരമ്പരയിലെ രണ്ടാം മത്സരത്തിനു ശേഷം മടങ്ങവേയാണ് ഓസീസ് ടീം അംഗങ്ങൾ സഞ്ചരിച്ച ബസിനു നേരെ കല്ലേറുണ്ടായത്. മത്സരത്തിൽ ഓസീസ് ഇന്ത്യയെ എട്ടു വിക്കറ്റിന് പരാജയപ്പെടുത്തിയിരുന്നു.

ഓസ്ട്രേലിയൻ ബാറ്റ്സ്മാൻ ആരോൺ ഫിഞ്ചാണ് ബസിന്‍റെ ഗ്ലാസുകൾ കല്ലേറിൽ തകർന്ന വിവരം ട്വിറ്ററിലൂടെ പങ്കുവച്ചത്. രണ്ടു മാസത്തിനിടെ ഇത് രണ്ടാം തവണയാണ് ഓസീസ് ടീം ബസിനു നേരെ കല്ലേറുണ്ടാകുന്നത്. സെപ്റ്റംബറിൽ ബംഗ്ലാദേശിനെതിരായ മത്സരം കഴിഞ്ഞ് മടങ്ങുന്നതിനിടെ ചിറ്റഗോംഗിൽ വച്ചും ആക്രമണമുണ്ടായിരുന്നു.




മൂന്ന് മത്സരങ്ങളുള്ള ട്വന്‍റി-20 പരമ്പരയിലെ ആദ്യ മത്സരം ഇന്ത്യ വിജയിച്ചിരുന്നു. വെള്ളിയാഴ്ച ഹൈദരാബാദിലാണ് പരമ്പരയിലെ അവസാന മത്സരം നടക്കുക.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.