നദാല്‍-ജോക്കോവിച്ച് ഫൈനല്‍
ന്യൂയോര്‍ക്ക്: യുഎസ് ഓപ്പണ്‍ പുരുഷ വിഭാഗം ഫൈനലില്‍ ലോക ഒന്നാം നമ്പര്‍ താരം സെര്‍ബിയയുടെ നൊവാക് ജോക്കോവിച്ച് ലോക രണ്ടാം റാങ്ക് സ്പെയിനിന്റെ റാഫേല്‍ നദാലിനെ നേരിടും. ജോക്കോവിച്ച് സെമിയില്‍ സ്വിറ്റ്സര്‍ലന്‍ഡിന്റെ സ്റ്റാനിസ്ലാസ് വാവ്റിങ്കയെ തോല്‍പിച്ച് ഫൈനലിലെത്തിയപ്പോള്‍ നദാല്‍ ഫ്രാന്‍സിന്റെ റിച്ചാര്‍ഡ് ഗസ്കെറ്റിനെ മറികടന്ന് കലാശപ്പോരാട്ടത്തിനു യോഗ്യത നേടി.

നാലു മണിക്കൂറിലേറെ സമയം നീണ്ടുനിന്ന മത്സരത്തിലാണ് ജോക്കോവിച്ചിന് വാവ്റിങ്കയെ കീഴടക്കാന്‍ കഴിഞ്ഞത്. പോരാട്ടം അഞ്ചു സെറ്റ് നീണ്ടു. സ്കോര്‍: 2-6, 7-6, 3-6, 6-3, 6-4. ഇരുവരും ഒപ്പത്തിനൊപ്പം പോരാടിയ മത്സരം ആവേശകരമായി. ആദ്യ സെറ്റ് അനായാസം സ്വന്തമാക്കിയ വാവ്റിങ്കയ്ക്ക് രണ്ടാം സെറ്റില്‍ അടിപതറി. ടൈബ്രേക്കറിലേക്കു നീങ്ങിയ രണ്ടാം സെറ്റ് ലോക ഒന്നാം നമ്പര്‍ താരം സ്വന്തമാക്കി. എന്നാല്‍, മൂന്നാം സെറ്റ് വാവ്റിങ്ക തിരിച്ചുപിടിച്ചതോടെ മത്സരത്തിനു മൂര്‍ച്ചയേറി. നിര്‍ണായകമായ നാലാം സെറ്റില്‍ വാവ്റിങ്കയെ അനായാസം കീഴടക്കി ജോക്കോവിച്ച് ശക്തമായി തിരിച്ചെത്തി. വിജയിയെ നിര്‍ണയിക്കുന്നതിനുള്ള അഞ്ചാം സെറ്റ് ജോക്കോവിച്ച് കൈപ്പിടിയിലൊതുക്കി. അഞ്ചാം സെറ്റിലെ മൂന്നാം ഗെയിം 21 മിനിറ്റ് നീണ്ടു. തുടര്‍ച്ചയായ നാലാം തവണ യുഎസ് ഓപ്പണ്‍ ഫൈനലില്‍ കടന്ന ജോക്കോവിച്ചിന്റെ പന്ത്രണ്ടാം ഗ്രാന്‍ഡ്സ്ലാം ഫൈനലാണ് ഇന്നു നടക്കുന്നത്. ജോക്കോവിച്ച് 38 വിന്നേഴ്സാണ് നേടിയത്. എന്നാല്‍, 46 അണ്‍ഫോഴ്സ്ഡ് എററുകള്‍ വരുത്തി.


അനായാസ ജയത്തോടെയാണു നദാലിന്റെ ഫൈനലിലേക്കുള്ള പ്രവേശനം. എതിരാളി റിച്ചാര്‍ഡ് ഗസ്കെറ്റിനെ മറികടക്കാന്‍ മൂന്നു സെറ്റ് മാത്രമേ നദാലിനു വേണ്ടിവന്നുള്ളു. സ്കോര്‍: 6-4, 7-6, 6-2. നദാലിന്റെ ഫൈനലിലേക്കുള്ള പ്രയാണത്തില്‍ ഒരിക്കല്‍ മാത്രമേ മത്സരം നാലു സെറ്റിലേക്കു കടന്നിട്ടുള്ളു. ഗസ്കെറ്റിന്റെ സര്‍വ് ബ്രേക്ക് ചെയ്തു കൊണ്ടാണ് നദാല്‍ തുടങ്ങിയത്. എന്നാല്‍, നദാലിന്റെ സര്‍വ് ബ്രേക്ക് ചെയ്തുകൊണ്ട് ഫ്രഞ്ച് താരം തിരിച്ചടിച്ചു.

89 ഗെയിമുകള്‍ക്കു ശേഷം ആദ്യമായാണ് നദാലിനെ ബ്രേക്ക് ചെയ്യാന്‍ എതിരാളിക്കു കഴിഞ്ഞത്. പരിക്കിനെത്തുടര്‍ന്ന് കഴിഞ്ഞവര്‍ഷത്തെ യുഎസ് ഓപ്പണ്‍ നദാലിനു നഷ്ടമായിരുന്നു. പരിക്കില്‍നിന്നു മുക്തനായി തിരിച്ചെത്തിയ സ്പാനിഷ് താരം ഹാര്‍ഡ് കോര്‍ട്ടില്‍ നടന്ന 21 മത്സരങ്ങളില്‍ തോല്‍വി അറിഞ്ഞിട്ടില്ല. നദാല്‍ 35 വിന്നേഴ്സ് പായിച്ചപ്പോള്‍ 26 എണ്ണം ഗസ്കെറ്റും പായിച്ചു. 24 അണ്‍ഫോഴ്സ്ഡ് എററുകളാണ് നദാല്‍ വരുത്തിയത്.

യുഎസ് ഓപ്പണില്‍ നാലു വര്‍ഷത്തിനിടെ നദാലും ജോക്കോവിച്ചും മൂന്നാം ഫൈനലിലാണ് മാറ്റുരയ്ക്കുന്നത്. ഇതില്‍ 2010ല്‍ നദാല്‍ കിരീടം നേടിയപ്പോള്‍ 2011ലെ കിരീടം ജോക്കോവിച്ചിനായിരുന്നു. ഇരുവരും 36 തവണ ഏറ്റുമുട്ടിയപ്പോള്‍ 21 വിജയങ്ങള്‍ നദാലിനൊപ്പവും 15 എണ്ണം ജോക്കോവിച്ചിനൊപ്പവും നിന്നു. നദാല്‍ പന്ത്രണ്ട് ഗ്രാന്‍ഡ്സ്ലാം കിരീടങ്ങളില്‍ മുത്തമിട്ടപ്പോള്‍ ആറ് ഗ്രാന്‍ഡ് സ്ലാം കിരീടങ്ങള്‍ ജോക്കോവിച്ചിനുണ്ട്. ഇന്നാണു ഫൈനല്‍.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.