നാല്പതാം പിറന്നാളിലും സച്ചിന്‍ ക്രീസില്‍
കോല്‍ക്കത്ത: 24 വര്‍ഷം മുന്‍പ,് 1989 ല്‍ ഇന്ത്യന്‍ ക്രിക്കറ്റിന്റെ ആകാശത്തുദിച്ച സച്ചിന്‍ തെണ്ടുല്‍ക്കര്‍ എന്ന നക്ഷത്രം ഇന്ന് ഐപിഎലില്‍ കോല്‍ക്കത്ത നൈറ്റ് റൈഡേഴ്സിനെതിരേ കളിക്കാനിറങ്ങുന്നത് തന്റെ നാല്‍പതാം പിറന്നാള്‍ ദിനത്തില്‍. ഈഡന്‍ഗാര്‍ഡന്‍സില്‍ രാത്രി എട്ടിനു നടക്കുന്ന പോരാട്ടത്തില്‍ മുംബൈ ഇന്ത്യന്‍സും കോല്‍ക്കത്ത നൈറ്റ് റൈഡേഴ്സും ഏറ്റുമുട്ടും. ഏകദിന ക്രിക്കറ്റിലെ ഏറ്റവും വലിയ നേട്ടമായ ലോകകിരീടം ഏറ്റുവാങ്ങിയപ്പോള്‍ എല്ലാ കളിയെഴുത്തുകാരും സച്ചിന്റെ വിരമിക്കല്‍ പ്രവചിച്ചു. അന്ന് സച്ചിന്റെ വിടവാങ്ങല്‍ മുന്നില്‍കണ്ടവര്‍ നിരവധി. അവരുടെ പ്രതീക്ഷകളും തെറ്റി. ഐപിഎലിലും സച്ചിന്‍ കളിക്കുന്നു, 13 അര്‍ധ സെഞ്ചുറികളും ഒരു സെഞ്ചുറിയും നേടിക്കൊണ്ട്. ആരാധക മനസുകളില്‍ അനശ്വര പ്രതിഷ്ഠ നേടാന്‍ വേണ്ടതും അതിലധികവും സച്ചിന്‍ തെണ്ടുല്‍ക്കറുടെ ബാറ്റില്‍നിന്ന് ഇതിനകം പിറന്നുകഴിഞ്ഞു. കാണികളില്‍ നിന്ന് ഉയരുന്ന ആരവം സച്ചിന്‍ രമേശ് തെണ്ടുല്‍ക്കര്‍ എന്ന ഇതിഹാസത്തെ വീണ്ടും പിച്ചിലേക്കു നടക്കാന്‍ പ്രേരിപ്പിക്കുന്നുണ്ടാവാം. അങ്ങനൊരു ദിനമാണ് ഇന്ന്. നാല്പതാം പിറന്നാള്‍ ദിനത്തില്‍ മുംബൈക്കുവേണ്ടി ഒരു ജയം. കോല്‍ക്കത്തയ്ക്കെതിരേ ഇറങ്ങുമ്പോള്‍ സച്ചിനു സമ്മാനിക്കാനൊരു ജയം കൊതിച്ചാണ് മുംബൈ ഇറങ്ങുകയെന്നുറപ്പ്.