വാന്‍പേഴ്സി ട്രിക്കില്‍ യുണൈറ്റഡിനു 20-ാം കിരീടം
ലണ്ടന്‍: റോബിന്‍ വാന്‍പേഴ്സിയുടെ ഹാട്രിക്കിലൂടെ ആസ്റണ്‍ വില്ലയെ 3-0 നു കീഴടക്കി മാഞ്ചസ്റര്‍ യുണൈറ്റഡ് ഇംഗ്ളീഷ് പ്രമീയര്‍ ലീഗ് കിരീടം ഉറപ്പിച്ചു. യുണൈറ്റഡിന്റെ 20-ാം പ്രീമിയര്‍ ലീഗ് കിരീടമാണിത്. കിരീട പോരാട്ടത്തില്‍ രണ്ടാം സ്ഥാനത്തുള്ള മാഞ്ചസ്റര്‍ സിറ്റി കഴിഞ്ഞ ദിവസം ടോട്ടനത്തിനോട് തോറ്റതോടെ, ആസ്റര്‍ വില്ലയ്ക്കെതിരേ വിജയിച്ചാല്‍ കിരീടം ഉറപ്പാക്കാം എന്ന നിലയിലായിരുന്നു യുണൈറ്റഡ് ഇറങ്ങിയത്. ലീഗില്‍ യുണൈറ്റഡിന് നാലു മത്സരങ്ങള്‍ കൂടി ശേഷിക്കുന്നുണ്ട്. 34 മത്സരങ്ങളില്‍ നിന്ന് 84 പോയിന്റാണ് മാഞ്ചസ്റര്‍ യുണൈറ്റഡിനുള്ളത്. 33 മത്സരങ്ങളില്‍ നിന്ന് 68 പോയിന്റാണ് മാഞ്ചസ്റര്‍ സിറ്റിയുടെ സമ്പാദ്യം.

മാനേജര്‍ സര്‍ അലക്സ് ഫെര്‍ഗൂസന്റെ കീഴില്‍ യുണൈറ്റഡ് നേടുന്ന 13-ാം പ്രീമിയര്‍ ലീഗ് കിരീടമാണിത്. വെറ്ററന്‍ മിഡ്ഫീല്‍ഡര്‍ റയാന്‍ ഗിഗ്സിനും ഇതു 13-ാം പ്രീമിയര്‍ ലീഗ് കിരീടം. സ്ട്രൈക്കര്‍ വെയ്ന്‍ റൂണി യുണൈറ്റഡിനായി ഇറങ്ങിയ 400-ാം മത്സരമായിരുന്നു ആസ്റണ്‍ വില്ലയ്ക്കെതിരായത്.

യുണൈറ്റഡിന്റെ സ്വന്തം മൈതാനമായ ഓള്‍ഡ് ട്രാഫോഡിലാണ് ആസ്റണ്‍ വില്ലക്കെതിരായ പോരാട്ടം നടന്നത്. കിരീടം കൈയെത്തും ദൂരത്താണെന്ന തിരിച്ചറിവില്‍ ആക്രമിച്ചു കളിച്ച യുണൈറ്റഡ് രണ്ടാം മിനിറ്റില്‍ തന്നെ മുന്നില്‍കടന്നു. റയാന്‍ ഗിഗ്സിന്റെ പാസില്‍ നിന്ന് റോബിന്‍ വാന്‍പേഴ്സി യുണൈറ്റഡിനെ 1-0 നു മുന്നിലെത്തിച്ചു. 13-ാം മിനിറ്റില്‍ ഹോളണ്ട് സ്ട്രൈക്കര്‍ രണ്ടാം ഗോളും സ്വന്തമാക്കി. വെയ്ന്‍ റൂണി നല്കിയ പാസില്‍ നിന്നായിരുന്നു വാന്‍പേഴ്സിയുടെ രണ്ടാം ഗോള്‍. 33-ാം മിനിറ്റില്‍ വാന്‍പേഴ്സി ഹാട്രിക് പൂര്‍ത്തിയാക്കി. റയാന്‍ ഗിഗ്സിന്റെ പാസ് സ്വീകരിച്ച് സെന്‍ട്രല്‍ ബോക്സിനുള്ളില്‍ നിന്നു വാന്‍പേഴ്സി തൊടുത്ത ഷോട്ട് ആസ്റണ്‍ വില്ലയുടെ ശവപ്പെട്ടിയിലെ മൂന്നാം ആണിയായി. ഹാട്രിക്കിലൂടെ ഗോള്‍ നേട്ടക്കാരുടെ പട്ടികയില്‍ തലപ്പത്തെത്തി വാന്‍പേഴ്സി. 24 ഗോളുകളാണ് ലീഗില്‍ ഇതുവരെ ഹോളണ്ട് താരത്തിന്റെ ബൂട്ടില്‍ നിന്നു പിറന്നത്. 23 ഗോളുമായി ലിവര്‍പൂളിന്റെ ലൂയി സുവാരസാണ് രണ്ടാം സ്ഥാനത്ത്.


രണ്ടാം പകുതിയില്‍ ആക്രമണങ്ങള്‍ നടത്തിയെങ്കിലും യുണൈറ്റഡിനു ലീഡ് ഉയര്‍ത്താന്‍ സാധിച്ചില്ല. ആസ്റണ്‍ വില്ല നടത്തിയ ഒറ്റപ്പെട്ട നീക്കങ്ങള്‍ യുണൈറ്റഡ് പ്രതിരോധത്തില്‍തട്ടിത്തകരുകയും ചെയ്തു. മത്സരത്തില്‍ ഒരു മഞ്ഞക്കാര്‍ഡുമാത്രേ റഫറിക്കു പുറത്തെടുക്കേണ്ടിവന്നുള്ളൂ. 28-ാം മിനിറ്റില്‍ യുണൈറ്റഡിന്റെ പാട്രിക് എവ്റയാണ് മത്സരത്തിലെ ഏക കാര്‍ഡ് കണ്ടത്.

1986 നവംബര്‍ ആറിനാണ് ഫെര്‍ഗൂസന്‍ യുണൈറ്റഡിന്റെ പരിശീലക സ്ഥാനത്തെത്തിയത്. 1986-87 സീസണില്‍ ലിവര്‍പൂളിനു പിന്നില്‍ രണ്ടാം സ്ഥാനമായിരുന്നു യുണൈറ്റഡിന്. 1992-93 സീസണില്‍ ഫെര്‍ഗൂസിന്റെ കീഴില്‍ യുണൈറ്റഡ് ആദ്യ പ്രീമിയര്‍ ലീഗ് കിരീടം സ്വന്തമാക്കി. യുണൈറ്റഡിന്റെ എട്ടാം കിരീടമായിരുന്നു അത്. പ്രതിരോധത്തില്‍ യുണൈറ്റഡിന്റെ വിശ്വസ്തനായി വളര്‍ന്ന ഗിഗ്സിന് അന്നു പത്തൊമ്പതു വയസ്. തുടര്‍ന്ന് ഫെര്‍ഗിയും ഗിഗ്സും 13 പ്രീമിയര്‍ ലീഗ് കിരീടത്തില്‍ ഒരുമിച്ചു മുത്തമിട്ട് ചരിത്രം സൃഷ്ടിച്ചു.