പുതിയ മൊബൈൽ പ്രീ പെയ്ഡ് പ്ലാനുമായി ബിഎസ്എൻഎൽ : Deepika.com Business News |

Click here for detailed news of all items

പുതിയ മൊബൈൽ പ്രീ പെയ്ഡ് പ്ലാനുമായി ബിഎസ്എൻഎൽ

Friday, October 20, 2017 11:26 AM IST

തിരുവനന്തപുരം: പുതിയ മൊബൈൽ പ്രീപെയ്ഡ് പ്ലാനുമായി ബിഎസ്എൻഎൽ. പരിധിയില്ലാത്ത കോളുകളും പ്രതിദിനം ഒരു ജിബി ഡാറ്റയും വാഗ്ദാനം ചെയ്യുന്നതാണ് ബിഎസ്എൻഎലിന്‍റെ പുതിയ കേരള പ്ലാൻ. 446 രൂപയ്ക്ക് 84 ദിവസത്തേക്ക് ഇന്ത്യയിലെ ഏത് നെറ്റ്‌വർക്കിലേക്കും പരിധിയില്ലാതെ വിളിക്കാനാവും.

നിലവിലെ പ്രീപെയ്ഡ് വരിക്കാർക്ക് പ്ലാൻ കേരള എന്ന് 123 എന്ന നമ്പറിലേക്ക് എസ്എംഎസ് അയച്ച് പ്ലാൻ ആക്ടിവേറ്റ് ചെയ്യാമെന്ന് ബിഎസ്എൻഎൽ ചീഫ് ജനറൽ മാനേജർ ഡോ. പി.ടി. മാത്യൂസ് പത്രസമ്മേളനത്തിൽ അറിയിച്ചു. എസ്എംഎസ് വഴി പ്ലാനിലേക്കു പ്രവേശിക്കുന്നവർക്ക് 446 രൂപയുടെ പ്ലാൻ 377.97 രൂപയ്ക്കു ലഭിക്കും. പുതിയ പ്ലാനിലൂടെ കൂടുതൽ ഉപയോക്താക്കളെ ബിഎസ്എൻഎലിലേക്ക് ആകർഷിക്കാനാകുമെന്നാണു കരുതുന്നത്. മൈക്രോമാക്സുമായി സഹകരിച്ച് ബിഎസ്എൻഎൽ പുറത്തിറക്കിയ ഫോർ ജി ഫോണ്‍ രണ്ടു ദിവസത്തിനുള്ളിൽ കേരളവിപണിയിലെത്തുമെന്നും അദ്ദേഹം അറിയിച്ചു.

2200 രൂപയുടെ ഫോണിൽ 97 രൂപയുടെ ബണ്ടിൽ പ്ലാനാണ് ബിഎസ്എൻഎൽ നല്കുന്നത്. 365 ദിവസം വാലിഡിറ്റിയുള്ള ഈ പ്ലാനിൽ 28 ദിവസത്തേക്ക് പരിധിയില്ലാത്ത കോളും ഡാറ്റയും ലഭിക്കും.

യുഎഇയിലേക്ക് മൊബൈൽ പ്രീപെയ്ഡ് ഇന്‍റർനാഷണൽ റോമിംഗ് സൗകര്യമാണ് ബിഎസ്എൻഎലിന്‍റെ മറ്റൊരു പുതിയ സംരംഭം. യുഎഇയിലെ പ്രമുഖ ടെലികോം സേവനദാതാവായ ഇത്തിസാലാത്തുമായി സഹകരിച്ചുള്ള സംവിധാനത്തിലൂടെ ബിഎസ്എൻഎൽ പ്രീപെയ്ഡ് ഉപയോക്താക്കൾക്ക് യുഎഇയിൽ ഇന്‍റർനാഷണൽ റോമിംഗ് സൗകര്യം ലഭ്യമാക്കും. കേരളത്തിൽനിന്നുള്ള പ്രവാസികൾക്ക് ഇതു ഗുണംചെയ്യുമെന്നാണു കരുതുന്നത്.
സ്വകാര്യ കേബിൾ നെറ്റ്‌വർക്കുകളിലൂടെ എഫ്ടിടിഎച്ച് (ഫൈബർ ടു ദി ഹോം) കണക‌്ഷനുകൾ നല്കുന്ന പദ്ധതിക്കും കേരളത്തിൽ തുടക്കമായി. ഒപ്റ്റിക്കൽ ഫൈബർ ശൃംഖലയുള്ള കേബിൾ ടിവി ഓപ്പറേറ്റർമാരുമായി ബിഎസ്എൻഎൽ ഇതിനോടകം കരാറിൽ ഏർപ്പെട്ടുകഴിഞ്ഞു. പോസ്റ്റ് പെയ്ഡ് മൊബൈൽ ബില്ലുകൾ മുൻകൂറായി അടയ്ക്കുന്നവർക്ക് 60 ശതമാനം വരെ ഡിസ്കൗണ്ട് ലഭിക്കുമെന്നതാണ് ബിഎസ്എൻഎലിന്‍റെ മറ്റൊരു പ്രഖ്യാപനം. 12 മാസം, ആറു മാസം, മൂന്നു മാസം എന്നിങ്ങനെയാണ് മുൻകൂട്ടി അടയ്ക്കാവുന്നതാണ്. പുതിയ പോസ്റ്റ് പെയ്ഡ് വരിക്കാർക്കും നിലവിലുള്ള വരിക്കാർക്കും ഈ ഓഫർ ഉപയോഗപ്പെടുത്താം.

മൊബൈൽ കണ‌ക‌്ഷനുകൾ ആധാറുമായി ബന്ധിപ്പിക്കുന്ന പ്രവർത്തനങ്ങൾ പുരോഗമിക്കുകയാണ്. 19.21 ലക്ഷം കണക‌്ഷനുകൾ ബന്ധിപ്പിച്ചുകഴിഞ്ഞു. മൊബൈൽ നമ്പർ ആധാറുമായി ബന്ധിപ്പിക്കുന്ന ഓരോ ഉപയോക്താവിനും ഒരു സൗജന്യ സിമ്മും നല്കുന്നുണ്ട്.

പ്രിൻസിപ്പൽ ജനറൽ മാനേജർ കെ. കുളൈന്തവേൽ, ജനറൽ മാനേജർ ഡോ. എസ്. ജ്യോതിശങ്കർ, കെ. സത്യമൂർത്തി, അനിതകുമാരി തുടങ്ങിയവർ പത്രസമ്മേളനത്തിൽ പെങ്കടുത്തു. ചടങ്ങിൽ ബിഎസ്എൻഎലിന്‍റെ ആദ്യകാല ലാൻഡ്‌ലൈൻ വരിക്കാരായ തിരുവിതാംകൂർ രാജകുടുംബത്തിലെ പൂയംതിരുനാൾ ഗൗരി പാർവതി ഭായിയെയും മൊബൈൽ ഉപയോക്താവായ സുകേഷിനെയും ആദരിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.