എസ്ബിടി - എസ്ബിഐ ലയനത്തിനെതിരായ ഹർജികൾ തള്ളി : Deepika.com Business News |

Click here for detailed news of all items

എസ്ബിടി - എസ്ബിഐ ലയനത്തിനെതിരായ ഹർജികൾ തള്ളി

Friday, March 24, 2017 12:00 PM IST

കൊച്ചി: എസ്ബിടി - എസ്ബിഐ ലയനം തടയണമെന്നാവശ്യപ്പെട്ട് സമർപ്പിച്ച ഹർജികൾ ഹൈക്കോടതി തള്ളി. ബാങ്ക് ലയനത്തിന്‍റെ കാര്യത്തിൽ തീരുമാനമെടുക്കാൻ സ്റ്റേറ്റ് ബാങ്ക് ഓഫ് ഇന്ത്യക്ക് പൂർണ അധികാരമുണ്ടെന്നു വിലയിരുത്തിയാണ് ഡിവിഷൻ ബെഞ്ചിന്‍റെ തീരുമാനം.
എസ്ബിടിയെ ലയിപ്പിക്കാൻ എസ്ബിഐ ഡയറക്ടർ ബോർഡിന്‍റെ അനുമതി മതിയെന്നു കോടതി പറഞ്ഞു. ഈ കേസിൽ ഡയറക്ടർ ബോർഡിലെ ഭൂരിപക്ഷത്തിന്‍റെയും അഭിപ്രായം ലയനത്തിന് അനുകൂലമാണ്. ഈ തീരുമാനത്തെ ചോദ്യംചെയ്യാൻ ജീവനക്കാർക്കുള്ള അധികാരം പരിമിതമാണെന്നും ഡിവിഷൻ ബെഞ്ച് വിലയിരുത്തി.

കൃത്യമായി പഠനം നടത്താതെയാണ് ബാങ്ക് ലയനത്തിന് എസ്ബിഐ ഒരുങ്ങുന്നതെന്നും ഈ നടപടി ബാങ്കിംഗ് നിയമങ്ങൾക്കെതിരാണെന്നും ചൂണ്ടിക്കാട്ടി സേവ് എസ്ബിടി ഫോറമാണ് ഹർജി നൽകിയത്. വിവിധ രാഷ്‌ട്രീയ പാർട്ടികളും ട്രേഡ് യൂണിയനുകളും ചേർന്നാണ് സേവ് എസ്ബിടിക്കു രൂപംനൽകിയത്. കേരളത്തിൽ ആസ്ഥാനമുള്ള ഏക പൊതുമേഖലാ ബാങ്കാണ് എസ്ബിടിയെന്നും ലയനത്തിലൂടെ ഈ ബാങ്ക് ഇല്ലാതാകുന്നത് കേരളത്തിന്‍റെ വികസന താത്പര്യങ്ങൾക്കു വിരുദ്ധമാണെന്നും ഹർജിക്കാർ വാദിച്ചിരുന്നു. മാത്രമല്ല, കേരള നിയമസഭ ലയനത്തിനെതിരേ പ്രമേയം പാസാക്കിയതും ഹർജിയിൽ ചൂണ്ടിക്കാട്ടിയിരുന്നു. എസ്ബിടിയെ സ്റ്റേറ്റ് ബാങ്ക് ഓഫ് ഇന്ത്യയിൽ ലയിപ്പിക്കാൻ പാർലമെന്‍റിന്‍റെ അംഗീകാരം വേണമെന്ന ഹർജിക്കാരുടെ വാദം ഹൈക്കോടതി തള്ളി. സേവ് എസ്ബിടി ഫോറം ചെയർമാൻ പന്ന്യൻ രവീന്ദ്രനടക്കം നൽകിയ ഹർജികളാണു തള്ളിയത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.