മുംബൈ: കറൻസി റദ്ദാക്കലിന്റെ പ്രത്യാഘാതങ്ങളിൽനിന്ന് വാഹനവിപണി കരകയറിത്തുടങ്ങി. പോയ മാസം പ്രധാന കന്പനികളുടെ വാഹന വില്പന ഉയർന്നു. മാരുതി സുസുകി, റെനോ, ഹ്യുണ്ടായി കമ്പനികൾ ഇന്ത്യയിലെ വില്പനയിൽ കരുത്തുകാട്ടി. അതേസമയം കയറ്റുമതിയിൽ കരുത്തുതെളിയിച്ചത് ഫോർഡാണ്.
കറൻസി റദ്ദാക്കലിന്റെ പ്രശ്നങ്ങൾ മാറിത്തുടങ്ങിയതും പുതിയ ധനകാര്യ വർഷം വാഹനവിലയിൽ മാറ്റമുണ്ടാകുമെന്ന ഭീതിയും വില്പന ഉയരാൻ കാരണമായി. ഈ മാസവും വിപണിയിൽ മുന്നേറ്റം പ്രതീക്ഷിക്കാം.
മാരുതി സുസുകി
സിയാസ്, ബ്രെസ്സ, ബലേനോ തുടങ്ങിയ മോഡലുകളുടെ വിജയത്തേരിലേറി മാരുതിയുടെ വില്പന ഉയർന്നു. അടുത്തിടെ പുറത്തിറക്കിയ ഇഗ്നിസിന്റെ പ്രാരംഭ ഡിമാൻഡും ഈ വിജയത്തിനു പിന്നിലുണ്ട്. പോയ മാസം ആഭ്യന്തര വിപണിയിൽ 11.7 ശതമാനവും കയറ്റുമതിയിൽ 2.2 ശതമാനവും വില്പന ഉയർന്നു. പുതിയ മോഡലുകളുടെ മുന്നേറ്റത്തിൽ ആൾട്ടോ, വാഗൺ ആർ മോഡലുകളുടെ വില്പന 6.8 ശതമാനം താഴ്ന്ന് 33,079 എണ്ണമായി. തലേ വർഷം ഇതേ മാസം 35,495 കാറുകൾ വിറ്റിരുന്നു.
ഹ്യുണ്ടായി മോട്ടോർ
ഹ്യുണ്ടായി മോട്ടോർ ഇന്ത്യ ആറു ശമതാനം വളർച്ചയോടെ പോയ മാസം 52,734 കാറുകൾ വിറ്റു. ആഭ്യന്തര വിപണിയിൽ നാലു ശതമാനം വളർച്ചയോടെ 42,327 കാറുകൾ വിറ്റപ്പോൾ 10,407 കാറുകൾ കയറ്റുമതി ചെയ്തു. കയറ്റുമതി വളർച്ച 15.5 ശതമാനം.
റെനോ ഇന്ത്യ
രാജ്യത്ത് അതിവേഗം വളരുന്ന വാഹനനിർമാതാക്കളിലൊന്നായ റെന ഇന്ത്യ 26.8 ശതമാനം വളർച്ച പോയ മാസം രേഖപ്പെടുത്തി 11,198 കാറുകൾ വിറ്റു. തലേ വർഷം ഇതേ മാസം 8,834 കാറുകളായിരുന്നു വിറ്റത്. അതേസമയം റെനോയുടെ ഹാച്ച് ബാക്ക് മോഡലായ ക്വിഡിന്റെ വില്പനയിൽ ഇടിവുണ്ടായി. ശരാശരി 9,000 കാറുകൾ വിറ്റിരുന്ന സ്ഥാനത്ത് പോയ മാസം 6,924 എണ്ണമാണ് നിരത്തിലിറങ്ങിയത്.
ഫോർഡ് ഇന്ത്യ
അമേരിക്കൻ വാഹനനിർമാതാക്കളായ ഫോർഡ് തങ്ങളുടെ കയറ്റുമതി ശേഷി വർധിപ്പിച്ചു. ആഭ്യന്തര വിപണിയിൽ വിറ്റ കാറുകളേക്കാളും കൂടുതൽ പോയ മാസം കയറ്റുമതി ചെയ്തു. 8,338 കാറുകൾ പോയ മാസം ആഭ്യന്തര വിപണിയിൽ വിറ്റഴിച്ചപ്പോൾ കടൽ കടന്നത് 15,688 കാറുകൾ.
നിസാൻ മോട്ടോർ ഇന്ത്യ
ജാപ്പനീസ് കാർ നിർമാതാക്കളായ നിസാനും വളർച്ച രേഖപ്പെടുത്തി. ചെറു കാറുകളുടെ ബ്രാൻഡ് ആയ ഡാറ്റ്സണിന്റെ വില്പന കൂടി ഉൾപ്പെടുത്തി 24.85 ശതമാനം അധിക വില്പനയോടെ 4,807 കാറുകൾ പോയ വാരം വിറ്റു. തലേ വർഷം ഇതേ മാസം 3,850 കാറുകളായിരുന്നു വിറ്റിരുന്നത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.