വരുന്നൂ, രൂപം മാറ്റാവുന്ന മോര്‍ഫീസ് ഫോണ്‍
ലണ്ടന്‍: ദീര്‍ഘചതുരാകൃതിയിലുള്ള ഇന്നത്തെ മൊബൈല്‍ഫോണുകള്‍ മാറാന്‍ പോകുന്നു. ഉപയോക്താവ് ആവശ്യപ്പെടുന്ന ആകൃതിയിലായിരിക്കും ഭാവിയില്‍ ഷോറൂമുകളില്‍ നിന്ന് ഫോണ്‍ ലഭിക്കുക. അത്തരത്തിലുള്ള സാങ്കേതിക വിദ്യയില്‍ നിര്‍മിച്ച മൊബൈല്‍ഫോണിന്റെ പ്രാഥമിക രൂപം പുറത്തിറക്കി. പത്തു പ്രത്യേകതകളടങ്ങിയ ഈ ഫോണ്‍ ശാസ്ത്രസാങ്കേതിക രംഗത്ത് ആകൃതി വിപ്ളവത്തിനാണ് തുടക്കമിട്ടിരിക്കുന്നതെന്നു ബ്രിസ്റോള്‍ സര്‍വകലാശാലയിലെ കംപ്യൂട്ടര്‍ സര്‍വീസ് വകുപ്പ് അവകാശപ്പെടുന്നു. ഇന്ത്യക്കാരനായ പ്രഫ. ശ്രീറാം സുബ്രഹ്മണ്യം, ഡോ. ആനി റോഡൌട്ട് എന്നിവരുടെ നേതൃത്വത്തിലാണ് ഗവേഷണം നടത്തിയത്. ആകൃതി മാറ്റാന്‍ കഴിയുന്ന ഷേപ് മെമ്മറി അലോയ്, വൈദ്യുതി ആഭിമുഖ്യമുള്ള പോളിമര്‍ എന്നിവ ഉപയോഗിച്ചാണ് പ്രോട്ടോടൈപ്പ് നിര്‍മിച്ചത്. ഡിസ്പ്ളേ, ടച്ച് റെസലൂഷന്‍ എന്നിവയൊക്കെ സാധാരണ ഫോണിലേതു പോലെ തന്നെ. മോര്‍ഫീസ് എന്നാണ് ശാസ്ത്രജ്ഞര്‍ ഈ ഫോണ്‍ സാങ്കേതികവിദ്യയ്ക്കു നല്‍കിയിരിക്കുന്ന പേര്. ഏതെങ്കിലും സാഹചര്യത്തില്‍ ആകൃതി മാറ്റാന്‍ കഴിയുന്ന, വഴങ്ങുന്ന മൊബൈല്‍ ഉപകരണം എന്നാണ് ഇത് അര്‍ഥമാക്കുന്നത്.