വി ഗാര്‍ഡ് ഇന്‍ഡസ്ട്രീസ് അറ്റാദായത്തില്‍ 24 ശതമാനം വര്‍ധന
കൊച്ചി: വി ഗാര്‍ഡ് ഇന്‍ഡസ്ട്രീസ് ലിമിറ്റഡ് കഴിഞ്ഞ സാമ്പത്തിക വര്‍ഷം 62.92 കോടി രൂപ ലാഭം നേടി. നികുതി കഴിഞ്ഞുള്ള അറ്റാദായമാണിത്. 2011-12 വര്‍ഷത്തേക്കാള്‍ 24 ശതമാനം വര്‍ധനയാണ് കഴിഞ്ഞ സാമ്പത്തിക വര്‍ഷം ഉണ്ടായിരിക്കുന്നത്. 2012-13 വിറ്റുവരവ് മുന്‍ കൊല്ലത്തേക്കാള്‍ 41 ശതമാനം ഉയര്‍ന്ന് 1360.21 കോടി രൂപയായി. കഴിഞ്ഞ മാര്‍ച്ച് 31 നു അവസാനിച്ച നാലാം പാദത്തില്‍ 378.72 കോടി രൂപയാണു വിറ്റുവരവ്. 2011-12 സാമ്പത്തിക വര്‍ഷത്തിന്റെ അവസാന പാദത്തേക്കാള്‍ 39 ശതമാനം വര്‍ധനയാണ് ഉണ്ടായിരിക്കുന്നത്. 2013 സാമ്പത്തിക വര്‍ഷത്തേക്കു ഓഹരിയുടമകള്‍ക്കു 35 ശതമാനം അന്തിമ ഡിവിഡന്റ് നല്‍കാന്‍ ബോര്‍ഡ് ഓഫ് ഡയറക്ടേഴ്സ് തീരുമാനിച്ചു.


ഡിജിറ്റല്‍ ഹോം യുപിഎസ്, പമ്പ്, സ്റെബിലൈസര്‍, ഭവന വയറിംഗ് കേബിള്‍ എന്നീ ഉത്പന്നങ്ങള്‍ മികച്ച വില്പന നേടി. കഴിഞ്ഞ സാമ്പത്തിക വര്‍ഷം ഇന്‍ഡക്ഷന്‍ കുക്ക് ടോപ്പ് എന്ന ഉത്പന്നം വിപണിയില്‍ അവതരിപ്പിച്ചു. സോളാര്‍ വാട്ടര്‍ ഹീറ്റര്‍ നിര്‍മിക്കാന്‍ പെരുന്തുറൈയില്‍ പുതിയ പ്ളാന്റ് ആരംഭിച്ചു. ഇതുള്‍പ്പെടെ കാശിപൂര്‍ കേബിള്‍ ഫാക്ടറി വികസനം, അങ്കമാലിയില്‍ വെയര്‍ ഹൌസ് നിര്‍മാണം, ഐടി അടിസ്ഥാന സൌകര്യം, ഒറാക്കിള്‍ സിആര്‍എം പാക്കേജ് തുടങ്ങിയ വികസന പദ്ധതികള്‍ക്കായി 28.26 കോടി രൂപ മുതല്‍ മുടക്കിയെന്നു വി ഗാര്‍ഡ് ഇന്‍ഡസ്ട്രീസ് ലിമിറ്റഡ് പത്രക്കുറിപ്പില്‍ അറിയിച്ചു.