വീഴ്ച വരുത്തുന്ന ബാങ്കുകള്‍ക്കുള്ള പിഴ ഉയര്‍ത്തും
മുംബൈ: നോ യുവര്‍ കസ്റമര്‍(കെവൈസി) ഉള്‍പ്പെടെ ബാങ്കിംഗ് ചട്ടങ്ങളും നിയന്ത്രണങ്ങളും ലംഘിക്കുന്ന ധനകാര്യ സ്ഥാപനങ്ങള്‍ക്കു പിഴയായി ചുമത്തുന്ന തുക വര്‍ധിപ്പിക്കാന്‍ കേന്ദ്രസര്‍ക്കാരും റിസര്‍വ് ബാങ്കും ആലോചിക്കുന്നു.

അടുത്തിടെ ഒരു വെബ്സൈറ്റ് പുറത്തുകൊണ്ടുവന്ന അനധികൃത പണമിടപാടു സംബന്ധിച്ച റിപ്പോര്‍ട്ടുകളുടെ പശ്ചാത്തലത്തിലാണ് പുതിയ നടപടികള്‍ക്ക് ആലോചിക്കുന്നത്. ഇപ്പോള്‍ പരമാവധി പിഴ ഒരു കോടി രൂപയാണ്. ഇതു പോരെന്ന നിലപാടാണു സര്‍ക്കാരിനും റിസര്‍വ് ബാങ്കിനും. തുക ഉയര്‍ത്തുന്ന കാര്യം വിശദമായി ചര്‍ച്ച ചെയ്തുവരുകയാണെന്നു ബാങ്കിംഗ് സെക്രട്ടറി രാജീവ് തക്രു പറഞ്ഞു. എല്‍ഐസി ബോര്‍ഡ് യോഗത്തിനു ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. വീഴ്ച വരുത്തിയ ബാങ്കുകള്‍ക്ക് കാരണം കാണിക്കല്‍ നോട്ടീസ് നല്‍കിയിട്ടുണ്ട്. അവയുടെ മറുപടിക്കു ശേഷം യോജ്യമായ നടപടികള്‍ സ്വീകരിക്കും. എന്നാല്‍ പിഴത്തുക എത്രമാത്രം ഉയര്‍ത്തുമെന്ന് അദ്ദേഹം വ്യക്തമാക്കിയില്ല. കോബ്രപോസ്റ് വെബ്സൈറ്റ് പുറത്തുവിട്ട വിവരങ്ങളും റിസര്‍വ് ബാങ്കിന്റെ അന്വേഷണത്തില്‍ നിന്നു ബോധ്യപ്പെട്ട വിവരങ്ങളും തമ്മില്‍ കാര്യമായ അന്തരമുണ്േടായെന്നു ചോദിച്ചപ്പോള്‍ ഇക്കാര്യത്തില്‍ തനിക്കു തീര്‍ച്ച പറയാനാകില്ലെന്ന് തക്രു വ്യക്തമാക്കി. രാജ്യത്തെ ചില പൊതുമേഖലാ, സ്വകാര്യ ബാങ്കുകളും ഇന്‍ഷ്വറന്‍സ് സംരംഭങ്ങളും അനധികൃത പണമിടപാടിനു കൂട്ടുനില്‍ക്കുന്നതായി ആരോപണമുയര്‍ന്നിരുന്നു.


ഇന്‍ഷ്വറന്‍സ് കളളപ്പണമായി മാറ്റിക്കൊണ്ടിരിക്കുന്ന പ്രവണതയ്ക്കു തടയിടാന്‍ നടപടികള്‍ സ്വീകരിച്ചുവരുകയാണ്. ഒരേ പാന്‍ നമ്പറില്‍ ഒന്നിലധികം വന്‍തുകയ്ക്കുള്ള പോളീസികള്‍ എടുത്തിട്ടുള്ള കാര്യം ശ്രദ്ധയില്‍പ്പെട്ടിട്ടുണ്െടന്ന് അദ്ദേഹം പറഞ്ഞു.