പെയിന്‍ റിലീഫ് ട്രാന്‍സ്ഡേമല്‍ പാച്ചുകള്‍: വേദന നിവാരണത്തിന് ഫലപ്രദമായ ഉപാധിയെന്ന്
കൊച്ചി: വേദന നിവാരണത്തിന് ലോക വ്യാപകമായി ഉപയോഗിച്ചു വരുന്ന പെയിന്‍ റിലീഫ് ട്രാന്‍സ്ഡേമല്‍ പാച്ചുകള്‍ കൂടുതല്‍ ഫലപ്രദവും സൌകര്യപ്രദവുമാണെന്ന് ഡല്‍ഹി പെയിന്‍ മാനേജ്മെന്റ് സെന്റര്‍ ഡയറക്ടര്‍ ഡോ. ജി.പി. ദുരേജ പറഞ്ഞു. എന്നാല്‍ ഏതാനും വര്‍ഷങ്ങള്‍ക്ക് മുമ്പ് മാത്രമാണ് ഇന്ത്യയില്‍ പെയിന്‍ ആന്‍ഡ് റിലീഫ് ട്രാന്‍സ്ഡേമല്‍ പാച്ചുകളുടെ നിര്‍മാണം ആരംഭിച്ചത്. അതുകൊണ്ടുതന്നെ ഇവയുടെ പ്രത്യേകതകള്‍ ജനങ്ങളിലേക്ക് എത്തിക്കുന്നതില്‍ ഇന്ത്യയിലെ നിര്‍മാതാക്കള്‍ വേണ്ടത്ര വിജയിച്ചിട്ടില്ലെന്നും അദ്ദേഹം പറഞ്ഞു. വിവിധതരം വേദനകള്‍ മൂലം പ്രശ്നങ്ങള്‍ അനുഭവിക്കുന്ന രോഗികള്‍ക്ക് ശരിയായ ട്രീറ്റ്മെന്റ് ലഭിക്കുന്നില്ലെങ്കില്‍ ഈ വേദനകള്‍ നാഡിവ്യൂഹത്തെ തന്നെ പ്രതികൂലമായി ബാധിച്ചേക്കാം. പെയിന്‍ റിലീഫ് ട്രാന്‍സ്ഡേമല്‍ പാച്ചുകള്‍ വേദനയുള്ള ഭാഗത്ത് ഒട്ടിക്കുന്നവയായതുകൊണ്ട് അതിലടങ്ങിയിട്ടുള്ള ഔഷധം ഒട്ടും നഷ്ടമാകാതെ തന്നെ രക്തത്തിലേക്ക് ആഴ്ന്നിറങ്ങി പ്രവര്‍ത്തിക്കുമെന്നതാണ് ഇതിന്റെ പ്രത്യേകതയെന്നു ഡോ. ദുരേജ പറഞ്ഞു.


വിദഗ്ധരുടെ അഭിപ്രായത്തില്‍ ഇവയ്ക്ക് പെയിന്‍ കില്ലറുകളെപ്പോലെ പാര്‍ശ്വഫലങ്ങളൊന്നും തന്നെ ഇല്ലെന്നും ഇന്ത്യന്‍ സൊസൈറ്റി ഫോര്‍ സ്റ്റഡി ഓഫ് പെയിന്‍ സെക്രട്ടറി ഡോ. കൃഷ്ണ പൊദ്ദാര്‍ അഭിപ്രായപ്പെട്ടു.