ട്രംപ് ഭരണത്തിനിടെ പുറത്താക്കപ്പെട്ടവരും ഒഴിഞ്ഞുപോയവരും : Deepika.com International News |

Click here for detailed news of all items

ട്രംപ് ഭരണത്തിനിടെ പുറത്താക്കപ്പെട്ടവരും ഒഴിഞ്ഞുപോയവരും

Saturday, August 19, 2017 11:27 AM IST

വാഷിംഗ്ടൺ ഡിസി: ഡോണൾഡ് ട്രംപ് യുഎസ് പ്രസിഡന്‍റായി ഏഴുമാസം പിന്നിടുന്പോൾ വൈറ്റ്ഹൗസിൽനിന്നു പുറത്താക്കപ്പെട്ടവരും സ്വയം ഒഴിഞ്ഞുപോയവരും ഏറെ.

പുറത്താക്കപ്പെട്ടവർ

ജയിംസ് കോമി: എഫ്ബിഐ ഡറക്ടറായിരുന്ന കോമിയെ മേയ് ഒന്പതിനു ട്രംപ് പുറത്താക്കി. ട്രംപിന്‍റെ തെരഞ്ഞെടുപ്പു വിജയത്തിനു റഷ്യൻ സഹായം ലഭിച്ചുവെന്ന ആരോപണത്തിൽ അന്വേഷണം നടത്താൻ കാണിച്ച ഉത്സാഹമാണ് പുറത്താക്കലിനു വഴിവച്ചത്.
പ്രീത് ബരാര: മുൻ പ്രസിഡന്‍റ് ബറാക് ഒബാമ യുഎസ് അറ്റോർണിയായി നിയമിച്ച ബരാരെയെ മാർച്ചിലാണു ട്രംപ് പുറത്താക്കിയത്. ട്രംപിന്‍റെ നിശിത വിമർശകനായിരുന്നു. നിർബന്ധിച്ചു രാജിവയ്പ്പിക്കാൻ ശ്രമിച്ചിട്ടും വഴങ്ങാതിരുന്ന ബരാരയെ പുറത്താക്കുകയായിരുന്നു.

സാലി യേറ്റ്സ്: യുഎസ് അറ്റോർണി ജനറലായ സാലി യേറ്റ്സിനെ ജനുവരി 30നാണു പുറത്താക്കിയത്. മുസ്ലിം രാജ്യങ്ങളിൽനിന്നുള്ളവർക്കു നിരോധനം ഏർപ്പെടുത്താനുള്ള ട്രംപിന്‍റെ തീരുമാനത്തെ ജസ്റ്റീസ് ഡിപാർട്ട്മെന്‍റ് ന്യായീകരിക്കില്ലെന്ന സാലിയുടെ പ്രഖ്യാപനമാണ് പുറത്താക്കലിനു വഴിതെളിച്ചത്.

ഒഴിഞ്ഞുപോയവർ

മൈക്കൾ ഫ്ലിൻ: ദേശീയ സുരക്ഷാ ഉപദേഷ്ടാവായിരുന്ന ഫ്ലിൻ ഫെബ്രുവരി 14നു രാജിവച്ചു. റഷ്യയുമായി ബന്ധമുണ്ടെന്ന ആരോപണമായിരുന്നു കാരണം.
റീൻസ് പ്രീബസ്: ചീഫ് ഓഫ് സ്റ്റാഫ് ആയിരുന്ന പ്രീബസ് ജുലൈ 27നു രാജിവച്ചൊഴിയുകയാണെന്ന് അറിയിച്ചു. പ്രീബസ് മാധ്യമപ്രവർത്തകർക്കു വിവരങ്ങൾ ചോർത്തി നല്കിയിരുന്നുവെന്ന വിവരം പിന്നാലെ പുറത്തുവന്നു.

മിഷായേൽ ഷോർട്ട്: സീനിയർ അസിസ്റ്റന്‍റ് പ്രസ് സെക്രട്ടറി ആയിരുന്ന ഷോർട്ട് ജൂലൈ 25നാണു രാജിവച്ചത്.

ഷോൺ സ്പൈസർ: വൈറ്റ് ഹൗസ് പ്രസ് സെക്രട്ടറിയായിരുന്നു. ആന്‍റണി സ്കരാമൂച്ചിയെ കമ്യൂണിക്കേഷൻ ഡയറക്ടറായി ട്രംപ് നിയമിച്ചതിൽ പ്രതിഷേധിച്ച് ജൂലൈ 21നു രാജിവച്ചു.

മൈക്ക് ഡുബ്കെ: കമ്യൂണിക്കേഷൻ ഡയറക്ടറായിരുന്നു. മേയ് 18നു രാജിവച്ചു. രാജിക്കു കാരണമൊന്നും വ്യക്തമാക്കിയില്ല.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.