ഡമാസ്കസ് കോടതിയിൽ ചാവേർ ആക്രമണം; 30 മരണം : Deepika.com International News

Click here for detailed news of all items

ഡമാസ്കസ് കോടതിയിൽ ചാവേർ ആക്രമണം; 30 മരണം

Wednesday, March 15, 2017 12:05 PM IST

ഡമാസ്കസ് : സിറിയൻ തലസ്ഥാനമായ ഡമാസ്കസിൽ പ്രധാന കോടതി സ്ഥിതിചെയ്യുന്ന പാലസ് ഓഫ് ജസ്റ്റീസ് കെട്ടിടത്തിൽ ചാവേർ ഭടൻ നടത്തിയ ബോംബ് സ്ഫോടനത്തിൽ കുറഞ്ഞത് 30 പേർ കൊല്ലപ്പെട്ടു.

അന്പതോളം പേർക്കു പരിക്കേറ്റിട്ടുണ്ട്. ജഡ്ജിമാരും അഭിഭാഷകരും സാധാരണക്കാരുമുൾപ്പെടെ നിരവധി പേർ സ്ഫോടന സമയത്ത് കോടതിക്കെട്ടിടത്തിലുണ്ടായിരുന്നുവെന്ന് അൽ ഇക്ബാരിയ ടിവി റിപ്പോർട്ടു ചെയ്തു.

സൈനിക യൂണിഫോമിലെത്തിയ ചാവേറിനെ പരിശോധിക്കാൻ ഗാർഡുകൾ ശ്രമിക്കുന്നതിനിടെ അയാൾ സ്വയം പൊട്ടിത്തെറിക്കുകയായിരുന്നുവെന്നു ഡമാസ്കസ് പോലീസ് മേധാവി പറഞ്ഞു.ഈ സ്ഫോടനത്തിനു പിന്നാലെ ഡമാസ്കസിലെ റാബ്വെ മേഖലയിലെ റസ്റ്ററന്‍റിൽ നടന്ന മറ്റൊരു ചാവേർ ആക്രമണത്തിൽ നിരവധി പേർ കൊല്ലപ്പെട്ടതായി സനാ വാർത്താ ഏജൻസി റിപ്പോർട്ടു ചെയ്തു.

അഞ്ചുദിവസത്തിനുള്ളിൽ രണ്ടാം തവണയാണ് ഡമാസ്കസിൽ ഭീകരാക്രമണം നടക്കുന്നത്. ശനിയാഴ്ച നടന്ന ചാവേർ ആക്രമണത്തിൽ 40 പേർക്കു ജീവഹാനി നേരിട്ടു. ഇതിന്‍റെ ഉത്തരവാദിത്വം അൽനുസ്റ മുന്നണി ഏറ്റെടുത്തിരുന്നു. സിറിയയിൽ ആഭ്യന്തരയുദ്ധം ആരംഭിച്ചതിന്‍റെ ആറാം വാർഷികമായിരുന്നു ഇന്നലെ. 2011 മാർച്ചിൽ പ്രസിഡന്‍റ് ബഷാർ അൽ അസാദിന്‍റെ ദുർഭരണത്തിനെതിരേ ആരംഭിച്ച സമരം ആഭ്യന്തരയുദ്ധമായി വളരുകയായിരുന്നു. ആറു വർഷത്തിനകം നാലു ലക്ഷം പേരെങ്കിലും കൊല്ലപ്പെട്ടു. ലക്ഷക്കണക്കിനാളുകൾ പലായനം ചെയ്തു. അരാജകത്വം മുതലെടു ത്ത് അൽക്വയ്ദയും ഐഎസും സിറിയയിൽ കാലുറപ്പിച്ചു. സിറിയയിലെ റാഖായാണ് ഐഎസിന്‍റെ പ്രധാന കേന്ദ്രം .

കസാക്കിസ്ഥാനിലെ അസ്റ്റാനയിൽ സിറിയൻ പ്രശ്ന പരിഹാരത്തിനായി തുർക്കിയും റഷ്യയും മുൻകൈയെടുത്തു സമാധാന ചർച്ച നടത്തിവരുന്നതിനിടയിലാണ് ഡമാസ്കസിൽ വീണ്ടും ചാവേർ ആക്രമണം നടക്കുന്നത്. നേരത്തേ പ്രഖ്യാപിച്ച വെടിനിർത്തൽ നടപ്പാക്കുന്നതിനു റഷ്യ മുൻകൈയെടുക്കണമെന്ന് ആവശ്യപ്പെട്ട് വിമതർ ചർച്ചയിൽനിന്നു വിട്ടുനിൽക്കുകയാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.