മതിലിനു പണം തരില്ലെന്നു മെക്സിക്കോ : Deepika.com International News |

Click here for detailed news of all items

മതിലിനു പണം തരില്ലെന്നു മെക്സിക്കോ

Thursday, January 12, 2017 2:33 PM IST

മെക്സിക്കോസിറ്റി: മെക്സിക്കോയിൽനിന്നുള്ള അനധികൃത കുടിയേറ്റം തടയുന്നതിനു യുഎസ്-മെക്സിക്കോ അതിർത്തിയിൽ ട്രംപ് ഭരണകൂടം നിർമിക്കാനുദ്ദേശിക്കുന്ന മതിലിന്‍റെ ചെലവ് മെക്സിക്കോ വഹിക്കുമെന്നു കരുതേണ്ടെന്നു മെക്സിക്കൻ പ്രസിഡന്‍റ് പെനാ നിറ്റോ.

ട്രംപ് ഭരണകൂടവുമായി നല്ല ബന്ധം പുലർത്താൻ ആഗ്രഹമുണ്ടെന്നും നാഷണൽ പാലസിൽ മെക്സിക്കൻ സ്ഥാനപതിമാരെ അഭിസംബോധന ചെയ്ത് പ്രസിഡന്‍റ് പറഞ്ഞു.എന്നാൽ മെക്സിക്കോയുടെ ആത്മാഭിമാനം പണയംവച്ചുള്ള ഒരു നടപടിക്കും തയാറല്ല.
മതിൽ നിർമിക്കുമെന്നും അതിനുവരുന്ന ചെലവ് മെക്സിക്കോയിൽനിന്ന് ഈടാക്കുമെന്നും ട്രംപ് കഴിഞ്ഞദിവസം ആവർത്തിച്ചതിനു പിന്നാലെയാണു പെനാ നിറ്റോയുടെ പ്രതികരണം. മെക്സിക്കോയിലേക്കു തൊഴിൽ അവസരങ്ങൾ കൊണ്ടുപോകുന്ന കമ്പനികൾക്ക് 35ശതമാനം താരിഫ് ചുമത്തുമെന്ന ട്രംപിനെ ഭീഷണിയെ പരാമർശിച്ച് വിദേശനിക്ഷേപത്തെ സ്വാധീനിക്കാനുള്ള ഏതു ശ്രമത്തെയും ചെറുക്കുമെന്ന് നിറ്റോ പ്രതികരിച്ചു.

മെക്സിക്കോയിലേക്കുള്ള തോക്കു കള്ളക്കടത്തു തടയാൻ ട്രംപ് ഭരണകൂടം തയാറാവണമെന്ന ഡിമാൻഡും നിറ്റോ മുന്നോട്ടുവച്ചു. അയൽരാജ്യത്തുനിന്നെത്തുന്ന തോക്കുകളാണ് മെക്സിക്കോയിൽ മയക്കുമരുന്നു മാഫിയ നടത്തുന്ന അക്രമത്തിനു തുണയേകുന്നത്. മാഫിയ സംഘങ്ങൾക്കു പണംവരുന്ന സ്രോതസ് അടയ്ക്കാനും അമേരിക്ക തയാറാവണം. മതിയായ രേഖകളില്ലാതെ യുഎസിൽ തങ്ങുന്ന മെക്സിക്കോക്കാരെ നാട്ടിലേക്കു മടക്കിവിടുമെന്ന ട്രംപിന്‍റെ നിർദേശത്തെക്കുറിച്ചു പരാമർശിച്ച് ഏതു പുനരധിവാസവും മാനുഷിക പരിഗണനയ്ക്കു പ്രാധാന്യം നൽകി ക്രമാനുഗതമായ രീതിയിലേ നടപ്പാക്കാവൂ എന്നു നിറ്റോ പറഞ്ഞു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.