ക്രൈസ്തവ ഗ്രാമം സിറിയന്‍ വിമതര്‍ പിടിച്ചു
ഡമാസ്കസ്: സിറിയയില്‍ പ്രസിഡന്റ് ബഷാര്‍ അല്‍ അസാദിനെതിരേ പോരാടുന്ന വിമതര്‍ ഡമാസ്കസിനടുത്തുള്ള ക്രൈസ്തവ ഗ്രാമത്തിന്റെ നിയന്ത്രണം പിടിച്ചു.അല്‍ക്വയ്ദ ബന്ധമുള്ള അല്‍നുസ്ര വിമതഗ്രൂപ്പും മറ്റൊരു വിമത വിഭാഗവും ശനിയാഴ്ച രാത്രി ഡമാസ്കസിനു വടക്കുകിഴക്കുള്ള മാലൌല ഗ്രാമം ആക്രമിച്ചു കീഴ്പ്പെടുത്തുകയായിരുന്നു.

യേശുക്രിസ്തുവും ശിഷ്യരും സംസാരിച്ചിരുന്ന അരമായ ഭാഷ ഇപ്പോഴും ഉപയോഗിക്കുന്ന ലോകത്തിലെ അപൂര്‍വം സ്ഥലങ്ങളിലൊന്നാണ് മാലൌല. ഈ മലയോരഗ്രാമത്തില്‍ ഏകദേശം 5,000 പേര്‍ വസിക്കുന്നു.

ശനിയാഴ്ച പട്ടാളവുമായി കനത്ത പോരാട്ടം നടത്തിയ വിമതര്‍ തുടര്‍ന്ന് മാലൌലയിലേക്കു നീങ്ങുകയായിരുന്നു. വിമതര്‍ ക്രിസ്ത്യന്‍ പള്ളികളും ഭവനങ്ങളും ആക്രമിച്ചതായി ഗ്രാമവാസികള്‍ പറഞ്ഞെന്ന് വാര്‍ത്താ ഏജന്‍സി റിപ്പോര്‍ട്ട് ചെയ്തു.

അതേസമയം, ഗ്രാമത്തിലെ പള്ളികളെല്ലാം സുരക്ഷിതമാണെന്നു സര്‍ക്കാര്‍ ടെലിവിഷന്‍ റിപ്പോര്‍ട്ട് ചെയ്തു. പട്ടാളത്തിന്റെ ആക്രമണത്തില്‍ വിമതര്‍ക്ക് കനത്ത നാശം നേരിട്ടതായും അവകാശപ്പെട്ടു.


അല്‍ക്വയ്ദയുമായി ബന്ധപ്പെട്ടു പ്രവര്‍ത്തിക്കുന്ന അല്‍നുസ്ര വിമതഗ്രൂപ്പ് രണ്ടു വര്‍ഷമായി സിറിയയില്‍ പോരാട്ടം നടത്തുന്നു. ഇറാക് അടക്കം യുദ്ധമേഖലകളില്‍ പ്രവര്‍ത്തിച്ചു പരിചയമുള്ള പോരാളികളെ ഇറക്കിയാണ് ഇവര്‍ അസാദിനെതിരേ യുദ്ധം നടത്തുന്നത്.

രണ്േടകാല്‍ കോടി വരുന്ന സിറിയന്‍ ജനസംഖ്യയുടെ പത്തുശതമാനം ക്രൈസ്തവരാണ്. അസാദിനോട് അനുകൂല മനോഭാവം പുലര്‍ത്തുന്നതിനാല്‍ ക്രൈസ്തവ വിഭാഗം മുമ്പും വിമത ആക്രമണത്തിനിരയായിട്ടുണ്ട്.

ഏതാനും മാസങ്ങള്‍ക്കു മുമ്പ് രണ്ട് ഓര്‍ത്തഡോക്സ് ബിഷപ്പുമാരെ വിമതര്‍ തട്ടിക്കൊണ്ടുപോ യിരുന്നു.