പുതിയ പെരിസ്ട്രോയിക വേണമെന്നു ഗോര്‍ബച്ചേവ്
മോസ്കോ: റഷ്യയില്‍ പുതിയ പെരിസ്ട്രോയിക(പുനസംഘടന)വേണമെന്ന് മുന്‍ സോവ്യറ്റ് നേതാവ് മിഖായല്‍ ഗോര്‍ബച്ചേവ് അഭിപ്രായപ്പെട്ടു. ഗോര്‍ബച്ചേവ് നടപ്പാക്കിയ ആദ്യ പെരിസ്ട്രോയികയാണു റഷ്യയില്‍ സ്വാതന്ത്യ്രവും ജനാധിപത്യവും കൊണ്ടുവന്നതും സോവ്യറ്റ് യൂണിയന്റെ തകര്‍ച്ചയ്ക്കിടയാക്കിയതും.

ഇന്നത്തെ റഷ്യയില്‍ ആരോഗ്യ,വിദ്യാഭ്യാസ, ശാസ്ത്ര മേഖലകളില്‍ തളര്‍ച്ചയാണന്നും ഇതു പരിഹരിക്കാന്‍ പുതിയ ഭരണകൂടം ആവശ്യമാണെന്നും മോസ്കോയില്‍ നടത്തിയ പ്രഭാഷണത്തില്‍ ഗോര്‍ബച്ചേവ് പറഞ്ഞു. ആധുനികവത്കരണവും അധികാര വികേന്ദ്രീകരണവുമാണു താന്‍ ലക്ഷ്യമിട്ടതെന്നും സോവ്യറ്റ് യൂണിയന്റെ പിരിച്ചുവിടല്‍ ഉദ്ദേശിച്ചിരുന്നില്ലെന്നും ഗോര്‍ബച്ചേവ് പറഞ്ഞു. സോവ്യറ്റ് യൂണിയന്റെ തകര്‍ച്ചയ്ക്കു തന്നെ കുറ്റപ്പെടുത്തുന്നതില്‍ അര്‍ഥമില്ലെന്നും അദ്ദേഹം പറഞ്ഞു.


ഗോര്‍ബച്ചേവിന്റെ നിര്‍ദേശങ്ങളെ തങ്ങള്‍ പിന്തുണയ്ക്കുന്നില്ലെന്നും ഇനി ഒരു പെരിസ്ട്രോയിക അസാധ്യമാണെന്നും പ്രസിഡന്റ് പുടിന്റെ പ്രസ് സെക്രട്ടറി ദിമിത്രി പെസ്കോവ് പ്രതികരിച്ചു.