ദീപാവലിക്കു പിന്നാലെ ഡൽഹിയിൽ അന്തരീക്ഷം കൂടുതൽ കലുഷിതം : Deepika.com National News |

ന്യൂഡൽഹി: ലോകത്ത് ഏറ്റവുമധികം ആളുകൾ മരിക്കുന്നത് അന്തരീക്ഷ മലിനീകരണം മൂലമാണെന്ന റിപ്പോർട്ടിൽ ഇന്ത്യ ഒന്നാമത് നിൽക്കുന്നതിനിടെ, ദീപാവലിക്കുശേഷം ഡൽഹിയിലെ കാലാവസ്ഥ കൂടുതൽ ഗുരുതരമായി.

ഇന്നലെ തലസ്ഥാന നഗരത്തിലെ അന്തരീക്ഷം കരിയും പുകയും നിറഞ്ഞതായിരുന്നു. പടക്കങ്ങളുടെ വിൽപനയ്ക്ക് സുപ്രീംകോടതി വിലക്കുണ്ടായിരുന്നെങ്കിലും പൊട്ടിക്കുന്നതിന് അതൊരു തടസമായില്ല. സെൻട്രൽ പൊലൂഷൻ കണ്‍ട്രോൾ ബോർഡിന്‍റെ എയർ ക്വാളിറ്റി ഇൻഡെക്സിൽ ഇത്തവണ 319 ആണ് രേഖപ്പെടുത്തിയത്. കഴിഞ്ഞ വർഷം ഇത് 431 ആയിരുന്നു.

ദീപാവലിക്കുശേഷം ഡൽഹിയിലെ മിക്ക പ്രദേശങ്ങളിലും ജീവന് അപകടകരമായ അളവാണു രേഖപ്പെടുത്തിയത്. ശ്വാസകോശത്തിൽ പ്രവേശിച്ചു രക്തത്തിൽ കലർന്ന് മനുഷ്യരെ രോഗാവസ്ഥയിലാക്കുന്ന പിഎം 2.5, പിഎം 10 എന്നിവയുടെ അളവ് കുത്തനെ ഉയരുകയായിരുന്നു.

അടുത്ത വർഷം മാർച്ച് 15 വരെ ഡീസൽ ജനറേറ്ററുകൾ പ്രവർത്തിപ്പിക്കുന്നത് സർക്കാർ നിരോധിച്ചിട്ടുണ്ട്. ഇതിൽ അവശ്യ സേവനങ്ങളിൽ ഉൾപ്പെട്ട ആശുപത്രികൾ, മൊബൈൽ ടവറുകൾ, മെട്രോ റെയിൽവെ എന്നിവയെ ഒഴിവാക്കിയിട്ടുണ്ട്. ഇതു കൂടാതെ ബദർപൂരിലെ താപവൈദ്യുതി നിലയത്തിന്‍റെ പ്രവർത്തനവും ഇടക്കാലത്തേക്കു നിർത്തിവച്ചിട്ടുണ്ട്.

വരും ദിവസങ്ങളിൽ കൂടുതൽ നിയന്ത്രണങ്ങൾ കൊണ്ടുവരുന്നതും ഡൽഹി മലിനീകരണ നിയന്ത്രണ ബോർഡ് ആലോചിക്കുന്നുണ്ട്.