കറൻസി ഇടപാട് രണ്ടു ലക്ഷം വരെ മാത്രം : Deepika.com National News |

ന്യൂഡൽഹി: കറൻസി കൈമാറ്റപരിധി രണ്ടു ലക്ഷം രൂപയായി കുറയ്ക്കും. മൂന്നു ലക്ഷം രൂപ പരിധിയാക്കും എന്നായിരുന്നു പൊതുബജറ്റിൽ പ്രഖ്യാപിച്ചത്. ഇന്നലെ ധനകാര്യബിൽ ലോക്സഭയിൽ ചർച്ചയ്ക്കെടുത്തപ്പോഴാണ് പരിധി രണ്ടുലക്ഷമായി കുറയ്ക്കാനുള്ള ഭേദഗതി ധനമന്ത്രി അരുൺ ജയ്‌റ്റ്‌ലി അവതരിപ്പിച്ചത്.

ഒരു ദിവസം ഒരു ഇടപാടുമായി ബന്ധപ്പെട്ടുള്ള പണകൈമാറ്റം രണ്ടു ലക്ഷം രൂപയിൽ കൂടുതലായാൽ നിയമവിരുദ്ധമാകും. എത്ര തുകയാണോ കൈമാറിയത് അത്രയും പിഴയായി ഈടാക്കും.രാഷ്‌ട്രീയ പാർട്ടികൾക്കു സംഭാവന നല്കുന്നതിന് ഇലക്ടറൽ ബോണ്ടുകൾ ഇറക്കുന്നതിനു വ്യവസ്ഥ ചെയ്യുന്ന ഭേദഗതിയും ധനകാര്യബില്ലിൽ കൊണ്ടുവന്നിട്ടുണ്ട്. ഈ ബോണ്ടുകളിൽ ആരാണു പണം നിക്ഷേപിച്ചതെന്നു വെളിപ്പെടുത്തേണ്ടെന്ന ഭേദഗതി ജനപ്രാതിനിധ്യ നിയമത്തിലും വരുത്തുന്നുണ്ട്.

കേന്ദ്രത്തിന്‍റെ കീഴിൽ പ്രവർത്തിക്കുന്ന 40 ട്രൈബ്യൂണലുകൾ 12 എണ്ണമാക്കി ചുരുക്കുന്നതിനുള്ള ഭേദഗതിയും ധനകാര്യബില്ലിൽ ചേർത്തു.രാജ്യസഭയിൽ എതിർപ്പുണ്ടാകും എന്നതുകൊണ്ടാണ് ഇവ ധനകാര്യബില്ലിൽ പെടുത്തിയത്. രാജ്യസഭയിൽ സർക്കാരിനു ഭൂരിപക്ഷമില്ല. ധനകാര്യബിൽ രാജ്യസഭ ചർച്ച ചെയ്താൽ മതി; വോട്ടിനിട്ടു പാസാക്കേണ്ടതില്ല. മറ്റു ബില്ലുകൾ പാസാക്കണം.