മണി ബാംഗളൂരില്‍ സിനിമാ തിരക്കില്‍, കേസ് നിയമപരമായി നേരിടും
ചാലക്കുടി: വനപാലകരെ ആക്രമിച്ചെന്ന കേസില്‍ പ്രതിയായ കലാഭവന്‍ മണി സിനിമാ ഷൂട്ടിംഗിനായി ബാംഗളൂരില്‍. മിനിയാന്ന് ആശുപത്രിയില്‍നിന്നു ഡിസ്ചാര്‍ജ് ചെയ്തശേഷം വീട്ടിലെത്തി വിശ്രമിച്ചശേഷം മണി വൈകിട്ടുതന്നെ ബാംഗളൂരിലേക്കു പോവുകയായിരുന്നു.

ഒരു മലയാള സിനിമയുടെ ഷൂട്ടിംഗിനായി ബുധനാഴ്ച രാവിലെ ബാംഗളൂരിലേക്കു മണി പുറപ്പെടാനിരിക്കെയാണു ചൊവ്വാഴ്ച രാത്രി അതിരപ്പിള്ളിയില്‍ വനപാലകരുമായി സംഘര്‍ഷമുണ്ടായത്. കേസ് നിയമപരമായി നേരിടാനാണു മണിയുടെ തീരുമാനം. അതിനുള്ള നടപടികള്‍ ആരംഭിച്ചശേഷമാണു മണി പോയത്. ഇപ്പോള്‍ രണ്ടു തമിഴ് സിനിമകളിലും മൂന്നു മലയാളം സിനിമകളിലും അഭിനയിച്ചുവരികയാണു മണി. തിരിച്ചുവന്നശേഷം ഭാവിപരിപാടികള്‍ തീരുമാനിക്കുമെന്നു മണിയുമായി ബന്ധപ്പെട്ടവര്‍ പറഞ്ഞു.

വനപാലകര്‍ ഉയര്‍ത്തിയ ആരോപണങ്ങള്‍ മണി നിഷേധിച്ചു. അതിരപ്പിള്ളിയില്‍നിന്നു രാത്രി മടങ്ങുമ്പോള്‍ കണ്ണന്‍കുഴിയില്‍ വനപാലകര്‍ റിസോര്‍ട്ട് ജീവനക്കാരനായ സുഭാഷ് എന്ന യുവാവിനെ ബൈക്ക് തടഞ്ഞുനിര്‍ത്തി ചോദ്യം ചെയ്യുകയായിരുന്നു. ഈ സമയത്താണു താനും ഡോക്ടറുടെ കുടുംബവും കാറില്‍ അവിടെയെത്തിയതെന്നു മണി പറയുന്നു. മണിയെ തിരിച്ചറിഞ്ഞെങ്കിലും വാഹനത്തില്‍ യുവതിയെ കണ്ടപ്പോള്‍ വനപാലകര്‍ക്കു സംശയം ഉണ്ടായതാണു പ്രശ്നത്തിനു കാരണമത്രേ.

കാറിന്റെ ഡിക്കി തുറക്കാന്‍ ആവശ്യപ്പെട്ടപ്പോള്‍ മണി ആദ്യം വിസമ്മതിച്ചെങ്കിലും കൂടെയുണ്ടായിരുന്ന ഡോ.ഗോപിനാഥന്‍ ഡിക്കി തുറന്നുകൊടുത്തു. ഡിക്കിക്കകത്തു വസ്ത്രങ്ങള്‍ മാത്രമാണ് ഉണ്ടായിരുന്നത്. എന്നാല്‍, കാറിലുണ്ടായിരുന്ന സ്ത്രീയെ സംശയിച്ച വനപാലകരില്‍ ഒരാള്‍ സ്ത്രീയെ ചോദ്യംചെയ്യാന്‍ തുടങ്ങുകയും വസ്ത്രത്തില്‍ പിടിച്ചുവലിക്കുകയും ചെയ്തപ്പോഴാണു മണി ക്ഷോഭിച്ചതത്രെ. തുടര്‍ന്നു വനപാലകരുമായി വാക്കുതര്‍ക്കം ഉണ്ടാകുകയും മണി ആദ്യം കാറോടിച്ചുപോകുകയും ചെയ്തു.


എന്നാല്‍, തന്നോടൊപ്പമുണ്ടായിരുന്ന കുടുംബത്തെ അപമാനിച്ചതില്‍ രോഷംകൊണ്ട മണി തിരിച്ചുവന്ന് വനപാലകരുമായി വീണ്ടും ഇക്കാര്യത്തെക്കുറിച്ചു തര്‍ക്കിച്ചു. വാക്കുതര്‍ക്കത്തിനിടെ ഒരു ഫോറസ്റ് ഉദ്യോഗസ്ഥന്‍ വടികൊണ്ടു തന്റെ നെറ്റിയില്‍ അടിച്ചെന്നു മണി ആരോപിക്കുന്നു. ഇതോടെ സംഘട്ടനമുണ്ടായി. മണിയോടൊപ്പം ഉണ്ടായിരുന്ന ഡോ.ഗോപിനാഥിന്റെ ഭാര്യ ജയ സംഭവത്തെക്കുറിച്ചു പോലീസില്‍ മൊഴി നല്കിയിട്ടുണ്ട്.

കേസ് സംബന്ധിച്ച് പോലീസ് കൂടുതല്‍ അന്വേഷണം നടത്തിവരുകയാണ്. അതേസമയം, തങ്ങളുടെ പരാതിയില്‍ ശക്തമായി ഉറച്ചുനില്‍ക്കുകയാണു ഫോറസ്റ് ഉദ്യോഗസ്ഥര്‍. കേസ് ഒത്തുതീര്‍ക്കാന്‍ ചില കേന്ദ്രങ്ങള്‍ ശ്രമം നടത്തിയെങ്കിലും വിജയിച്ചില്ല. ജാമ്യമില്ലാ വകുപ്പു പ്രകാരമാണു മണിക്കെതിരേ കേസ് രജിസ്റര്‍ ചെയ്തിരിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.