അഞ്ചുവയസുകാരിയെ പീഡിപ്പിച്ച സംഭവം: രാഷ്ട്രപതിയും പ്രധാനമന്ത്രിയും ആശങ്ക പ്രകടിപ്പിച്ചു
പ്രത്യേക ലേഖകന്‍

ന്യൂഡല്‍ഹി: തലസ്ഥാനത്ത് അഞ്ചു വയസുകാരിയെ ക്രൂരമായി പീഡിപ്പിച്ച സംഭവത്തില്‍ പ്രധാനമന്ത്രി മന്‍മോഹന്‍ സിംഗിനു പിന്നാലെ രാഷ്ട്രപതി പ്രണാബ് മുഖര്‍ജി, ഉപരാഷ്ട്രപതി ഹമീദ് അന്‍സാരി, യുപിഎ അധ്യക്ഷ സോണിയ ഗാന്ധി തുടങ്ങിയവര്‍ കടുത്ത പ്രതിഷേധവും ആശങ്കയും അറിയിച്ചു.

ഡല്‍ഹിയില്‍ അഞ്ചു വയസുകാരി ലൈംഗികപീഡനത്തിനിരയായ സംഭവം നടുക്കുന്നതും ആശങ്കാജനകവുമാണെന്നു രാഷ്ട്രപതി പറഞ്ഞു. വനിതകള്‍ക്കും കുട്ടികള്‍ക്കും സുരക്ഷ ഉറപ്പാക്കുന്നതിലെ തുടര്‍ച്ചയായ വീഴ്ചകളെക്കുറിച്ചും മൂല്യശോഷണത്തെക്കുറിച്ചും ആത്മപരിശോധന വേണമെന്നു പ്രണാബ് മുഖര്‍ജി ഓര്‍മിപ്പിച്ചു. പെണ്‍കുഞ്ഞിന്റെ ആരോഗ്യത്തിനായി പ്രാര്‍ഥിക്കുന്നു. സാധ്യമായ ഏറ്റവും മികച്ച ചികില്‍സ ലഭ്യമാക്കണമെന്നും രാഷ്ട്രപതി ആവശ്യപ്പെട്ടതായി മാധ്യമസെക്രട്ടറി വേണു രാജാമണി പറഞ്ഞു.

പെണ്‍കുട്ടികള്‍ക്കു നേരേ നടക്കുന്ന അതിക്രമങ്ങള്‍ അവസാനിപ്പിക്കാന്‍ പ്രസ്താവനകളല്ല, കര്‍ക്കശ നടപടികളാണു സര്‍ക്കാരുകള്‍ സ്വീകരിക്കേണ്ടതെന്നു കോണ്‍ഗ്രസ് പ്രസിഡന്റ് സോണിയ ഗാന്ധി ചൂണ്ടിക്കാട്ടി. രാജ്യത്തിനാകമാനം ഇതു നാണക്കേടാണ്. മുന്‍പ് ഓടുന്ന ബസില്‍ യുവതിയെ മാനഭംഗപ്പെടുത്തി. ഇപ്പോള്‍ പിഞ്ചുകുട്ടിയോടും ക്രൂരത ആവര്‍ത്തിച്ചിരിക്കുന്നു. ഇത് അവസാനിപ്പിക്കേണ്ടിയിരിക്കുന്നു. രാജ്യത്തെ മുഴുവന്‍ ജനങ്ങളും കരുതലോടെയും ജാഗ്രതയോടെയും ഇരുന്നാല്‍ മാത്രമേ പ്രശ്നത്തിനു പരിഹാരം കാണാനാകൂ. സോണിയ ഗാന്ധി വൈകുന്നേരം കുട്ടിയെ സന്ദര്‍ശിച്ചു.


നിഷ്ഠുരമായ ഇത്തരം സംഭവങ്ങള്‍ ആവര്‍ത്തിക്കുന്നതിനെക്കുറിച്ച്എല്ലാവരും ആത്മപരിശോധന നടത്തണമെന്നു ഉപരാഷ്ട്രപതി ഹമീദ് അന്‍സാരി പറഞ്ഞു. സ്ത്രീകളോടുള്ള മനോഭാവത്തില്‍ മാറ്റം വരുത്തേണ്ടതുണ്ട്. ഇത്തരം തെറ്റു ചെയ്യുന്നവരെ നിയമത്തിനു മുന്നിലെത്തിച്ചു കര്‍ശന ശിക്ഷ ഉറപ്പാക്കണമെന്നും അദ്ദേഹം പറഞ്ഞു.

പിഞ്ചുകുട്ടിയെ മാനഭംഗപ്പെടുത്തുന്നവര്‍ക്കു വധശിക്ഷ നല്‍കുന്നതിനെക്കുറിച്ചു ഗൌരവമായി ആലോചിക്കണമെന്നു പ്രതിപക്ഷനേതാവ് സുഷമ സ്വരാജ് ആവശ്യപ്പെട്ടു.