രവിയും അഹമ്മദും സൌദിക്ക്
ജോര്‍ജ് കള്ളിവയലില്‍

ന്യൂഡല്‍ഹി: സൌദി അറേബ്യയിലെ സ്വദേശിവത്കരണവുമായി ബന്ധപ്പെട്ട പ്രവാസികളുടെ പ്രശ്നത്തിനു രമ്യമായ പരിഹാരം തേടി പ്രവാസികാര്യമന്ത്രി വയലാര്‍ രവിയും വിദേശകാര്യ സഹമന്ത്രി ഇ. അഹമ്മദും സൌദിയിലേക്ക്. പ്രധാനമന്ത്രി മന്‍മോഹന്‍ സിംഗുമായി ഇന്നലെ നടത്തിയ ചര്‍ച്ചയുടെ തുടര്‍ച്ചയായി വിദേശകാര്യ മന്ത്രി സല്‍മാന്‍ ഖുര്‍ഷിദുമായി താനും അഹമ്മദും ഇന്നു ചര്‍ച്ച നടത്തി സൌദി യാത്രയുടെ വിശദാംശങ്ങള്‍ തീരുമാനിക്കുമെന്നു വയലാര്‍ രവി പറഞ്ഞു.

കേരളത്തില്‍നിന്നുള്ള കേന്ദ്രമന്ത്രിമാരായ വയലാര്‍ രവി, ഇ. അഹമ്മദ്, കെ.സി. വേണുഗോപാല്‍, കൊടിക്കുന്നില്‍ സുരേഷ്, ശശി തരൂര്‍ എന്നിവര്‍ ഇന്നലെ രാത്രി രവിയുടെ വസതിയില്‍ യോഗം ചേര്‍ന്നു പ്രവാസികളുടെ പ്രശ്നത്തില്‍ സ്വീകരിക്കേണ്ട അനന്തര നടപടികള്‍ ചര്‍ച്ച ചെയ്തു. പ്രധാനമന്ത്രിയുടെ ഉപദേഷ്ടാവ് ടി.കെ.എ. നായര്‍, ഇ.ടി. മുഹമ്മദ് ബഷീര്‍ എംപി എന്നിവരും യോഗത്തില്‍ പങ്കെടുത്തു. പ്രതിരോധ മന്ത്രി എ.കെ. ആന്റണിയും കേരളത്തിലായിരുന്ന മന്ത്രിമാരായ കെ.വി. തോമസും മുല്ലപ്പള്ളി രാമചന്ദ്രനും യോഗത്തിനെത്തിയില്ല.

സൌദിയിലെ ഇന്ത്യക്കാരായ തൊഴിലാളികളുടെ പ്രശ്നം മാനുഷികമായി പരിഹരിക്കണമെന്നു സൌദി ഭരണാധികാരികളോട് അഭ്യര്‍ഥിച്ചു പ്രശ്ന പരിഹാരത്തിനാണു ശ്രമിക്കുന്നതെന്നു ചര്‍ച്ചയ്ക്കുശേഷം രവിയും അഹമ്മദും പറഞ്ഞു. സൌദിയിലെ പുതിയ നിയമത്തിന്റെ അടിസ്ഥാനത്തില്‍ തൊഴില്‍ നഷ്ടപ്പെട്ടു മടങ്ങിവരുന്നവരുടെ യാത്രച്ചെലവുകള്‍ തന്റെ മന്ത്രാലയത്തിനു കീഴിലുള്ള പ്രവാസി ക്ഷേമനിധിയില്‍ നിന്നു ചെലവഴിക്കുമെന്നു വയലാര്‍ രവി അറിയിച്ചു. പ്രാവസികാര്യമന്ത്രാലയത്തിന്റെ സഹകരണത്തോടെ ദമാമില്‍ ഇന്ത്യന്‍ എംബസിയുടെ പ്രത്യേക കേന്ദ്രം തുറക്കാനും തീരുമാനമായിട്ടുണ്ട്. ദമാമിലെ കേന്ദ്രത്തില്‍ ഉദ്യോഗസ്ഥന്റെ സേവനം ഉറപ്പാക്കുമെന്ന് ഇ. അഹമ്മദും പറഞ്ഞു.ഇതേസമയം, സൌദിയിലേക്കുള്ള പ്രതിനിധി സംഘത്തെ സംബന്ധിച്ചു തര്‍ക്കം ശേഷിക്കുന്നുവെന്ന സംശയമാണു ഇന്നലെ രാത്രി മന്ത്രിമാരുടെ യോഗത്തിനു ശേഷം പ്രകടമായത്. സംഘത്തില്‍ ആരൊക്കെയുണ്ടാകണമെന്നു പ്രധാനമന്ത്രിയാണു തീരുമാനിക്കേണ്ടതെന്നും വിദേശകാര്യമന്ത്രി ഖുര്‍ഷിദുമായി ഇന്നു നടത്തുന്ന ചര്‍ച്ചയ്ക്കുശേഷം തീരുമാനിക്കുമെന്നുമാണ് അഹമ്മദ് പറഞ്ഞത്. സംഘത്തെ നയിക്കാന്‍ വയലാര്‍ രവിയോടു പ്രധാനമന്ത്രി നിര്‍ദേശിച്ചതായി രവി പറഞ്ഞുവെന്നാണു അഹമ്മദ് വിശദീകരിച്ചത്.


ഈ സമയം, സംഘത്തെ താന്‍ നയിക്കുമെന്നും അഹമ്മദ് ഒപ്പമുണ്ടാകുമെന്നും രവി പറഞ്ഞു. സൌദിയുടെ അംബാസഡറുമായി മന്ത്രി അഹമ്മദ് ഇന്നലെ ഇക്കാര്യം ചര്‍ച്ച ചെയ്തു. മാനുഷിക പരിഗണനയോടെ പ്രശ്നത്തെ കാണണമെന്ന ആവശ്യം അംബാസഡര്‍ സൌദി അധികാരികളെ അറിയിച്ചുവെന്നു അഹമ്മദ് പറഞ്ഞു.