കോട്ടയം: കേന്ദ്ര തൊഴിൽ മന്ത്രാലയത്തിന്റെ നേതൃത്വത്തിൽ കോട്ടയത്ത് തൊഴിൽമേള നടത്തും. കോട്ടയം സിഎംഎസ് കോളജിൽ ഒക്്ടോബർ 22നു രാവിലെ ഒന്പതുമുതൽ വൈകുന്നേരം നാലുവരെയാണു മേള. തൊഴിൽ രഹിതർക്ക് സ്വകാര്യ മേഖലയിൽ തൊഴിൽ ലഭിക്കുന്നതിനാണു മേള.
ദേശീയ തൊഴിൽ സേവനകേന്ദ്രവും കൊച്ചി സൊസൈറ്റി ഫോർ ഇന്റഗ്രേറ്റഡ് ഗ്രോത്ത് ഓഫ് ദി നേഷൻ (എസ്ഐജിഎൻ), കേരള ചേന്പർ ഓഫ് കൊമേഴ്സ് ആൻഡ് ഇൻഡസ്ട്രി (കെസിസിഐ) എന്നിവരുമായി സഹകരിച്ചാണു മേള സംഘടിപ്പിക്കുന്നത്.
മൾട്ടി നാഷണൽ കന്പനികൾ മുതൽ ചെറുതും വലുതുമായ അന്പതിൽപ്പരം കന്പനികൾ പങ്കെടുക്കും. അയ്യായിരം തൊഴിലവസരങ്ങൾ മേളയിൽനിന്നു ലഭിക്കുമെന്ന് സംഘാടകർ പറഞ്ഞു.
കേന്ദ്ര, സംസ്ഥാന സർക്കാരുകളുടെ വിവിധ സ്ഥാപനങ്ങൾ ജനങ്ങൾക്കുവേണ്ടി ചെയ്യുന്ന പദ്ധതികളെക്കുറിച്ച് അതത് സ്ഥാപനത്തിലെ ഉദ്യോഗസ്ഥർ മേളയിൽ വിശദീകരിക്കും.
ഉദ്യോഗാർഥികളോ തൊഴിൽദായകരോ ഫീസ് നൽകേണ്ടതില്ല. 25,000 ഉദ്യോഗാർഥികളെ പ്രതീക്ഷിക്കുന്നതായി സംഘാടകർ പറഞ്ഞു.
രാവിലെ ഒന്പതു മുതൽ മേളയിൽ പങ്കെടുക്കാം. പിന്നീട് വരുന്ന ഒഴിവുകളിലേക്ക് പരിഗണിക്കുന്നതിനായി www.nc s.go v.in എന്ന വെബ് സൈറ്റിൽ ജോബ് സീക്കറായി പേര് രജിസ്റ്റർ ചെയ്യാം.
വിശദവിവരങ്ങൾക്ക്: 0471 2332113, 8304009409.
പത്രസമ്മേളനത്തിൽ സബ് റീജണൽ എംപ്ലോയ്മെന്റ് ഓഫീസർ പി.ജി. രാമചന്ദ്രൻ, സൊസൈറ്റി ഫോർ ഇന്റഗ്രേറ്റഡ് ഗ്രോത്ത് ഓഫ് ദി നേഷൻ പ്രതിനിധി രൂപേഷ് ആർ. മേനോൻ, കെസിസിഐ പ്രതിനിധി അഖിൽ രവീന്ദ്രൻ എന്നിവർ പങ്കെടുത്തു.
ആർക്കെല്ലാം പങ്കെടുക്കാം ?
അഞ്ചാം ക്ലാസ് മുതൽ ബിരുദാനന്തരബിരുദം വരെയുള്ളവർക്ക് പങ്കെടുക്കാം. വയസ്, തൊഴിൽ പരിചയം തെളിയിക്കുന്ന സർട്ടിഫിക്കറ്റും നാല് സെറ്റ് ബയോഡാറ്റയും കരുതണം. രാവിലെ ഒന്പതു മുതൽ മേള നടക്കുന്ന കേന്ദ്രത്തിലെത്തി പേര് രജിസ്റ്റർ ചെയ്യണം.യോഗ്യത, പ്രായപരിധി എന്നിവ മേളയിൽ പങ്കെടുക്കുന്ന സ്ഥാപനങ്ങളിൽനിന്നും ലഭിക്കും. കന്പനികളുടെ കൗണ്ടറുകളിലെത്തി ഇന്റർവ്യൂവിൽ പങ്കെടുക്കാം.ഒരു ഉദ്യോഗാർഥിക്ക് നാല് ഇന്റർവ്യൂവിനു പങ്കെടുക്കാം.
പങ്കെടുക്കുന്ന പ്രധാന കന്പനികൾ
യൂറേക്കാ ഫോബ്സ്, ലാർസൻ ആൻഡ് ട്യൂബ്രോ, മാഴ്സ് ഇന്റലക്ച്വൽ സർവീസസ് പ്രൈവറ്റ് ലിമിറ്റഡ്, മലബാർ ഗ്രൂപ്പ്, ഐക്യ ഗ്ലോബൽ സൊല്യൂഷൻസ്, പിള്ളാസ് കോർപറേറ്റ് പനാഷ്യ, പോപ്പുലർ മോട്ടോർ കോർപറേഷൻ, റിയൽ, സെറോഫൈറ്റ്, ഒഎംആർ ഗ്രൂപ്പ്, എസിഎംഇ ഇന്റർനാഷ്ണൽ, ഫോർച്യൂണ്, എക്സൈസ് ലൈഫ് ഇൻഷുറൻസ്, ലീഡ്സ്, താജ് ഹോട്ടൽസ്, സ്റ്റാർ ഹെൽത്ത് ആൻഡ് അലൈഡ് ഇൻഷ്വറൻസ് കന്പനി ലിമിറ്റഡ്, ഗ്ലോബോണ് ഫിനാൻസ്, റെഡ്സണ് സോഫ്റ്റെക്, സദർലാന്റ്, എൻസൈൻ, പ്രസാദ് പ്രോട്ടോണ്സ്, ബ്രിറ്റ്കോ ആൻഡ് ബ്രിഡ്കോ, ഡീൽസ്, പാലസ് ഹോണ്ട, വോക്സ്ബേ സൊല്യൂഷൻസ്, ഇന്നവേറ്റീവ് ട്രേഡിംഗ് എൽഎൽസി, എസ്എസ് ടെക്നോവേഷൻ, ബ്രൈറ്റ് ഫ്യൂച്ചർ കണ്സൾട്ടന്റ്സ്, സീകോയ് ടെക്നോളജീസ് പ്രൈവറ്റ് ലിമിറ്റഡ്, പിഎൻബി മെറ്റ് ലൈഫ്, എൽഐസി, ഇസാഫ് ബാങ്ക്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.