തിളക്കമാർന്ന സേവനചരിത്രവുമായി ഷീല തോമസ് പടിയിറങ്ങുന്നു : Deepika.com Kerala News |

Click here for detailed news of all items

തിളക്കമാർന്ന സേവനചരിത്രവുമായി ഷീല തോമസ് പടിയിറങ്ങുന്നു

Thursday, March 30, 2017 1:07 PM IST

കോട്ടയം: 32 വർഷത്തെ സിവിൽ സർവീസിൽനിന്നു ഷീല തോമസ് വിരമിക്കുന്നു. ഏറ്റെടുത്ത എല്ലാ ചുമതലകളിലും മികവു പുലർത്തിയ ഷീല എന്നും എല്ലാവർക്കും സ്വീകാര്യയായിരുന്നു.

പൊതുഭരണ അഡീഷണൽ ചീഫ് സെക്രട്ടറി പദവിയിൽനിന്നാണ് ഇന്നു ഷീല വിരമിക്കുന്നത്. 1985 ഐഎഎസ് ബാച്ചുകാരിയായ ഷീല തോമസ് ചെങ്ങന്നൂർ സബ് കളക്ടറായാണു സേവനം തുടങ്ങിയത്. റബറിന്‍റെ സംസ്കാരവും കാർഷിക കുടുംബ പശ്ചാത്തലവുള്ള ഷീല റബർ ബോർഡ് ചെയർപേഴ്സണ്‍ എന്ന നിലയിൽ റബർ മേഖലയ്ക്കു കരുത്തും ഉണർവും പകർന്നു. റബറിനു മികച്ച വില ഉറപ്പാക്കുന്നതിലും നേട്ടങ്ങൾ സമ്മാനിച്ചു.

1993-95 കാലയളവിൽ കോട്ടയം ജില്ലയിൽ കളക്ടറായി സേവനമനുഷ്ഠിച്ചിട്ടുണ്ട്. കോട്ടയം ജില്ലയിൽ മാത്രമാണ് കളക്ടർ പദവി വഹിച്ചത്. സാമൂഹിക ക്ഷേമ വകുപ്പ്, സിവിൽ സപ്ലൈസ് വകുപ്പുകളിൽ മികച്ച പ്രവർത്തനം കാഴ്ചവച്ച ഷീല തോമസ് വ്യവസായ വകുപ്പ് ഡയറക്ടറായും കൃഷിവകുപ്പ് സെക്രട്ടറിയായും പ്രവർത്തിച്ചു.

സഹകരണ വകുപ്പ് രജിസ്ട്രാർ, സെൻസസ് ഡയറക്ടർ, ട്രാൻസ്പോർട്ട് സെക്രട്ടറി തുടങ്ങിയ സുപ്രധാന വകുപ്പുകളുടെ ചുമതലക്കാരിയായി. വി.എസ്. അച്യുതാനന്ദൻ മുഖ്യമന്ത്രിയായിരുന്നപ്പോൾ പ്രിൻസിപ്പൽ സെക്രട്ടറിയായി നിയമിതയായി. 2011-14 കാലഘട്ടത്തിൽ റബർ ബോർഡിന്‍റെ ചെയർപേഴ്സണായി. റബർ മേഖലയിലെ പ്രവർത്തന മികവിനുള്ള അംഗീകാരമായി അന്താരാഷ്‌ട്ര റബർ ഉത്പാദക രാജ്യങ്ങളുടെ സംഘടനയുടെ സെക്രട്ടറി ജനറലായും തെരഞ്ഞെടുക്കപ്പെട്ടു. കാഞ്ഞിരപ്പള്ളി കരിപ്പാപ്പറന്പിൽ ജേക്കബി (കുട്ടപ്പൻ)ന്‍റെ ഭാര്യയാണ് ഷീല തോമസ്. ദീപു, പരേതനായ റെഞ്ചു എന്നിവരാണ് മക്കൾ.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.