എംജി വാഴ്സിറ്റി കൺവൻഷൻ സെന്‍ററിനു ഗവർണർ ശിലയിട്ടു : Deepika.com Kerala News |

Click here for detailed news of all items

എംജി വാഴ്സിറ്റി കൺവൻഷൻ സെന്‍ററിനു ഗവർണർ ശിലയിട്ടു

Wednesday, March 29, 2017 11:58 AM IST

കോട്ടയം: കലാശാലകൾ വിജ്ഞാന സന്പാദനത്തിന്‍റെ മഹാപാഠശാലകളായി വളരണമെന്നു ഗവർണർ ജസ്റ്റീസ് പി. സദാശിവം. കേരളത്തിലെ ഏറ്റവും മികച്ച സർവകലാശാലയായി തെരഞ്ഞെടുക്കപ്പെട്ട എംജി സർവകലാശാലയ്ക്ക് അനുവദിച്ച അഞ്ചു കോടി രൂപ ഉപയോഗിച്ചു നിർമിക്കുന്ന അന്താരാഷ്‌ട്ര അക്കാദമിക് കണ്‍വൻഷൻ സെന്‍ററിന്‍റെ ശിലാസ്ഥാപനം എംജിയിൽ നിർവഹിക്കുകയായിരുന്നു അദ്ദേഹം.

വിദ്യാസന്പന്നരായ യുവാക്കൾക്കു കൂടുതൽ തൊഴിലവസരങ്ങളൊരുക്കി സുരക്ഷിതഭാവി ഉറപ്പാക്കുകയും വിദ്യാർഥികളും അധ്യാപകരുമായി കൂടുതൽ അടുത്ത ഇടപെടലുകൾ ഉണ്ടാകുകയും ചെയ്താൽ വിദ്യാർഥി സമൂഹത്തിന്‍റെ ശാരീരികവും മാനസികവുമായ ക്ഷേമത്തിനു വഴിയൊരുങ്ങുമെന്നു ഗവർണർ അഭിപ്രായപ്പെട്ടു.സർവകലാശാലാ വൈസ്ചാൻസിലർ ഡോ. ബാബു സെബാസ്റ്റ്യൻ അധ്യക്ഷതവഹിച്ചു.

അധ്യാപകരും അനധ്യാപകരും ഗവേഷകരും വിദ്യാർഥികളും ഉൾപ്പെടുന്ന സമൂഹത്തിന്‍റെ കൂട്ടായ അധ്വാനവും ഐക്യവുമാണു മികച്ച സർവകലാശാല എന്ന നേട്ടത്തിനു വഴിയൊരുക്കിയതെന്നു ഡോ. ബാബു സെബാസ്റ്റ്യൻ പറഞ്ഞു. പ്രോ വൈസ് ചാൻസലർ ഡോ. ഷീനാ ഷുക്കൂർ, സിൻഡിക്കറ്റ് അംഗങ്ങളായ കെ. ഷറഫുദീൻ, ഡോ. കെ. കൃഷ്ണദാസ്, പി.കെ. ഹരികുമാർ, രജിസ്ട്രാർ എം.ആർ. ഉണ്ണി തുടങ്ങിയവർ പ്രസംഗിച്ചു. നിർദിഷ്ട കണ്‍വൻഷൻ സെന്‍ററിൽ 1,200 സീറ്റുകളുള്ള ഓഡിറ്റോറിയം, എക്സിബിഷൻ ഏരിയ, തിയറ്റർ സ്പേസ്, 192 സീറ്റുകൾ വീതമുള്ള രണ്ട് കോണ്‍ഫറൻസ് റൂമുകൾ തുടങ്ങിയവ ഉണ്ടാകും.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.