മലപ്പുറം ഉപതെരഞ്ഞെടുപ്പ് : എം.ബി. ഫൈസൽ പത്രിക നൽകി : Deepika.com Kerala News |

Click here for detailed news of all items

മലപ്പുറം ഉപതെരഞ്ഞെടുപ്പ് : എം.ബി. ഫൈസൽ പത്രിക നൽകി

Tuesday, March 21, 2017 2:34 PM IST

മലപ്പുറം: മലപ്പുറം ലോക്സഭാ ഉപതെരഞ്ഞെടുപ്പിൽ എൽഡിഎഫ് സ്ഥാനാർഥി എം.ബി. ഫൈസൽ നാമനിർദേശ പത്രിക സമർപ്പിച്ചു. ഇന്നലെ ഉച്ചയ്ക്ക് ഒന്നിനു ജില്ലാ വരണാധികാരികൂടിയായ ജില്ലാ കളക്‌ടർ അമിത് മീണ മുമ്പാകെയാണു പത്രിക സമർപ്പിച്ചത്.

മന്ത്രി കെ.ടി. ജലീൽ, മുൻ മന്ത്രി പാലോളി മുഹമ്മദ്കുട്ടി, സിപിഎം ജില്ലാസെക്രട്ടറി പി.പി. വാസുദേവൻ, സിപിഐ ജില്ലാ സെക്രട്ടറി പി.പി. സുനീർ എന്നിവരും പത്രികാ സമർപ്പണത്തിനു സ്ഥാനാർഥിക്കൊപ്പമുണ്ടായിരുന്നു. രാജ്യത്ത് ഇടതു ആശയങ്ങൾക്കു പ്രസക്തി വർധിച്ച സാഹചര്യത്തിൽ വൻമുന്നേറ്റം നടത്താനാകുമെന്ന് എം.ബി. ഫൈസൽ മാധ്യമങ്ങളോടു പറഞ്ഞു.

ഉച്ചയ്ക്ക് 12 മണിയോടെ സിപിഎം ജില്ലാ കമ്മിറ്റി ഓഫീസിൽനിന്നു സംസ്ഥാന, ജില്ലാ എൽഡിഎഫ് നേതാക്കളുടെയും പ്രവർത്തകരുടെയും അകമ്പടിയോടെ പ്രകടനമായെത്തിയാണ് ഫൈസൽ പത്രിക നൽകിയത്. മുൻ മന്ത്രി കെ.പി. രാജേന്ദ്രൻ, എംഎൽഎമാരായ പി.വി. അൻവർ, മുൻ എംപി എ. വിജയരാഘവൻ, സിപിഎം ജില്ലാ സെക്രട്ടേറിയറ്റംഗം ഇ.എൻ. മോഹൻദാസ്, സിപിഐ നേതാവ് സത്യൻ മൊകേരി, എൻസിപി ജില്ലാ പ്രസിഡന്‍റ് പി.എൻ. ശിവശങ്കരൻ, ജനതാദൾ -എസ് ജില്ലാ പ്രസിഡന്‍റ് പി. സഫറുള്ള തുടങ്ങിയ നേതാക്കളും പത്രികാ സമർപ്പണത്തിനെത്തിയിരുന്നു.

എടപ്പാൾ വട്ടംകുളം സ്വദേശിയാണ് എം.ബി. ഫൈസൽ. ഫൈസലിന്‍റെ ഡമ്മി സ്ഥാനാർഥിയായി മഞ്ചേരി സ്വദേശി ഐ.ടി. നജീബും നാമനിർദേശപത്രിക നൽകി. മുസ് ലിം ലീഗ് സ്ഥാനാർഥി പി.കെ. കുഞ്ഞാലിക്കുട്ടിക്കു വേണ്ടി രണ്ടു സെറ്റ് നാമനിർദേശ പത്രിക കൂടി ഇന്നലെ ലഭിച്ചു. ഉപതെരഞ്ഞെടുപ്പിൽ മത്സരിക്കുന്നതിനു നാളെ ഉച്ചയ്ക്കുശേഷം മൂന്നു വരെ പത്രിക നൽകാൻ അവസരമുണ്ട്. 24 നാണ് സൂക്ഷ്മ പരിശോധന.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.