രാജ്യാന്തര ബ്ലോഗർമാരുമായി കേരള ബ്ലോഗ് എക്സ്പ്രസ് പ്രയാണം തുടങ്ങി : Deepika.com Kerala News |

കൊച്ചി: ആഗോള വിനോദസഞ്ചാരികളെ കേരളത്തിലേക്ക് ആകർഷിക്കാൻ ലക്ഷ്യമിട്ടുള്ള കേരള ടൂറിസത്തിന്‍റെ സംരംഭമായ കേരള ബ്ലോഗ് എക്സ്പ്രസ് നാലാം പതിപ്പ് പ്രയാണം തുടങ്ങി. തെരഞ്ഞെടുക്കപ്പെട്ട 30 രാജ്യാന്തര ബ്ലോഗർമാരുമായി കേരളത്തിലെ പ്രധാന വിനോദസഞ്ചാര കേന്ദ്രങ്ങളിലൂടെ പര്യടനം നടത്തുന്ന കേരള ബ്ലോഗ് എക്സ്പ്രസ് കൊച്ചി ബോൾഗാട്ടി പാലസിൽ ടൂറിസം മന്ത്രി കടകംപള്ളി സുരേന്ദ്രൻ ഫ്ളാഗ് ഓഫ് ചെയ്തു.

ബ്ലോഗ് എക്സ്പ്രസിന്‍റെ ആദ്യ മൂന്നു യാത്രകളും കേരള ടൂറിസത്തിന് വൻകുതിപ്പ് നൽകിയതായാണ് വിലയിരുത്തപ്പെടുന്നത്. "ആയുഷ്കാലത്തിന്‍റെ സഞ്ചാരം’ എന്നതാണ് ബ്ലോഗ് എക്സ്പ്രസിന്‍റെ മുദ്രാവാക്യം. ടൂറിസം വിപണനത്തിനു കേരളം ആവിഷ്ക്കരിച്ച അതിനൂതന സംരംഭമാണു ബ്ലോഗ് എക്സ്പ്രസെന്നും കേരളത്തിലേക്കു സഞ്ചാരികളെ ആകർഷിക്കാനും മേഖലയുടെ വളർച്ചയ്ക്കും ഇതിനു കഴിയുമെന്നും മന്ത്രി പറഞ്ഞു. കേരളത്തിന്‍റെ തനതായ ആയുർവേദവും കഥകളിയും കായൽ സഞ്ചാരവും കായികകലകളും അവർക്ക് നേരിൽ കാണാൻ അവസരമൊരുക്കും. ചടങ്ങിൽ ടൂറിസം ഡെപ്യൂട്ടി ഡയറക്ടർ വി.എസ്. അനിൽ അടക്കമുള്ളവർ പങ്കെടുത്തു.

29 രാജ്യങ്ങളിൽനിന്നു തെരഞ്ഞെടുക്കപ്പെട്ട 29 ബ്ലോഗർമാർക്കൊപ്പം ഇന്ത്യയിൽനിന്നുള്ള ഏക അംഗമായ ദീപാൻഷു ഗോയലും ബ്ലോഗ് എക്സ്പ്രസിൽ യാത്രയ്ക്കുണ്ട്. 38000 പേർ പങ്കെടുത്ത ഓണ്‍ലൈൻ വോട്ടിംഗിലൂടെയാണ് ബ്ലോഗർമാരെ തെരഞ്ഞെടുത്തത്.

ഉദ്ഘാടന ദിവസമായ ഇന്നലെ കൊച്ചിയിലൂടെ യാത്ര ചെയ്ത എക്സ്പ്രസ് 26നു വീണ്ടും കൊച്ചിയിലെത്തും. ഇന്ന് ആലപ്പുഴ, നാളെ കുമരകം, 23ന് തേക്കടി, 24നും 25നും മൂന്നാർ, 27നും 28നും തൃശൂർ, 29ന് കോഴിക്കോട്, 30ന് വയനാട്, 31ന് കണ്ണൂർ, ഏപ്രിൽ ഒന്നിനും രണ്ടിനും കാസർഗോഡ് എന്നിവിടങ്ങളിലൂടെ സഞ്ചരിക്കുന്ന ബ്ലോഗ് എക്സ്പ്രസ് ഏപ്രിൽ മൂന്നിനു തിരുവനന്തപുരത്ത് യാത്ര അവസാനിപ്പിക്കും.