വിഎച്ച്എസ്എസിലെ സമയക്രമം പുനഃക്രമീകരിക്കണം: ബാലാവകാശ കമ്മീഷൻ : Deepika.com Kerala News |

Click here for detailed news of all items

വിഎച്ച്എസ്എസിലെ സമയക്രമം പുനഃക്രമീകരിക്കണം: ബാലാവകാശ കമ്മീഷൻ

Sunday, March 19, 2017 1:34 PM IST

തിരുവനന്തപുരം: കേരളത്തിലെ വൊക്കേഷണൽ ഹയർ സെക്കൻഡറി സ്കൂളുകളിലെ സമയക്രമം കുട്ടികളുടെ ഉത്തമതാൽപര്യം കണക്കിലെടുത്ത് അടുത്ത അധ്യയനവർഷം മുതൽ പുനഃക്രമീകരിക്കുന്നതിന് നടപടി സ്വീകരിക്കാൻ പൊതുവിദ്യാഭ്യാസവകുപ്പ് സെക്രട്ടറിക്കും വൊക്കേഷണൽ ഹയർസെക്കൻഡറി സ്കൂൾ ഡയറക്ടർക്കും സംസ്ഥാന ബാലാവകാശ സംരക്ഷണ കമ്മീഷൻ നിർദേശം നൽകി. ഇതിനായി ആവശ്യമെങ്കിൽ നിലവിലെ പാഠ്യപദ്ധതി പുനഃപരിശോധിക്കണമെന്നും കമ്മീഷൻ നിർദേശിച്ചിട്ടുണ്ട്.

ഹയർ സെക്കൻഡറി സ്കൂളുകളിലെ പഠനദിവസങ്ങൾ ആഴ്ചയിൽ അഞ്ചാക്കി കുറച്ചെങ്കിലും വൊക്കേഷണൽ ഹയർസെക്കൻഡറി വിഭാഗത്തിൽ ഇപ്പോഴും ശനിയാഴ്ചകളിൽ ക്ലാസ് നടത്തുന്നുണ്ടെന്ന കീഴ്‌വായ്പൂര് വിഎച്ച്എസ്ഇയിലെ ഏതാനും വിദ്യാർഥികളുടെ പരാതിയിലാണ് കമ്മീഷന്‍റെ നിർദേശം.

ദിവസം എട്ടര മണിക്കൂർ വീതം ആഴ്ചയിൽ ആറുദിവസം തുടർച്ചയായി പഠനത്തിൽ ഏർപ്പെടേണ്ടിവരുന്നതു കുട്ടികളുടെ ശാരീരിക-മാനസികാരോഗ്യത്തെ ബാധിക്കുമെന്ന് കമ്മീഷൻ നിരീക്ഷിച്ചു. പഠനസമയത്തിൽ മാറ്റം വരുത്താൻ നിലവിലെ പാഠ്യപദ്ധതി അനുവദിക്കുന്നില്ലെന്ന് പൊതുവിദ്യാഭ്യാസ വകുപ്പ് സെക്രട്ടറി കമ്മീഷന് റിപ്പോർട്ട് നൽകിയിരുന്നു.

എന്നാൽ, പാഠ്യപദ്ധതി തയാറാക്കുന്നവർ കുട്ടികളുടെ ആവശ്യങ്ങളും അവകാശങ്ങളും പ്രായോഗിക സാഹചര്യങ്ങളും കണക്കിലെടുത്തുവേണം നടപടി സ്വീകരിക്കാനെന്ന് കമ്മീഷൻ വ്യക്തമാക്കി. ഇതു സാധ്യമാകുന്നെന്ന് ഉറപ്പാക്കാൻ പൊതുവിദ്യാഭ്യാസവകുപ്പ് സെക്രട്ടറിക്കും വൊക്കേഷണൽ ഹയർസെക്കൻഡറി സ്കൂൾ ഡയറക്ടർക്കും ഉത്തരവാദിത്വമുണ്ടെന്നും കമ്മീഷൻ ചൂണ്ടിക്കാട്ടി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.