മുഖ്യമന്ത്രിയുടെ പ്രസ്താവനയിൽ ഇടതുനയം വ്യക്തമാക്കണം: ടീച്ചേഴ്സ് ഗിൽഡ് : Deepika.com Kerala News |

കൊച്ചി: സംസ്ഥാനത്തെ ക്രൈസ്തവ വിദ്യാഭ്യാസ സ്ഥാപനങ്ങളുടെ പ്രവർത്തനങ്ങളെ ആക്ഷേപിച്ച മുഖ്യമന്ത്രി പിണറായി വിജയന്‍റെ പ്രസ്താവന പ്രതിഷേധാർഹമാണെന്നു കേരള കാത്തലിക് ടീച്ചേഴ്സ് ഗിൽഡ് സംസ്ഥാന സമിതി അഭിപ്രായപ്പെട്ടു.

ന്യൂനപക്ഷ സംരക്ഷകർ എന്നവകാശപ്പെടുന്ന ഇടതുപക്ഷ ജനാധിപത്യ മുന്നണിയുടെ ഇക്കാര്യത്തിലുള്ള നയം എന്താണെന്നു ബന്ധപ്പെട്ടവർ വ്യക്തമാക്കണം.
വിദ്യാഭ്യാസരംഗത്തു മാതൃകാ സംസ്ഥാനമായി കേരളം രൂപപ്പെട്ട ചരിത്രം അദ്ദേഹം വിസ്മരിക്കരുത്. എയ്ഡഡ് വിദ്യാഭ്യാസമേഖലയ്ക്കും ന്യൂനപക്ഷ വിദ്യാഭ്യാസസ്ഥാപനങ്ങൾക്കും കൂച്ചുവിലങ്ങിടാൻ ശ്രമിച്ചു പരാജയപ്പെട്ട ഭരണകൂടങ്ങളുടെ ചരിത്രം എല്ലാവരും ഓർക്കണം.

ചെമ്പേരി വിമൽജ്യോതി കോളജിനുനേരേ കഴിഞ്ഞ ദിവസം നടന്ന ആക്രമണവും ഭരണഘടനാപരമായ ന്യൂനപക്ഷ വിദ്യാഭ്യാസ അവകാശങ്ങൾ കവർന്നെടുക്കുന്ന കെഇആർ ഭേദഗതിയും മുഖ്യമന്ത്രിയുടെ പ്രസ്താവനയും ചേർത്തു വായിക്കേണ്ടതുണ്ട്.

കെഇആർ ഭേദഗതി, 2014 മുതൽ ഒരു വിഭാഗം ഹയർ സെക്കൻഡറി സ്കൂൾ അധ്യാപകർക്കു വേതനമില്ലാത്ത സാഹചര്യം, അധ്യാപകരുടെ ബ്രോക്കണ്‍ സർവീസുകൾ പെൻഷൻ കണക്കാക്കാൻ പരിഗണിക്കേണ്ടതില്ലെന്ന സർക്കാർ ഉത്തരവ് എന്നീ വിഷയങ്ങളിൽ ഭാവിപരിപാടികൾ ആലോചിക്കാൻ ടീച്ചേഴ്സ് ഗിൽഡ് സംസ്ഥാന നേതൃയോഗം നാളെ പാലാരിവട്ടം പിഒസിയിൽ നടക്കും.

രാവിലെ പത്തിനു നടക്കുന്ന യോഗത്തിൽ ടീച്ചേഴ്സ് ഗിൽഡ് സംസ്ഥാന ഭാരവാഹികൾ, എക്സിക്യൂട്ടീവ് അംഗങ്ങൾ, വിവിധ രൂപത പ്രസിഡന്‍റുമാർ എന്നിവർ പങ്കെടുക്കുമെന്നു കെസിബിസി വിദ്യാഭ്യാസ കമ്മീഷൻ സെക്രട്ടറി ഫാ. ജേക്കബ് ജി. പാലയ്ക്കാപ്പിള്ളി, ടീച്ചേഴ്സ് ഗിൽഡ് സംസ്ഥാന പ്രസിഡന്‍റ് ജോഷി വടക്കൻ, ജനറൽ സെക്രട്ടറി സാലു പതാലിൽ എന്നിവർ അറിയിച്ചു.