സഹജീവികളോടും പരിസ്ഥിതിയോടും നീതിയുള്ളവരാവണം: കർദിനാൾ മാർ ക്ലീമിസ് : Deepika.com Kerala News |

കൊച്ചി: സഹജീവികളോടും പരിസ്ഥിതിയോടും നീതി പ്രവർത്തിക്കാൻ എല്ലാവരെയും പ്രാപ്തരാക്കുകയെന്നതു സഭയുടെ ഇന്നത്തെ ദൗത്യമാണെന്നു സിബിസിഐ പ്രസിഡന്‍റ് മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാബാവ.

കാരിത്താസ് ഇന്ത്യയുടെ ആഭിമുഖ്യത്തിൽ പാലാരിവട്ടം പിഒസിയിൽ നടന്ന കേരള വികസന പരിപ്രേക്ഷ്യ രൂപീകരണ ശില്പശാല ഉദ്ഘാടനം ചെയ്യുകയായിരുന്നു അദ്ദേഹം.
എല്ലാ രംഗങ്ങളിലും ചൂഷണ മനോഭാവം ശക്തിപ്പെടുന്ന സാഹചര്യത്തിൽ വിഭവങ്ങളുടെയും ജീവന്‍റെയും മൂല്യത്തെക്കുറിച്ച് ശരിയായ ബോധ്യം ജനങ്ങൾക്കു നല്കാൻ സഭയ്ക്കു കഴിയണമെന്നും മാർ ക്ലീമിസ് പറഞ്ഞു.

കാലിക സാമൂഹ്യപ്രശ്നങ്ങളിൽ ജനപങ്കാളിത്തത്തോടെ സഭ നടത്തുന്ന ക്രിയാത്മക ഇടപെടലുകളുടെ ഉത്തമ മാതൃകയാണ് ആശാകിരണം കാൻസർ പ്രതിരോധ പ്രവർത്തനങ്ങളെന്ന് അനുഗ്രഹ പ്രഭാഷണം നടത്തിയ സീറോ മലബാർ സഭാ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി ചൂണ്ടിക്കാട്ടി. ജലക്ഷാമം പോലെ സമൂഹത്തെ ദോഷകരമായി ബാധിക്കുന്ന പ്രശ്നങ്ങളെ ഫലപ്രദമായി നേരിടാൻ ജനങ്ങളെ പഠിപ്പിക്കുന്നതിന് നമുക്കു കടമയുണ്ടെന്നും അദ്ദേഹം പറഞ്ഞു.

കെസിബിസി ജസ്റ്റീസ്, പീസ് ആൻഡ് ഡെവലപ്മെന്‍റ് കമ്മീഷൻ ചെയർമാൻ ആർച്ച്ബിഷപ് തോമസ് മാർ കൂറിലോസ് അധ്യക്ഷത വഹിച്ചു. കെസിബിസി പ്രസിഡന്‍റ് ആർച്ച്ബിഷപ് ഡോ. എം സൂസപാക്യം, കാരിത്താസ് ഇന്ത്യ ചെയർമാൻ ബിഷപ് ഡോ. ലൂമെൻ മൊണ്ടെയ്റോ, എറണാകുളം-അങ്കമാലി അതിരൂപത സഹായമെത്രാൻ മാർ സെബാസ്റ്റ്യൻ എടയന്ത്രത്ത്, കാരിത്താസ് ഇന്ത്യ അസിസ്റ്റന്‍റ് എക്സിക്യൂട്ടിവ് ഡയറക്ടർ ഫാ. പോൾ മൂഞ്ഞേലി, ഫാ. സേവ്യർ കുടിയാംശേരി, മുൻ ഡിജിപി ജേക്കബ് പുന്നൂസ്, ഡോ. മേരി റെജിന എന്നിവർ പ്രസംഗിച്ചു. കാരിത്താസ് ഇന്ത്യ എക്സിക്യൂട്ടിവ് ഡയറക്ടർ ഫാ. ഫ്രഡറിക് ഡിസൂസ, സംസ്ഥാന തദ്ദേശ സ്വയം ഭരണവകുപ്പ് പ്രിൻസിപ്പൽ സെക്രട്ടറി ടി.കെ. ജോസ്, കാരിത്താസ് ഇന്ത്യ സോണൽ മാനേജർ ഡോ. വി.ആർ. ഹരിദാസ് എന്നിവർ വിവിധ വിഷയങ്ങളിൽ പ്രബന്ധങ്ങൾ അവതരിപ്പിച്ചു. വൈകുന്നേരം ജില്ലയിലെ എംഎൽഎമാരുമായി കാരിത്താസ് ഇന്ത്യയുടെ പ്രവർത്തനങ്ങളെക്കുറിച്ചു ഭാരവാഹികൾ ആശയവിനിമയം നടത്തി.