വിവരാവകാശ കമ്മീഷനിലെ ഒഴിവുകള്‍ ആറാഴ്ചയ്ക്കകം നികത്തണമെന്നു ഹൈക്കോടതി
വിവരാവകാശ കമ്മീഷനിലെ ഒഴിവുകള്‍ ആറാഴ്ചയ്ക്കകം  നികത്തണമെന്നു ഹൈക്കോടതി
Wednesday, November 25, 2015 12:52 AM IST
കൊച്ചി: സംസ്ഥാന വിവരാവകാശ കമ്മീഷനിലെ ഒഴിവുകള്‍ നടപടിക്രമങ്ങള്‍ പൂര്‍ത്തിയാക്കി ആറാഴ്ചയ്ക്കകം നികത്തണമെന്ന് ഹൈക്കോടതി ഉത്തരവിട്ടു. ആലപ്പുഴ സ്വദേശി എം.എ. പൂക്കോയ നല്‍കിയ ഹര്‍ജിയില്‍ ചീഫ് ജസ്റീസ് അശോക് ഭൂഷണ്‍, ജസ്റീസ് എ.എം. ഷെഫീഖ് എന്നിവരുള്‍പ്പെട്ട ഡിവിഷന്‍ ബെഞ്ചിന്റെതാണ് ഉത്തരവ്. വിവരാവകാശ കമ്മീഷനില്‍ നിലവിലുള്ള ആറു തസ്തികകളില്‍ നാലെണ്ണം ഒഴിഞ്ഞുകിടക്കുകയാണെന്നു കോടതി ചൂണ്ടിക്കാട്ടി. ഇതു കാരണം കമ്മീഷനു പ്രവര്‍ത്തിക്കാന്‍ കഴിയുന്നില്ലെന്നും അപ്പീലുകളും പരാതികളും കേള്‍ക്കാന്‍ കഴിയുന്നില്ലെന്നും ഹര്‍ജിക്കാരന്‍ വാദിച്ചിരുന്നു.


കമ്മീഷനിലേക്കുള്ള നിയമനത്തിനായി കഴിഞ്ഞ മാര്‍ച്ചില്‍ ഒരു കമ്മിറ്റിയെ നിയോഗിച്ചുവെന്ന് സര്‍ക്കാര്‍ കോടതിയില്‍ ബോധിപ്പിച്ചിരുന്നു. എന്നാല്‍ പിന്നീട് ഇതിലെന്തെങ്കിലും തുടര്‍നടപടി സ്വീകരിച്ചതായി അറിയിച്ചിട്ടില്ലെന്നു കോടതി ചൂണ്ടിക്കാട്ടി. വിവരാവകാശ നിയമം ഫലപ്രദമായി നടപ്പാക്കേണ്ട പ്രധാന അധികാരിയാണ് സംസ്ഥാന വിവരാവകാശ കമ്മീഷണര്‍. കമ്മീഷനിലേക്ക് നിയമനം നടത്താതിരിക്കുന്നത് വിവരാവകാശ നിയമത്തെ സാരമായി ബാധിക്കും.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.