Kerala News
അധ്യാപക തസ്തിക: 186 പേര്‍ക്ക് ഉടന്‍ നിയമന ഉത്തരവ്
Wednesday, May 6, 2015 11:53 PM IST
തിരുവനന്തപുരം: പിഎസ്സി മുഖേന അധ്യാപക തസ്തികയിലേക്കുള്ള നിയമന ശിപാര്‍ശ ലഭിച്ചിട്ടും നിയമന ഉത്തരവ് ലഭിക്കാത്ത എല്ലാ ഉദ്യോഗാര്‍ഥികള്‍ക്കും അടുത്തതായി ഉണ്ടാകുന്ന അധ്യാപക തസ്തികകളിലെ ഒഴിവുകളില്‍ ഉടന്‍ നിയമനം നല്‍കേണ്ടതാണെന്ന് പൊതുവിദ്യാഭ്യാസ ഡയറക്ടര്‍ക്കു നിര്‍ദേശം നല്‍കി. ഉദ്യോഗാര്‍ഥികളെ ഉള്‍പ്പെടുത്തി ക്രമീകരിച്ചശേഷം മാത്രമേ ബൈപ്രോമോഷന്‍, ട്രാന്‍സ്ഫര്‍, ഇന്റര്‍ ഡിസ്ട്രിക്ട് ട്രാന്‍സ്ഫര്‍, ഡപ്യൂട്ടേഷന്‍ എന്നിവ മുഖേന ഒഴിവുകള്‍ നികത്താവൂ എന്നും നിര്‍ദേശിച്ചിട്ടുണ്ട്.

ഈ നിര്‍ദേശം എല്ലാ ജില്ലകളിലും കര്‍ശനമായി നടപ്പിലാക്കുന്നതിനുള്ള നിര്‍ദേശങ്ങള്‍ പൊതുവിദ്യാഭ്യാസ ഡയറക്ടര്‍ എല്ലാ വിദ്യാഭ്യാസ ഓഫീസര്‍മാരെയും അറിയിക്കേണ്ടതാണെന്നും നിര്‍ദേശിച്ചിട്ടുണ്ട്.

2013-14ലെ തസ്തിക നിര്‍ണയത്തെത്തുടര്‍ന്ന് അധ്യാപക തസ്തികകളില്‍ കുറവുവന്ന കാരണത്താല്‍ വിവിധ ജില്ലകളില്‍നിന്നും പബ്ളിക് സര്‍വീസ് കമ്മീഷനിലേക്ക് എഴുതി അറിയിക്കപ്പെട്ട അധ്യാപക തസ്തികകളിലേക്ക് പിഎസ്സി നിയമന ശിപാര്‍ശ നല്‍കിയെങ്കിലും നിരവധി ഉദ്യോഗാര്‍ത്ഥികള്‍ക്ക് നിയമന ഉത്തരവ് ലഭിക്കാത്ത സാഹചര്യം നിലവിലുള്ളതായി പിഎസ്സിയും പൊതു വിദ്യാഭ്യാസ ഡയറക്ടറും സര്‍ക്കാരിന്റെ ശ്രദ്ധയില്‍പ്പെടുത്തിയിരുന്നു. 186 ഉദ്യോഗാര്‍ഥികള്‍ക്കാണ് ഇപ്രകാരം നിയമനം തടസപ്പെട്ടത്. സൂപ്പര്‍ ന്യൂമററി തസ്തികകള്‍ സൃഷ്ടിക്കുന്നത് സര്‍ക്കാരിനു വന്‍ സാമ്പത്തിക ബാധ്യതയുണ്ടാക്കുന്നതാണ് എന്ന വസ്തുതയും ഇത് സംബന്ധിച്ച് കേരള അഡ്മിനിസ്ട്രേറ്റീവ് ട്രിബ്യൂണല്‍ വിധിയും കണക്കിലെടുത്താണ് പുതിയ നിര്‍ദേശങ്ങള്‍ നല്‍കിയിട്ടുള്ളത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.

Copyright @ 2022 , Rashtra Deepika Ltd.