പാലായിലെ കാര്യങ്ങളോര്‍ത്തു ജോര്‍ജ് വേവലാതിപ്പെടേണ്ട: തോമസ് ഉണ്ണിയാടന്‍
പാലായിലെ കാര്യങ്ങളോര്‍ത്തു ജോര്‍ജ് വേവലാതിപ്പെടേണ്ട:  തോമസ് ഉണ്ണിയാടന്‍
Monday, March 30, 2015 12:23 AM IST
തൃശൂര്‍: പാലായിലെ കാര്യങ്ങളോര്‍ത്തു വേവലാതിപ്പെടാതെ പി.സി. ജോര്‍ജ് സ്വന്തം മണ്ഡലത്തെക്കുറിച്ചു ചിന്തിച്ചാല്‍ മതിയെന്ന് തോമസ് ഉണ്ണിയാടന്‍ എംഎല്‍എ. പാലായില്‍ കെ.എം. മാണി ജയിക്കില്ലെന്ന പി.സി. ജോര്‍ജിന്റെ പ്രസ്താവനയോടു തൃശൂരില്‍ പ്രതികരിക്കുകയായിരുന്നു ഉണ്ണിയാടന്‍.

പാലാക്കാരുടെ മനസ് പ്രവചിക്കാന്‍ മാത്രം രാഷ്ട്രീയ പക്വത പി.സി. ജോര്‍ജിനില്ല. അര നൂറ്റാണ്േടാളമായി തെരഞ്ഞെടുപ്പുകളില്‍ ജയിക്കുന്ന മാണിയെക്കുറിച്ചു ജോര്‍ജ് നടത്തിയ പ്രസ്താവന പാലായിലെ ജനങ്ങളോടുള്ള വെല്ലുവിളിയാണ്. ഇരിക്കുന്ന കൊമ്പുമുറിക്കുകയാണു ജോര്‍ജ്. ഒപ്പം പ്രവര്‍ത്തിക്കുന്ന രാഷട്രീയ നേതാക്കള്‍ക്കും കക്ഷികള്‍ക്കും മുന്നണികള്‍ക്കും നിരന്തരം അസ്വസ്ഥത സൃഷ്ടിക്കുന്ന നിലപാടു തിരുത്തിയില്ലെങ്കില്‍ രാഷ്ട്രീയ വനവാസമായിരിക്കും അദ്ദേഹത്തെ കാത്തിരിക്കുന്നത്. അപക്വമായ രാഷ്ട്രീയശൈലി ജോര്‍ജിനെ ഒറ്റപ്പെട്ട രാഷ്ട്രീയ തുരുത്താക്കി മാറ്റുന്നു. ആരെയും ഉള്‍ക്കൊള്ളാത്ത, ആര്‍ക്കും ഉള്‍ക്കൊള്ളാന്‍ കഴിയാത്ത പ്രവര്‍ത്തനശൈലി ജോര്‍ജ് മാറ്റണം.


ഇരുമുന്നണികള്‍ക്കും വേണ്ടാതെ നടുക്കടലില്‍ മുങ്ങിയ അവസ്ഥയില്‍ പി.സി. ജോര്‍ജിനു പുനര്‍ജന്മം നല്‍കിയയാളാണു കെ.എം. മാണി. സങ്കുചിത മനോഭാവത്തിലൂടെ മാണിയെ അപമാനിക്കാനുള്ള ശ്രമം വിലപ്പോവില്ല. പാര്‍ട്ടി നല്‍കിയ ശിക്ഷാനടപടി സ്വീകരിച്ച് അച്ചടക്കത്തോടെ പ്രവര്‍ത്തിക്കാന്‍ ജോര്‍ജ് തയാറാകണം. വിദേശത്തുനിന്നു മടങ്ങിയെത്തിയാലുടന്‍ ജോര്‍ജിനെതിരേ നടപടി സ്വീകരിക്കാമെന്നു മുഖ്യമന്ത്രി ഉറപ്പുനല്‍കിയിട്ടുണ്െടന്നും ഉണ്ണിയാടന്‍ പറഞ്ഞു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.