ഭാഷകള്‍ക്കപ്പുറം സ്നേഹത്തിന്റെ മധുരം പകര്‍ന്നു മാര്‍ ആലഞ്ചേരി : Deepika.com Kerala News |

Click here for detailed news of all items

ഭാഷകള്‍ക്കപ്പുറം സ്നേഹത്തിന്റെ മധുരം പകര്‍ന്നു മാര്‍ ആലഞ്ചേരി

Monday, December 22, 2014 12:24 AM IST

കൊച്ചി: ഭാഷയുടെയും ദേശത്തിന്റെയും അതിര്‍വരമ്പുകള്‍ക്കപ്പുറം സ്നേഹത്തിന്റെ സന്ദേശവും കൂട്ടായ്മയുടെ മാധുര്യവും പകര്‍ന്ന് ഇതരസംസ്ഥാന തൊഴിലാളികള്‍ക്കൊപ്പം സീറോ മലബാര്‍ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി ക്രിസ്മസ് ആഘോഷിച്ചു.

കനിവ് ചാരിറ്റബിള്‍ സൊസൈറ്റിയും സിറ്റി ബേസ്ഡ് ഇവാഞ്ചലൈസേഷനും സംയുക്തമായി എറണാകുളം ടൌണ്‍ഹാളില്‍ സംഘടിപ്പിച്ച ക്രിസ്മസ് ആഘോഷത്തിലാണു കര്‍ദിനാള്‍ കേക്കു മുറിച്ചും ക്രിസ്മസ് സന്ദേശം നല്‍കിയും കലാപരിപാടികള്‍ ആസ്വദിച്ചും അവര്‍ക്കൊപ്പം സന്തോഷം പങ്കുവച്ചത്.

ചടങ്ങില്‍ പങ്കെടുക്കാനെത്തിയ കര്‍ദിനാളിനെ യൌസേപ്പ് പിതാവിന്റെയും പരിശുദ്ധ മറിയത്തിന്റെയും വേഷമണിഞ്ഞ കുട്ടികള്‍ സ്വീകരിച്ചു. നാടോടിവേഷത്തില്‍ നൃത്തമാടിയ സിഎംസി വിമല പ്രൊവിന്‍ഷ്യല്‍ ഹൌസിലെ ഒഡീഷ സ്വദേശികളായ അന്തേവാസികള്‍ അദ്ദേഹത്തെ വേദിയിലേക്ക് ആനയിച്ചു. തുടര്‍ന്ന് വടുതല സേക്രഡ് ഹാര്‍ട്ട് പള്ളിയിലെ സണ്‍ഡേ സ്കൂള്‍ കുട്ടികള്‍ അവതരിപ്പിച്ച കരോള്‍ ഗാനങ്ങളും ക്രിസ്മസ് സന്ദേശമടങ്ങിയ സ്കിറ്റും ആസ്വദിച്ചു.

ക്രിസ്മസിന്റെയും പുതുവത്സരത്തിന്റെയും സന്ദേശം പകര്‍ന്ന് കേക്ക് മുറിക്കല്‍ ചടങ്ങിലും പങ്കെടുത്തശേഷമാണ് കര്‍ദിനാള്‍ മടങ്ങിയത്. പാലാ മരിയസദനം മാനസികാരോഗ്യ കേന്ദ്രത്തിലെ അന്തേവാസികള്‍ അവതരിപ്പിച്ച സംഗീത വിരുന്നുമുണ്ടായിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.