സ്പീഡ് ഗവര്‍ണര്‍: കേടായവ നന്നാക്കാന്‍ സംവിധാനമില്ലെന്നു ബസുടമകള്‍
കൊച്ചി:ബസുകളില്‍ സ്ഥാപിച്ചിരിക്കുന്ന സ്പീഡ് ഗവര്‍ണര്‍ കേടായാല്‍ നന്നാക്കാന്‍ നിലവില്‍ സംവിധാനമില്ലെന്ന് ബസുടമകള്‍. സ്പീഡ് ഗവര്‍ണര്‍ നിര്‍ബന്ധമാക്കി 2005ല്‍ നിയമം നടപ്പാക്കിയപ്പോള്‍ സര്‍ക്കാര്‍ അംഗീകാരത്തോടെ 15 കമ്പനികളാണു രംഗത്തെത്തിയത്. 16,000ത്തോളം രൂപ നല്‍കി ഈ കമ്പനികളില്‍നിന്നു വാങ്ങിയ സ്പീഡ്ഗവര്‍ണറുകള്‍ക്കു കാലക്രമത്തില്‍ കേടുപാടുകള്‍ സംഭവിച്ചു. അപ്പോഴേക്കും ഈ കമ്പനികള്‍ അപ്രത്യക്ഷമായിത്തുടങ്ങിയിരുന്നു. നിലവില്‍ ഇവയില്‍ രണ്ടു കമ്പനികള്‍ മാത്രമേ അവശേഷിക്കുന്നുള്ളൂ. മറ്റു കമ്പനികളില്‍നിന്നു വാങ്ങിയ സ്പീഡ് ഗവര്‍ണറുകളുടെ അറ്റകുറ്റപ്പണി ഈ കമ്പനികള്‍ക്കു നടത്താനാകില്ല. ഈ സാഹചര്യത്തില്‍ ബസുകള്‍ക്കെതിരേ നടപടി സ്വീകരിക്കുന്നതിനു മുമ്പു സ്പീഡ് ഗവര്‍ണര്‍ അറ്റകുറ്റപ്പണികള്‍ നടത്തുന്നതിനുള്ള ബദല്‍ സംവിധാനം സര്‍ക്കാര്‍ ഒരുക്കണമെന്നും യോഗം ആവശ്യപ്പെട്ടു. കെല്‍ട്രോണ്‍ പോലുള്ള പൊതുമേഖലാ സ്ഥാപനങ്ങളെ ഇതിനായി നിയോഗിച്ചാല്‍ പ്രവര്‍ത്തനം കാര്യക്ഷമമാകുമെന്നാണു ബസുടമകളുടെ അഭിപ്രായം.

സ്പീഡ് ഗവര്‍ണറിന്റെ പേരില്‍ സ്വകാര്യബസുടമകളെയും ജീവനക്കാരെയും പീഡിപ്പിക്കാനുള്ള മോട്ടോര്‍വാഹന വകുപ്പിന്റെയും സര്‍ക്കാരിന്റെയും നടപടികള്‍ അവസാനിപ്പിക്കണമെന്നു യോഗം ആവശ്യപ്പെട്ടു. മലപ്പുറത്തുണ്ടായ ദാരുണമായ അപകടങ്ങളുടെ പേരില്‍ പതിനായിരത്തിലേറെ വരുന്ന സ്വകാര്യബസുകളെ വേട്ടയാടുന്ന നടപടി പ്രതിഷേധാര്‍ഹമാണ്. രണ്ടു ദിവസത്തിനിടെ 311 ബസുകളുടെ ഫിറ്റ്നസ് സര്‍ട്ടിഫിക്കറ്റ് റദ്ദാക്കുകയും 299 ബസുകള്‍ക്കു നോട്ടീസ് നല്‍കുകയും ചെയ്തു. അറുന്നൂറിലധികം ബസുകള്‍ നിരത്തില്‍നിന്നു തുടച്ചുമാറ്റപ്പെടുന്ന അവസ്ഥയാണുള്ളത്.

മോട്ടോര്‍ വാഹന വകുപ്പിന്റെ അശാസ്ത്രീയമായ നടപടികളാണു മത്സരയോട്ടത്തിനു ഡ്രൈവര്‍മാരെ പ്രേരിപ്പിക്കുന്നത്. സെക്കന്‍ഡുകളുടെ മാത്രം വ്യത്യാസത്തില്‍ റണ്ണിംഗ് സമയം കണക്കാക്കി പെര്‍മിറ്റ് നല്‍കുന്ന നടപടി ഒഴിവാക്കാന്‍ അധികൃതര്‍ തയാറാകണം. കെഎസ്ആര്‍ടിസി, സ്വകാര്യ ബസുകള്‍ക്ക് ഏകീകൃത റണ്ണിംഗ് സമയക്രമം നടപ്പിലാക്കണം. സ്റേറ്റ് ട്രാന്‍സ്പോര്‍ട്ട് മേഖലയിലും സ്പീഡ് ഗവര്‍ണറില്ലാ തെ ബസുകള്‍ സര്‍വീസ് നടത്തുന്നുണ്െടന്നു സര്‍ക്കാര്‍തന്നെ വ്യക്തമാക്കുമ്പോഴും കെഎസ്ആര്‍ടിസി ബസുകളില്‍ പരിശോധനയ്ക്കു തയാറാകാത്തത് എന്തുകൊണ്ടാണെന്നും ബസുടമകള്‍ ചോദിക്കുന്നു.


റോഡപകടങ്ങളുടെ പ്രധാന കാരണക്കാര്‍ സ്വകാര്യബസുകളാണെന്ന തെറ്റിദ്ധാരണയാണു സര്‍ക്കാരും ട്രാന്‍സ്പോര്‍ട്ട് കമ്മീഷണറും പരത്തുന്നത്. മറ്റു വാഹന ങ്ങളുടെ പിഴവുമൂലം സംഭവിക്കുന്ന അപകടങ്ങള്‍പോലും സ്വകാര്യ ബസുകളുടെമേല്‍ ചുമത്തുന്നു. റോഡുകളുടെ ശോച്യാവസ്ഥയും അഴിമതിയിലൂടെ ലൈസന്‍സ് നല്‍കുന്ന നടപടിയുമെല്ലാം അപകടങ്ങള്‍ക്കു കാരണമാകുന്നുണ്ട്. കാര്യങ്ങളെക്കുറിച്ച് അറിവില്ലാത്തതുകൊണ്ടാണ് ട്രാന്‍സ്പോര്‍ട്ട് കമ്മീഷണര്‍ ഇത്തരം നടപടികള്‍ സ്വീകരിക്കുന്നതെന്നും ബസുടമകള്‍ ആരോപിച്ചു.

വേഗം നിയന്ത്രിക്കുന്നതിനുള്ള എല്ലാ നടപടികളോടും ബസു ടമകള്‍ സഹകരിക്കും. പെതുജനങ്ങളോടു പ്രതിബദ്ധതയുള്ള വ്യവസായമാണിത്. ഡീസലിന് അടിക്കടി വില വര്‍ധിച്ചിട്ടും പണിമുടക്കു നടത്താന്‍ മുതിരാതിരുന്നത് അതുകൊണ്ടാണ്. പ്രശ്നങ്ങള്‍ പരിഹരിക്കുന്നതിനു സര്‍ക്കാര്‍ മുന്‍കൈയെടുത്താല്‍ ചര്‍ച്ചയ്ക്കു തയാറാണ്. സ്പീഡ് ഗവര്‍ണര്‍ പരിശോധനാ കാര്യത്തില്‍ തീരുമാനത്തിലെത്തിയാല്‍ സമരം പിന്‍വലിക്കുമെന്നും ഇവര്‍ പറഞ്ഞു.

കേരള സ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷന്‍, ഓള്‍ കേരള ബസ് ഓപ്പറേറ്റേഴ്സ് ഓര്‍ഗനൈസേഷന്‍, കേരള ബസ് ട്രാന്‍സ്പോര്‍ട്ട് അസോസിയേഷന്‍, ഓള്‍ കേരള ബസ് ഓപ്പറേറ്റേഴ്സ് ഫോറം, കേരള സ്റേറ്റ് ബസ് ഓപ്പറേറ്റേഴ്സ് ആന്‍ഡ് ഓണേഴ്സ് ഫെഡറേഷന്‍, പ്രൈവറ്റ് ബസ് ഓണേഴ്സ് യൂത്ത് ഫെഡറേഷന്‍, കേരള സ്റേറ്റ് ബസ് ഓപ്പറേറ്റേഴ്സ് കോ-ഓര്‍ഡിനേഷന്‍ കമ്മിറ്റി, കേരള സ്റേറ്റ് ലിമിറ്റഡ് സ്റോപ്പ് ബസ് ഓപ്പറേറ്റേഴ്സ് അസോസിയേഷന്‍ എന്നീ സംഘടനകളുടെ സംയുക്ത യോഗമാണു പണിമുടക്കു തീരുമാനം കൈക്കൊണ്ടത്.