നഗരസഭ: കൈമാറിയ ആസ്തികള്‍ വികസന അഥോറിറ്റികള്‍ക്കു തിരികെ നല്കണം
തിരുവനന്തപുരം: നഗരസഭകള്‍ക്കു കൈമാറിയ ആസ്തികള്‍ വികസന അഥോറിറ്റികള്‍ക്കു തിരിച്ചുനല്‍കാന്‍ നിര്‍ദേശം. നഗരകാര്യമന്ത്രി മഞ്ഞളാംകുഴി അലിയുടെ അധ്യക്ഷതയില്‍ കൊല്ലം, തൃശൂര്‍, കോഴിക്കോട് മുനിസിപ്പല്‍ കോര്‍പറേഷന്‍, വികസന അഥോറിറ്റികള്‍, തദ്ദേശ വകുപ്പ് മേധാവികള്‍ തുടങ്ങിയവരുടെ യോഗത്തിലാണ് ഈ തീരുമാനം.

തൃശൂര്‍, കോഴിക്കോട്, കൊല്ലം നഗരങ്ങള്‍ക്കു മുന്‍പ് വികസന അഥോറിറ്റികള്‍ ഉണ്ടായിരുന്നു. മുന്‍ സര്‍ക്കാര്‍ പിരിച്ചുവിട്ടപ്പോള്‍ ഇവയുടെ ആസ്തി അതാതു നഗരസഭകള്‍ക്കു കൈമാറി.

നഗരങ്ങളുടെ സമഗ്രവികസനത്തിനായി വികസന അഥോറിറ്റികള്‍ പുനഃസ്ഥാപിക്കാന്‍ സര്‍ക്കാര്‍ തീരുമാനിച്ചതോടെയാണ് മുമ്പ് ഏറ്റെടുത്ത ഇവയുടെ ആസ്തികളും രേഖകളും മറ്റും തിരിച്ചുനല്കാന്‍ തീരുമാനിച്ചത്. വികസന പ്രവര്‍ത്തനങ്ങള്‍ നടത്തിയിട്ടില്ലാത്ത ഭൂമി, കെട്ടിടം, വാഹനം തുടങ്ങിയവ അഥോറിറ്റികള്‍ക്കു തിരിച്ചുനല്കും. ഇതിനുള്ള കണക്കെടുപ്പ് ഉടന്‍ നടത്താന്‍ മന്ത്രി നിര്‍ദേശിച്ചു.


അഥോറിറ്റികളുടെ പ്രവര്‍ത്തനത്തിനായി ഓഫീസുകള്‍ ഉടന്‍ പ്രവര്‍ത്തനം തുടങ്ങും. മുന്‍കാലങ്ങളില്‍ ഉണ്ടായിരുന്ന സെക്രട്ടറി ഉള്‍പ്പടയുെള്ള അത്യാവശ്യ ജീവനക്കാരെ അഥോറിറ്റികള്‍ക്ക് ഉടന്‍ നല്‍കുമെന്നു മന്ത്രി മഞ്ഞളാംകുഴി അലി പറഞ്ഞു.