മുഖ്യമന്ത്രി പത്മവ്യൂഹത്തില്‍ അകപ്പെട്ട അവസ്ഥയില്‍: വെള്ളാപ്പള്ളി
തിരുവനന്തപുരം: പത്മവ്യൂഹത്തില്‍ അകപ്പെട്ട അഭിമന്യുവിന്റെ അവസ്ഥയാണു മുഖ്യമന്ത്രി ഉമ്മന്‍ ചാണ്ടിയുടേതെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ശത്രുക്കളല്ല, ബന്ധുക്കളാണ് അദ്ദേഹത്തോടു യുദ്ധം ചെയ്യുന്നത്. അങ്ങനെ നോക്കുമ്പോള്‍ മുഖ്യമന്ത്രിയുടെ നില വലിയ പരുങ്ങലിലാണെന്നും അദ്ദേഹം കൂട്ടിച്ചേര്‍ത്തു.

ബന്ധുക്കള്‍ പരസ്പരം യുദ്ധം ചെയ്യുന്ന മഹാഭാരതം പോലെയാണു യുഡിഎഫ് ഭരണം. എന്നിട്ടും സര്‍ക്കാരിനെ ഉമ്മന്‍ ചാണ്ടി രണ്ടു വര്‍ഷം നിലനിര്‍ത്തി. എന്നാല്‍, ഇനി എത്രകാലം മുന്നോട്ടു പോകുമെന്നു ഭഗവാനു മാത്രം അറിയാം. വൈദ്യുതിയും വെള്ളവുമില്ലാതെ സംസ്ഥാനത്തെ ജനങ്ങള്‍ ബുദ്ധിമുട്ടുമ്പോഴും ഘടകകക്ഷികളുടെ ആവശ്യങ്ങളെല്ലാം കൃത്യമായി നടക്കുന്നുണ്ട്. പണപ്പെട്ടിയും അതിന്റെ താക്കോലും ധനമന്ത്രി കെ.എം. മാണിയുടെ കൈയിലാണ്. എന്നാലും പൂട്ടുപൊളിച്ചു പണം കൊണ്ടുപോകുന്നതില്‍ ലീഗുകാര്‍ കാണിക്കുന്നതു നല്ല മിടുക്കാണ്. സുപ്രീംകോടതി പറഞ്ഞാലും ഒന്നും ചെയ്യില്ലെന്നു പറഞ്ഞാണു മന്ത്രി ബാബുവിന്റെ ഇരിപ്പ് എന്നും അദ്ദേഹം കൂട്ടിച്ചേര്‍ത്തു. ജാതിയും മതവും നോക്കിയാണു കേരളത്തില്‍ കാര്യങ്ങള്‍ നടപ്പാക്കുന്നത്. കാരണം ഇവിടെ നടക്കുന്നതു വോട്ടുബാങ്ക് രാഷ്ട്രീയമാണ്. അതില്‍ വിജയിക്കാന്‍ ഹിന്ദു സമുദായങ്ങളെ തമ്മിലടിപ്പിക്കുകയാണു രാഷ്ട്രീയ പാര്‍ട്ടികള്‍.


ഭൂരിപക്ഷ സമുദായങ്ങള്‍ ഒരിക്കലും ഒന്നാകാന്‍ പാടില്ലെന്നാണ് ഇവിടുത്തെ എല്ലാ രാഷ്ട്രീയ പാര്‍ട്ടികളുടെയും കാഴ്ചപ്പാടെന്നും അദ്ദേഹം പറഞ്ഞു. എസ്എന്‍ഡിപി തിരുവനന്തപുരം ശാഖ തെരഞ്ഞെടുപ്പുമായി ബന്ധപ്പെട്ട ചടങ്ങില്‍ സംസാരിക്കു കയായിരുന്നു വെള്ളാപ്പള്ളി നടേശന്‍. സ്വാമി സൂക്ഷ്മാനന്ദ, സി.എസ്. സുജാതന്‍, കിളിമാനൂര്‍ ചന്ദ്രബാബു തുടങ്ങിയവര്‍ പ്രസംഗിച്ചു.