യുഡിഎഫ് വിടാന്‍ ജെഎസ്എസ്
സ്വന്തം ലേഖകന്‍

ആലപ്പുഴ: യുഡിഎഫ് മുന്നണി വിടണമെന്ന് ജെഎസ്എസ് സംസ്ഥാന കമ്മിറ്റിയില്‍ ഭൂരിപക്ഷാഭിപ്രായം. പക്ഷേ, അന്തിമതീരുമാനം ഓഗസ്റില്‍ ചേരുന്ന സ്പെഷല്‍ കണ്‍വന്‍ഷനില്‍ തീരുമാനിക്കുമെന്നു സംസ്ഥാന ജനറല്‍ സെക്രട്ടറി കെ.ആര്‍. ഗൌരിയമ്മ, പ്രസിഡന്റ് രാജന്‍ബാബു എന്നിവര്‍ പത്രസമ്മേളനത്തില്‍ വ്യക്തമാക്കി. അതുവരെ യുഡിഎഫുമായി സഹകരിക്കും. സ്പെഷല്‍ കണ്‍വെന്‍ഷനിലും ഇതേ തീരുമാനമാണുണ്ടാകുന്നതെങ്കില്‍ ബോര്‍ഡ് ഭാരവാഹിത്വങ്ങളെല്ലാം അന്ന് ഒഴിയുമെന്നും ഇവര്‍ വ്യക്തമാക്കി. എന്നാല്‍ തീരുമാനത്തിലെ ഭിന്നത വെളിവാക്കി കെ.കെ. ഷാജു യോഗം അവസാനിക്കുന്നതിനു മുമ്പു വേദി വിട്ടു. ഗൌരിയമ്മ എടുക്കുന്ന തീരുമാനം അംഗീകരിക്കുമെങ്കിലും സിപിഎമ്മിലേക്കില്ലെന്ന മട്ടിലായിരുന്നു ഷാജു. വ്യക്തമായ നയമില്ലാതെ മുന്നണി വിടുന്നതിനോടു യോജിപ്പില്ലെന്നായിരുന്നു ഷാജുവിന്റെ നിലപാട്.

സംസ്ഥാന കമ്മിറ്റിയില്‍ പങ്കെടുത്ത എഴുപതോളം സംസ്ഥാനകമ്മിറ്റിയംഗങ്ങളില്‍ സംസാരിച്ച 60 പേരില്‍ 55 പേരും യുഡിഎഫ് വിടണമെന്നാവശ്യപ്പെട്ടതായാണ് അറിവ്. അതേസമയം, ഏകകണ്ഠമായി യുഡിഎഫ് വിടണമെന്ന അഭിപ്രായമുണ്ടായെന്നായിരുന്നു പിന്നീട് യോഗം വിശദീകരിച്ച പ്രസിഡന്റും ജനറല്‍ സെക്രട്ടറിയും പറഞ്ഞത്. സംസ്ഥാന കമ്മിറ്റിയിലും സംസ്ഥാന സെന്ററിലും യുഡിഎഫ് വിടണമെന്നു ഭൂരിപക്ഷാഭിപ്രായം ഉണ്ടായെങ്കിലും കിഴ്ഘടകങ്ങളില്‍ ചര്‍ച്ച ചെയ്തശേഷം അവിടത്തെ ഭാരവാഹികള്‍കൂടി പങ്കെടുക്കുന്ന സംസ്ഥാന കണ്‍വന്‍ഷനിലേ അന്തിമ തീരുമാനമെടുക്കാനാകൂവെന്നും നേതാക്കള്‍ വിശദീകരിച്ചു. 2010-ല്‍ നടന്ന കഴിഞ്ഞ പ്ളീനമാണ് യുഡിഎഫില്‍ തുടരാന്‍ തീരുമാനമെടുത്തത്. അതിനാല്‍ അതിനു തത്തുല്യമായ സ്പെഷല്‍ കണ്‍വന്‍ഷനേ അന്തിമതീരുമാനമെടുക്കാനാകൂവെന്നായിരുന്നു നേതാക്കളുടെ വാദം. നേതാക്കള്‍ ഇക്കാര്യം പത്രസമ്മേളനം നടത്തി വിശദീകരിക്കുന്നതിനിടെ ചില പ്രവര്‍ത്തകര്‍ നാണംകെട്ട ഏര്‍പ്പാടായിപ്പോയി തീരുമാനം ഓഗസ്റിലേക്ക് മാറ്റിയതെന്ന മുദ്രാവാക്യംവിളിയുമായി എത്തിയത് നേതാക്കളില്‍ അസ്വസ്ഥതയുണ്ടാക്കി. തലയില്‍ കൈവച്ചാണ് ഈ സമയം ഗൌരിയമ്മ ഇരുന്നത്.


പി.സി. ജോര്‍ജ് വിഷയത്തില്‍ യുഡിഎഫ് എടുത്ത നിലപാടും നേതൃത്വത്തിലെ പലരും ഇതിനെ എതിര്‍ക്കാതിരുന്നതും ബോര്‍ഡ് അംഗത്വം സംബന്ധിച്ച് നയത്തിന്റെ അടിസ്ഥാനത്തില്‍ പ്രവര്‍ത്തിക്കാത്തതും ഉന്നയിക്കപ്പെട്ട ആവശ്യങ്ങളില്‍ അന്തിമതീരുമാനമുണ്ടാകാത്തതുമൊക്കെയാണ് ജെഎസ്എസിനെ മുന്നണി വിടുക എന്നതിലേക്കെത്തിച്ചതെന്നായിരുന്നു രാജന്‍ബാബുവിന്റെ പ്രതികരണം. ഇനി ചര്‍ച്ചയുണ്ടാകുമോയെന്ന ചോദ്യത്തിന് അതൊക്കെ ഒരുപാടു നടത്തിയതാണെന്നു ഗൌരിയമ്മ പ്രതികരിച്ചു. ചര്‍ച്ച നടത്തേണ്ടത് തങ്ങളല്ല, യുഡിഎഫാണെന്നായിരുന്നു രാജന്‍ബാബുവിന്റെ പ്രതികരണം.

വൈഎംസിഎ ഹാളില്‍ ഇന്നലെ രാവിലെ മുതല്‍ നടന്ന സംസ്ഥാന കമ്മിറ്റിയില്‍ യുഡിഎഫ് വിടുകയെന്ന വിഷയത്തിലായിരുന്നു പ്രധാന ചര്‍ച്ച. 14 ജില്ലാ സെക്രട്ടറിമാരില്‍ ആലപ്പുഴ ജില്ലാ സെക്രട്ടറി ഒഴികെയുള്ളവര്‍ യുഡിഎഫ് വിടണമെന്ന അഭിപ്രായമുയര്‍ത്തി. ആലപ്പുഴ ജില്ലാ സെക്രട്ടറിയും ഗൌരിയമ്മയുടെ തീരുമാനം അംഗീകരിക്കുമെന്നു വ്യക്തമാക്കി. 70 സംസ്ഥാനകമ്മിറ്റിയംഗങ്ങള്‍ പങ്കെടുത്ത യോഗത്തില്‍ 60 പേരാണു സംസാരിച്ചത്. ഇതില്‍ അഞ്ചുപേര്‍ മാത്രമാണ് യുഡിഎഫ് വിടണമെന്ന അഭിപ്രായത്തോടു യോജിക്കാതിരുന്നതെന്നാണു സൂചന. യോഗം അവസാനിക്കുന്നതിനു മുമ്പേ ജെവൈഎഫ് പ്രവര്‍ത്തകര്‍ യോഗം ഹാളിനു പുറത്തു ഗൌരിയമ്മയ്ക്ക് അനുകൂല മുദ്രാവാക്യം മുഴക്കുകയും നാണം കെട്ട മുന്നണിബന്ധം വേണ്േട വേണ്െടന്നു പറയുകയും ചെയ്തു. അഞ്ചരയോടെ അവസാനിച്ച സംസ്ഥാനകമ്മിറ്റിക്കു ശേഷം സംസ്ഥാന സെന്ററും ചേര്‍ന്നു. അതിനും ശേഷമായിരുന്നു ഗൌരിയമ്മയും രാജന്‍ബാബുവും നേതാക്കളായ അഡ്വ. പ്രദീപും അഡ്വ. സത്ജിത്തും പത്രസമ്മേളനം നടത്തിയത്.