പ്രഫ. അമ്പലപ്പുഴ രാമവര്‍മ്മ അപൂര്‍വ വ്യക്തിത്വത്തിന്റെ ഉടമ: മാര്‍ ആലഞ്ചേരി
കൊച്ചി: അധ്യാപകപ്രമുഖനും പ്രഭാഷകനും കലാസാംസ്കാരികരംഗത്തെ നിറസാന്നിധ്യവുമായിരുന്ന പ്രഫ. അമ്പലപ്പുഴ രാമവര്‍മ്മയുടെ നിര്യാണത്തില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി ദുഃഖം രേഖപ്പെടുത്തി.

അദ്ദേഹത്തിന്റെ കുടുംബാംഗങ്ങളെയും സുഹൃത്തുക്കളെയും അനുശോചനം അറിയിക്കുന്നതായും അദ്ദേഹം പറഞ്ഞു. 40 വര്‍ഷം നീണ്ട അധ്യാപനജീവിതത്തിലൂടെ ശിഷ്യസഹസ്രങ്ങളെ ഉന്നതമായ ദര്‍ശനങ്ങളിലേക്കു വഴി നടത്താന്‍ രാമവര്‍മസാറിനു സാധിച്ചിരുന്നു.

തന്റെ അനിതരസാധാരണമായ പ്രഭാഷണങ്ങളിലൂടെയും എഴുത്തുകളിലൂടെയും ജനഹൃദയങ്ങളെ ഉദ്ദീപിപ്പിക്കാന്‍ കഴിഞ്ഞ അപൂര്‍വവ്യക്തിത്വത്തിന്റെ ഉടമയാണ് വിടപറഞ്ഞ പ്രഫ. അമ്പലപ്പുഴ രാമവര്‍മ്മ.


കേരളത്തിന്റെ തനതു കലാരൂപങ്ങളെ സ്നേഹിക്കുകയും അവയെ ശാസ്ത്രീയമായി പഠിക്കുകയും ചെയ്ത അദ്ദേഹം അവയെ പഠനക്കളരികളിലൂടെയും ഗ്രന്ഥരചനകളിലൂടെയും ആസ്വാദനക്ഷമവുമാക്കി.

ലാളിത്യവും വിനയവും കൈമുതലാക്കി കലാസാംസ്കാരികവേദികളില്‍ ശ്രദ്ധേയനായിരുന്ന രാമവര്‍മസാറിന്റെ വേര്‍പാട് അക്ഷരനഗരിക്കും സാംസ്കാരിക കേരളത്തിനും വലിയ നഷ്ടം തന്നെയാണ്.