ബാംഗളൂരില്‍ മലയാളി വൈദികന്‍ തലയ്ക്കടിയേറ്റു മരിച്ചനിലയില്‍
കോട്ടയം/ബാംഗളൂര്‍: ബാംഗളൂരിലെ യശ്വന്ത്പുര്‍ സെന്റ് പീറ്റേഴ്സ് മേജര്‍ സെമിനാരി റെക്ടറും ഏറ്റുമാനൂര്‍ സ്വദേശിയുമായ ഫാ. കെ.ജെ. തോമസ് പഴയമ്പള്ളിലിനെ (63) സെമിനാരി മന്ദിരത്തിനുള്ളില്‍ തലയ്ക്കടിയേറ്റു മരിച്ച നിലയില്‍ കണ്െടത്തി. സെമിനാരിയിലെ സ്വന്തം മുറിയിയില്‍നിന്ന് അല്പം മാറി വരാന്തയിലാണ് ഇന്നലെ പുലര്‍ച്ചെ മൃതദേഹം കാണപ്പെട്ടത്. ഊട്ടി രൂപതയില്‍ മിഷണറിയായ ഫാ. കെ.ജെ തോമസ് ഏറെക്കാലമായി സെന്റ് പീറ്റേഴ്സ് സെമിനാരിയില്‍ അധ്യാപകനും റെക്ടറുമായി സേവനം ചെയ്തുവരുകയായിരുന്നു. മൃതദേഹം ഏറ്റുമാനൂര്‍ സെന്റ് ജോസഫ്സ് ക്നാനായ കത്തോലിക്കാപള്ളിയില്‍ സംസ്കരിക്കുമെന്നു ബന്ധുക്കള്‍ അറിയിച്ചു.

ഇരുമ്പുവടികൊണ്ടു തലയ്ക്കേല്പിച്ച ക്ഷതമാണു മരണകാരണമായതെന്നു പോലീസ് കമ്മീഷണര്‍ അലോക് കുമാര്‍ ദീപികയോടു പറഞ്ഞു. മുറിയില്‍നിന്നു വിളിച്ചുണര്‍ത്തി ഒന്നിലേറെ പ്പേര്‍ ചേര്‍ന്നു തലയ്ക്കടിച്ചുവീഴ്ത്തിയ ശേഷം വലിച്ചിഴച്ചതിന്റെ ലക്ഷണങ്ങളുണ്ട്. ആസൂത്രിതമെന്നു സൂചന ലഭിച്ച ആക്രമത്തില്‍ തല വികൃതമായിട്ടുണ്െടന്നു പോലീസ് അറിയിച്ചു.

ഞായറാഴ്ച രാത്രി ബാംഗളൂരില്‍ കനത്ത മഴയായിരുന്നതിനാല്‍ സെമിനാരിയിലെ സെക്യൂരിറ്റി ഗാര്‍ഡുകള്‍ സംഭവം രാവിലെയാണ് അറിഞ്ഞത്. പോണ്ടിച്ചേരിയില്‍നിന്ന് ഇന്നലെ പുലര്‍ച്ചെ എത്തുന്ന ഇളയ സഹോദരിയും ക്ളൂണി സന്യാസിനി സമൂഹാംഗവുമായ സിസ്റര്‍ ജാക്വിലിനെ സ്വീകരിക്കാന്‍ ഫാ. തോമസ് വിമാനത്താവളത്തില്‍ എത്തുമെന്ന് അറിയിച്ചിരുന്നു. വിമാനത്താവളത്തിലെത്തി സഹോദരനെ തുടരെ ഫോണ്‍ ചെയ്തിട്ടും എടുക്കാതിരുന്നതിനെത്തുടര്‍ന്ന് സിസ്റ്റര്‍ ജാക്വിലിന്‍ തനിയെ സെമിനാരിയിലെത്തി. തുടര്‍ന്ന് അന്തേവാസികള്‍ നടത്തിയ തെരച്ചിലിലാണ് മൃതദേഹം കണ്െടത്തിയത്. ബാംഗളൂര്‍ സിറ്റി പോലീസ് കമ്മീഷണര്‍ ജ്യോതി പ്രകാശ് മിര്‍ജിയുടെ നേതൃത്വത്തില്‍ പോലീസ് ഊര്‍ജിതമായി അന്വേഷണം നടത്തിവരുകയാണ്. ഫാ. തോമസിന്റെ മൃതദേഹം ബാംഗളൂര്‍ രാമയ്യ മെഡിക്കല്‍ കോളജില്‍ ഇന്നലെ ഉച്ചകഴിഞ്ഞ് പോസ്റ്മോര്‍ട്ടം നടത്തി.


ബാംഗളൂര്‍ സെന്റ് ജോണ്‍സ് മെഡിക്കല്‍ കോളജില്‍ എംബാം ചെയ്തശേഷം മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം ഇന്നു രാവിലെ എട്ടിന് സെന്റ് പീറ്റേഴ്സ് സെമിനാരി ചാപ്പലില്‍ പൊതുദര്‍ശനത്തിനുശേഷം ഊട്ടി രൂപതാ കേന്ദ്രത്തിലേക്കു കൊണ്ടുപോകും. തുടര്‍ന്ന് ഏറ്റുമാനൂരില്‍ കൊണ്ടുവന്നു സംസ്കരിക്കുന്നതിന് ഊട്ടി രൂപതാകേന്ദ്രം അനുമതി നല്‍കിയതായി ബന്ധുക്കള്‍ പറഞ്ഞു. ബാംഗളൂര്‍ ആര്‍ച്ച്ബിഷപ് ഡോ. ബര്‍ണാഡ് മൊറാസ് ഉള്‍പ്പെടെ ഒട്ടേറെപ്പേര്‍ സെമിനാരിയിലെത്തിയിരുന്നു. സംസ്കാരം വെള്ളിയാഴ്ച ഉച്ചകഴിഞ്ഞ്മൂന്നിന് ഏറ്റുമാനൂര്‍ കൊടുവത്താനം സെന്റ് ജോസഫ്സ് ടൌണ്‍ പള്ളിയില്‍. കോട്ടയം അതിരൂപതയില്‍പ്പെട്ട ഏറ്റുമാനൂര്‍ സെന്റ് ജോസഫ്സ് ഇടവക പഴയമ്പള്ളില്‍ (കൊച്ചുപുരയില്‍) പി.എം. ജോസഫിന്റെയും ഏലിക്കുട്ടിയുടെയും ഇളയ പുത്രനാണ്. ഏറ്റുമാനൂരില്‍നിന്നു സഹോദരപുത്രന്‍ ജോസഫ് മാത്യുവും സഹോദരീപുത്രന്‍ ബേബി ചാക്കോയും ഇന്നലെ വൈകുന്നേരം ബാംഗളൂരിലെത്തിയിട്ടുണ്ട്. ഫാ. തോമസ് ഏറ്റുമാനൂരിലുള്ള കുടുംബാംഗങ്ങളെ ഞായറാഴ്ച ഫോണില്‍ വിളിച്ച് ഈസ്റര്‍ ആശംസകള്‍ അറിയിച്ചിരുന്നു. ജനുവരിയിലാണ് അവസാനമായി നാട്ടില്‍ വന്നത്. കഴിഞ്ഞ ദിവസം ഒരു സംഘം സെമിനാരിയില്‍ അതിക്രമിച്ചു കയറാന്‍ ശ്രമം നടത്തിയിരുന്നു. ഈ സംഭവത്തില്‍ ഒരു സെക്യൂരിറ്റിക്കു പരിക്കേറ്റിരുന്നു. കൊലപാതകത്തിനു പിന്നില്‍ ഈ സംഭവത്തിനു പങ്കുള്ളതായി വ്യക്തമല്ലെന്നു സെമിനാരി വൃത്തങ്ങള്‍ പറഞ്ഞു. മേരി ചാക്കോ മൂലക്കാട്ട് (വെളിയന്നൂര്‍), എലീശ ഉതുപ്പ് ചാലായില്‍ (നീണ്ടൂര്‍) എന്നിവരാണു മറ്റു സഹോദരങ്ങള്‍.