പൽമീറയിലെ ഇസ്രേലി വ്യോമാക്രമണം: പ്രതിഷേധം അറിയിച്ച് റഷ്യ : Deepika.com International News |

Click here for detailed news of all items

പൽമീറയിലെ ഇസ്രേലി വ്യോമാക്രമണം: പ്രതിഷേധം അറിയിച്ച് റഷ്യ

Monday, March 20, 2017 12:06 PM IST

മോസ്കോ :സിറിയയിലെ പൽമീറ നഗരത്തിനു സമീപം ഇസ്രേലി യുദ്ധവിമാനങ്ങൾ ഈ മാസം 17നു നടത്തിയ ആക്രമണത്തിൽ റഷ്യ ശക്തമായ പ്രതിഷേധം രേഖപ്പെടുത്തി. മോസ്കോയിലെ ഇസ്രേലി സ്ഥാനപതി ഗാരി കോറനെ വിദേശകാര്യമന്ത്രാല‍യത്തിൽ വിളിച്ചുവരുത്തിയാണു പ്രതിഷേധം അറിയിച്ചത്.

സിറിയൻ സൈന്യത്തെ പിന്തുണയ്ക്കുന്ന റഷ്യൻ സൈനികർ പൽമീറയ്ക്കു സമീപമുള്ള അവസരത്തിലായിരുന്നു വ്യോമാക്രമണം. ഐഎസിനെ സഹായിക്കാനാണ് ഇസ്രയേൽ വ്യോമാക്രമണം നടത്തിയതെന്നു സിറിയ ആരോപിക്കുന്നു.

ലബനനിലെ ഹിസ്ബുള്ള ഗറില്ലകൾക്ക് ആയുധവുമായി പോയ വാഹനവ്യൂഹത്തെയാണു തങ്ങൾ ലക്ഷ്യം വച്ചതെന്ന് ഇസ്രയേൽ പറഞ്ഞു. ഇസ്രയേലിനെ തകർക്കാൻ പ്രതിജ്ഞയെടുത്തിട്ടുള്ള ഗ്രൂപ്പാണ് ഹിസ്ബുള്ളകൾ. സിറിയൻ പ്രസിഡന്‍റ് അസാദിന്‍റെ സൈനികരെ സഹായിക്കാൻ നിരവധി ഹിസ്ബുള്ളകൾ സിറിയയിൽ എത്തിയിട്ടുണ്ട്.

പൽമീറയിൽ ആക്രമണം നടത്തിയ ഇസ്രേലി ജറ്റ് വിമാനങ്ങളുടെ നേർക്ക് സിറിയ മിസൈൽ പ്രയോഗിച്ചു. ഒരു വിമാനം വീഴ്ത്തിയെന്നു സിറിയ അവകാശപ്പെട്ടെങ്കിലും തങ്ങളുടെ മുഴുവൻ വിമാനങ്ങളും നിരപായം ഇസ്രേലി താവളത്തിൽ തിരിച്ചെത്തിയെന്ന് ഇസ്രേലി പ്രതിരോധ വകുപ്പ് അറിയിച്ചു. ഇസ്രയേലും അമേരിക്കയും സംയുക്തമായി വികസിപ്പിച്ച ആരോ മിസൈൽ പ്രയോഗിച്ചാണ് സിറിയ അയച്ച മിസൈലുകൾ തകർത്തത്.
ഇനി ഒരിക്കൽക്കൂടി ഇസ്രേലി വിമാനങ്ങൾക്കു നേരേ പ്രത്യാക്രമണം നടത്താൻ മുതിർന്നാൽ സിറിയയുടെ വ്യോമപ്രതിരോധ സംവിധാനം അപ്പാടെ തകർക്കുമെന്ന് ഇസ്രേലി പ്രതിരോധമന്ത്രി അവിഗ്ദോർ ലീബർമാൻ ഭീഷണി മുഴക്കി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.