ഇന്ത്യൻ എൻജിനിയറെ യുഎസിൽ വെടിവച്ചു കൊന്നു : Deepika.com International News |

Click here for detailed news of all items

ഇന്ത്യൻ എൻജിനിയറെ യുഎസിൽ വെടിവച്ചു കൊന്നു

Friday, February 24, 2017 1:42 PM IST

കാൻസസ്: ഇന്ത്യൻ എൻജിനിയർ അമേരിക്കയിൽ അക്രമിയുടെ വെടിയേറ്റു മരിച്ചു. രണ്ടുപേർക്ക് പരിക്കേറ്റു. കാൻസസ് നഗരത്തിലെ ബാറിൽ ബുധനാഴ്ച രാത്രി നടന്ന വെടിവയ്പിലാണ് ഹൈദരാബാദ് സ്വദേശി ശ്രീനിവാസ് കുച്ചിബോത്‌ല (32) കൊല്ലപ്പെട്ടത്. ശ്രീനിവാസിന്‍റെ സഹപ്രവർത്തകൻ അലോക് മദസാനിക്കും അക്രമിയെ തടയാൻ ശ്രമിച്ച അമേരിക്കക്കാരൻ ഇയാൻ ഗ്രില്ലോട്ടിനും വെടിവയ്പ്പിൽ ഗുരുതരമായി പരിക്കേറ്റു.

അമേരിക്കക്കാരനായ മുൻ നാവികസേനാ ഉദ്യോഗസ്ഥൻ ആഡം പുരിന്‍റോണെ ഈ കേസിൽ മിസൂറിയിൽ നിന്നു പോലീസ് അറസ്റ്റു ചെയ്തു. വംശീയ വിദ്വേഷമാണ് ആക്രമണത്തിനു പിന്നിലെന്നു പറയപ്പെടുന്നു. എന്‍റെ രാജ്യത്തുനിന്നു പുറത്തുപോകു എന്ന് ആക്രോശിച്ചുകൊണ്ടായിരുന്നു ആക്രമി നിറയൊഴിച്ചതെന്നു ദൃക്‌സാക്ഷികൾ പറഞ്ഞു.ലോക്കൽ പോലീസിനു പുറമേ എഫ്ബിഐയും അന്വേഷണം ആരംഭിച്ചിട്ടുണ്ട്.

കാൻസസിലെ ഒലാതെയിൽ ജിപിഎസ് സംവിധാനങ്ങൾ തയാറാക്കുന്ന ഗ്രാമിൻ ഹെഡ്കാർട്ടേഴ്സിലെ ജീവനക്കാരനാണ് കൊല്ലപ്പെട്ട ശ്രീനിവാസ് കുച്ചിബോത്‌ലെ. ശ്രീനിവാസിന്‍റെ മരണം അത്യന്തം ഞെട്ടലുളവാക്കുന്നതാണെന്നു വിദേശകാര്യമന്ത്രി സുഷമ സ്വരാജ് ട്വീറ്റ് ചെയ്തു. യുഎസിലെ ഇന്ത്യൻ അംബാസഡർ നവ്തേജ് സർനയുമായി സംസാരിച്ചതായും രണ്ടു എംബസി ഉദ്യോഗസ്ഥരെ ഇന്ത്യക്കാരുടെ സഹായത്തിനായി കാൻസസിലേക്ക് അയച്ചതായും സുഷമ സ്വരാജ് ട്വിറ്ററിൽ അറിയിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.